男人唔可以窮: 12
「妳訂左機票未？」
以娜：「媽咪去訂緊，我而家返屋企執行李，薛可正你記住你後日有一筆錢要入歐生個戶口，仲有工人既糧我已經計好，你記得下星期五前比埋支票佢地，我過左英國你自己跟返好盤數，聽到未。」
我：「知喇，我有冇嘢要幫妳？」
以娜：「冇喇，媽咪打比我，我一陣再比返電話你。」
「嗯。」
以娜收左線，阿爸行入房問我發生咩事，我為免佢擔心，所以冇向佢講以娜屋企所發生既事，我只係繼續執拾我要執拾既細軟。
晚飯時間，可勇同Yoyo都返左黎一齊食，食飯既時候，我發現阿爸食得好少，每一啖飯都係好小好小咁放入口。
我：「阿爸，你好似好耐冇食飯飲酒。」
阿爸：「係呀，而家食小小個肚就好飽，冇飲好耐。」
可勇：「阿爸你上星期再照X光果個報告出左未？」
阿爸：「出左啦，果日你地阿媽唔得閒我自己去拎左，冇咩事。」
Yoyo：「阿爸你面色好似差左好多呀，我聽日買嘢煲湯你飲好冇？你想飲咩？」
阿爸：「妳地想啦，我飲得果小小，唔使就我喎。」
阿媽：「個新抱問你你就講啦，都話特登煲比你。」
Yoyo：「咁我話事啦，阿媽我返埋今個星期就唔返工架喇，我會拎哂公司既嘢返黎做。」
我：「Yoyo而家做成點？」
Yoyo：「都唔錯，新公司比好多資源我地。」
我：「屋企睇市小心啲，可勇唔好成日上咸網呀，一陣部機中左毒會搞到好慢架。」
Yoyo：「聽到未呀薛可勇？」
可勇：「阿哥實知啦，以娜姐話佢自己之前都係咁整到屋企電腦中毒。」
阿媽：「你地兩個真係丫，咁大個人仲走上網睇埋哂啲咸濕嘢。」
可勇：「唔係兩個，係三個，我教左阿爸上香港討論區，佢而家日日去咸版。」
阿爸：「食飯啦可勇。」
「哈哈哈哈哈哈。」
當晚，我返到屋企，再打電話比以娜，但佢既電話打極都冇人聽。
半個鐘頭後，以娜來到我屋企。
我：「妳電話冇人聽既？」
以娜：「我留左喺屋企。」
以娜冇理我，一入屋就自己走去開電腦，跟住就拎哂我公司所有單出黎，然後行入廚房沖左一杯咖啡。
以娜每次都係準備夜訓又或者唔訓覺既時候，先會選擇飲咖啡。
我：「我自己做得喇，妳返去陪媽咪啦。」
以娜：「得喇好快，我好多手尾你唔知架，我怕第時你搵唔到。」
我：「我搵唔到咪打比妳囉，妳又唔係唔返。」
聽到我講呢句說話，以娜放低手上面既單，擰轉頭，望住我，深呼吸一下：
「薛可正，我後晚就會同媽咪上機，而家以信咁既情況，我唔知我會幾時返，我甚至…我唔知自己仲會唔會返黎呀。」
我：「點解呀？」
以娜：「媽咪已經決定左成家要去英國陪以信，賣樓既錢都已經收到哂，同埋以信今次既情況我地都仲未知，我點會知我會幾時返？」
我：「咁我點？」
以娜：「唔好而家呢個時間問我呢個問題好冇？」
我：「如果妳話比我知妳會返，就算係幾耐都好我都一定會等妳，但妳而家話比我知妳可能唔返，我唔而家問，我應該幾時問？」
以娜：「我一早講左我要去英國架，你唔好而家講到好似我唔啱咁好冇呀？」
我：「我冇話妳唔啱呀，但…我會以後見妳唔到呀張以娜，我只係緊張…」
以娜：「緊張乜嘢？我細佬而家訓左喺醫院，你要我比乜嘢時間你？叫你等我一個月？兩個月？半年？定一年呀？點解你唔係首先為我諗下？仲要我去為你諗左先？」
「我唔係咁既意思呀！」以娜既說話令我語塞，男人鬧交，一暴躁，就好自己將怒火發洩喺書枱又或者係衣櫃上面。
我好大力咁一拳打落枱面，以娜望住我，好倔強咁望住我。
以娜：「我後日上機，今晚都走上黎想幫你完成埋所有單先，你反而咁對我？」
我：「妳唔好成日誤解我意思好冇？」
以娜：「誤解？冇嘢喇，我唔想再同妳嘈，我走喇。」
「以娜…」以娜執起自己既手袋開門，我追上前，出門口，已經見到以娜向後樓梯方面走左。
「張以娜，我唔係想發脾氣，而係我好需要妳，我愛妳呀！」我用盡全力既大叫，希望令以娜回心轉意。
以娜聽到我咁講，企左喺後樓梯既門前面，望住我：
「薛可正，我都知，但我地而家已經唔係小朋友，我地仲有屋企人……..搞好間公司，再見。」
以娜走左之後，我企左喺門口好耐都冇再返入屋，我好傷心，因為我覺得，今次，可能係我最後一次見到以娜。
我後悔點解每一次當發生問題既時候，我都只係以自己利益作出發點，以娜鬧得我好啱，而家以信有事，佢個心已經唔好受，但依然仲將我公司既事放喺心，就算係上機前都想幫我做埋一堆我完全唔識做既事先離開，但我對佢所做既，根本就只不過係自私既行為。
薛可正，到底你想點？
第二日，我打左好多次電話比以娜，佢都冇接到，我甚至去到佢姑姐樓下等佢，但依然係見唔到佢既芳蹤。
最後我用訊息，向以娜道歉，我用左接近一個鐘頭，打左二佰幾個字比以娜，向佢講出我所有所有想講既說話。
可惜，以娜始於冇覆到我，當晚，我自己一個人，喺屋企飲左好多酒，飲到唔知幾時，我就訓著左。
第二日一起身，就已經係夜晚，我望望電話，見到以娜有一個訊息比我：
「薛可正，我走喇，再見。」
以娜就咁就走左，我整個人一下子好似失去左重心咁。公司，唔會有人再幫我計好盤數，返到屋企，阿爸阿媽問起以娜，我已經唔知再可以點樣去瞞佢地。
電話響起，打電話黎既係公事上既一位陳生。
陳生：「薛生，忠德果邊打黎架，歐生問你上次傾果兩櫃貨你有冇問題？」
陳生打電話黎，我先記起以娜果日向我提過我需要入一筆錢比呢位歐生，原因係我要買兩櫃貨。
因為最近金屬回收價比較波動，以娜曾經勸過我入咁大批貨會有風險，但我覺得係一個機會，所以決定試一試。
我：「冇問題，我聽日入比你地。」
陳生：「好，唔該哂薛生。」
其實簡單小小講，就係我由外國買左兩隻貨櫃既回收貨源返黎，再轉售內地賺差價，但問題係，呢兩隻貨櫃由水路到香港要兩個星期時間，假設我今日買既價錢係十蚊一斤，但呢兩個星期船期既風險就要由我自己去承擔，因為金屬回收價既波動，兩個星期後，有可能係升到二十蚊一斤，亦有可能係跌到五蚊一斤，由於貨量唔小，所以今次冒既險對我黎講都唔算細，但男人要經營自己既事業，我覺得總有放手一搏既時候。
可惜，以娜走左之後既幾日，我真係完全提唔起勁做嘢，好多事都安排得好亂，就連工人出糧既支票我都可以漏低喺餐廳。
每日起身，我就係坐喺電腦前面睇下以娜有冇上線，英國既電話一直都唔通，果種斷絕來往既感覺真係令我好絕望。
以前，我總係怪以娜唔明白我，原來最唔明白我果個就係我自己，我最唔明白自己點解成日喺一件事上面都要捉錯重點，點解總係喺最重要既時候做出最錯誤既決定，點解，總係將自己想要既事放喺第一位。
點解總係唔識欣賞其他人既好，只係經常覺得唔夠其他人唔夠好？
我已經唔識控制整件事，最後我決定將自己好好咁隱藏一個星期，每日都係起身食飯，上線等以娜，打電話，之後訓覺。
阿媽打左電話比我三日，但我都冇聽到，到我想返去食飯果時，我就會出現。
第四日，打電話比我既係可勇：
「哥，阿爸好唔妥，你而家喺邊？快啲返屋企呀哥。」
收到電話，我立即趕返屋企，未入到門口，我已經聽到阿媽呼天搶地既喊聲。
「阿來呀阿來呀，你點呀，唔好嚇我呀！」阿媽攬住阿爸一路喊，而可勇就企喺旁邊一路打電話。
我走入屋，阿媽見到我就拉住我到阿爸身邊：
「可正你睇下阿爸，佢話個肚好痛，你望下阿爸啦。」
只係一個星期冇見，阿爸比一個星期前瘦左好多，我見到佢兩隻手按住個肚，人已經痛到出唔到聲，只係不停咁叫。
我伸隻手去阿爸個肚度，我摸到既，竟然係一舊硬塊喺阿爸既肚入面。
我：「點解會變到咁大架？阿爸你上次又話報告冇事？」
阿爸冇應我，因為佢已經痛到冇乜意識，只係不停叫痛，隻手捉得我好實，好實。
可勇：「哥，白車已經黎緊，阿爸佢個肚有一舊好大既腫瘤。」
我：「我摸到，阿爸一路呃住我地。」
阿媽：「佢禽晚已經叫痛，但死都唔比我叫白車，又唔比我去隔離房叫可勇，跟住飲左白色果支藥水又冇事訓返。」
Yoyo：「阿爸呀，你唔好有事呀。」
阿媽：「來呀你唔好嚇我呀…嗚…..可正呀，你阿爸果日去廁所仲搞到成個廁所都係血，你搵人救下阿爸啦。」
我：「媽放心，我地而家送阿爸去醫院，妳放心。」
阿媽：「我真係好驚你阿爸掉低我呀,嗚…..」
可勇：「老婆妳陪住阿媽，我同阿哥送阿爸入醫院。」
Yoyo：「有咩消息打電話返黎比我地呀。」
十分鐘後，救護員黎到，扶左阿爸上病床之後，可勇就去搵阿爸既身份証同病歷，而我就一路陪住阿爸。
阿爸用左氧氣罩之後，痛既情況明顯好轉左，上到救護車，我坐喺佢身邊，一路捉住佢隻手，一路叫佢唔使怕。
突然，已經痛到半昏迷既阿爸打開眼，望住我，不斷向我講同一句說話：
「正仔，你幾時同以娜結婚？幾時呀正仔，話比阿爸知！」
我：「爸，好快，好快，你放心。」
阿爸：「以娜呢？以娜去左邊？」
我：「我叫佢黎，你休息下先。」
救護車去到屯門醫院，阿爸最後由一位醫生打左一支針而慢慢訓著，十分鐘後，可勇黎到醫院。
我地將阿爸既病歷交比護士之後，就坐左埋一邊慢慢等。
一個鐘頭後，一位姓蔡既醫生拎住阿爸既病歷，黎到我同可勇既面前。
蔡醫生：「薛天來既病歷我地聯絡左之前既主診，你地會唔會打算轉佢去私人醫院？」
我：「會，但我想問下佢而家個情況可唔可以轉院？」
蔡醫生：「問題唔大，暫時睇應該係個瘤大左，如果你要留喺呢度照就要等多陣，如果急既去返私人果邊會好啲。」
我：「大左…我頭先摸到腰左邊果一個位有好大舊嘢，係咪果度？」
蔡醫生：「嗯，應該係。」
可勇：「情況嚴重嘛？」
蔡醫生：「唔嚴重點會大到可以摸得到，但詳細既你地問返主診果邊，我一陣叫護士幫你地搞轉院手續，你地等等。」
我同可勇就係咁，一等就等左兩個鐘，期間Yoyo打左三次電話比我地，但可勇冇聽到。
我：「點解唔聽Yoyo電話？」
可勇：「都未有結果，唔想聽。」
我：「記唔記得上次我去醫院，都係你陪我一齊等。」
可勇：「記得。」
我：「可勇呀，對唔住。」
可勇：「算啦，我都有唔啱。」
我：「唔係，阿哥知道自己係有問題，唔止你，連以娜，我都永遠唔識去體諒。」
可勇：「做咩，又同以娜姐嘈呀？」
我：「佢返左英國喇，唔知仲返唔返。」
可勇：「因為佢細佬既事？」
「嗯。」我點點頭
可勇：「佢會返。」
我：「你點知？」
可勇：「我諗….其實佢一早就唔應該留喺香港，如果唔係為左你又或者阿爸既病，佢又點會留咁耐，而家阿爸病得咁重，我覺得…我都唔知點講…」
我：「可勇，你驚唔驚阿爸會走？」
可勇：「好驚，真係好驚。」
「我都係。」
最後我地知道既結果係，阿爸既癌細胞已經擴散到其他器官，醫生話再做化療同食藥都只會令阿爸更加辛苦，換句說話，阿爸既人生，已經進入最後既倒數階段。
不過，醫生最後都有一句意見比我地：
「唔好咁快放棄，希望你地一家人都可以保持樂觀，呢個世界唔係冇奇蹟，我都見過唔少病例去到你地爸爸呢種情況，之後又會自己好番，最重要係病人自己意志力都要好強。」
我：「多謝，麻煩哂你醫生。」
醫生離開之後，我望住可勇，結果已經知道左，但我同可勇應該點樣向阿媽講？
可勇：「我返左屋企先，阿哥你陪阿爸。」
「睇住阿媽。」
我睇過一本書話，如果一個至親離開，如果你掛住佢，就將你對佢既愛，轉嫁到其他親人身上，令呢份愛生生不息、循環不休，咁樣，曾經發生過既感情，你永遠都唔會遺落，只會愈儲，愈多。
阿爸打左支針之後就一直訓覺，我坐喺佢身邊一直等，一路等，一路望住阿爸，諗返起細個發生既事，諗返起佢點樣帶我同可勇坐巴士去美孚，再拖住我地兩個去荔園玩。
阿爸以前好強壯，每邊一隻手，已經可以拉起我地兩兄弟，細個我地成日爭住要阿爸同我地騎膊馬，我有時會爭到同可勇打交，阿爸每次見到我地咁，都會一人一邊膊頭咁同我地行街。唔知，第時可勇會唔會都係咁呢？
爸，我真係好唔捨得你。
最後，阿媽都知道左阿爸病情，可勇話阿媽整晚不停咁喊，佢同Yoyo都冇哂辦法，只有陪住佢，直到阿媽慢慢訓著。
阿爸醒番，已經再冇痛既感覺，醫生檢查過之後，就話留院再觀察多兩日，如果冇問題就可以出院返屋企。
果晚，可勇冇陪阿媽去醫院探阿爸，只有我一個留喺醫院陪住阿爸。
半夜，我收到一個長途電話既訊息
「薛可正，好好咁照顧來叔叔，要樂觀，我都會，保重，以娜。」
收到以娜既訊息，令我即時清醒過黎，我走出門口，想用訊息回覆以娜，但我發現自己原來唔識用用長途電話既訊息，我諗左一諗，決定試下打長途電話比以娜。
可惜，電話已經閂左。
我好失望咁返入房，我一路諗，點解以娜會呢個時候比呢個訊息我，佢而家到底點？以信既情況又點樣？
半個鐘頭後，我再試多一次打比以娜，結果都係一樣。
唔知係咪我舉動太大聲，阿爸呢個時候醒左。
我：「阿爸，你點呀？使唔使飲杯水？」
阿爸：「唔使，我冇事，唔痛果時就冇事架喇。」
我：「阿爸,,點解你要一直呃住我地？你上次照完明明份報告係嚴重左，點解你唔講出黎呀？」
阿爸：「傻仔呀，你估阿爸係神仙咩，我照完之後，醫生同我講個瘤已經好大，果時都已經冇乜野辦法，講出黎有乜嘢用，你又要搵錢去應付我既醫藥費，可勇又要準備做阿爸，Yoyo呢，又就黎生得，唔通我仲話比你地知等你地操心多樣咩。」
我：「我地一家人黎架阿爸。」
阿爸，「就係一家人，如果阿爸最後都係要走既，點解要製造咁多沙石？我唔想我一個人，影響到你地，可勇同Yoyo自己都已經有一個家庭，我唔想我地呢個家庭既事，影響到佢地家庭。
小朋友出世，一定要開開心心，高高興興，你放心啦，阿爸頂得住，點都要望下個孫既。」
面對阿爸好似覺得自己必定會死既心態，我心痛到無辦法去理解。
我：「阿爸，你唔一定有事架，醫生話樂觀就可以，好多事都會發生。」
阿爸：「係呀，所以我好樂觀架，最衰就係呢排痛多左，如果唔係我仲樂觀呀，你都係呀，以娜呢」
我：「佢…返左英國…佢細佬有小小事，但會返黎。」
阿爸：「我信以娜，果次可勇結婚，我將另一半果塊玉交比佢果時，佢應承過我會探我。」
「嗯。」
阿爸：「可正，不過，如果有一日你發覺，你人生既路上面，可能會突然缺少左某一樣你覺得好重要既嘢，無論如何，流過眼淚之後，你都要繼續行，比以前行得更快，行得更大步，總有一日，你會同佢再見面，一定會。」
「爸。」我再忍唔住眼淚，亦無需要再忍，我走上前，攬住阿爸不停咁喊，阿爸就一路拍我既膊頭，就好似，九年前，喺博愛醫院入面，阿爺過身果一晚咁。
我到而家都唔知，阿爸所講果樣唔見左既嘢，佢係指自己，定係以娜？
兩日之後，阿爸出院，呢個時侯既阿爸已經係一日比一日瘦，瘦既速度係你完全想像唔到，感覺就係成個人不斷漏氣一樣。
加上我地家族有個遺傳，就係鼻樑高同埋眼窩好深，阿爸以前精神好既時候，望落去會覺得個人好飽滿，好有魄力。
但而家因為一日比一日瘦，眼窩凹陷既變化顯得更加明顯，成個人就好似一個骷髏骨咁。阿爸出院之後呢幾日，我每日都係出去打點完公司既事，就會返屋企陪阿爸，但係當我每次返去之前，我都要喺樓下準備好耐好耐，我先可以有勇氣面對阿爸每一日既變化。
果段日子，全家人都好煎熬。
阿爸出院後一個星期，今晚，阿媽特別為阿爸煮左佢最鐘意食既黃金蝦，八點正，一家人開開心心咁坐埋一齊食飯。
我：「爸，食多隻，阿媽特登為你煮架。」
阿爸：「一隻夠喇，我冇乜胃口，個肚成日頂住頂住咁。」
Yoyo：「阿爸你呢兩晚仲有冇痛呀？」
阿媽：「冇喇，你地四姑姐帶左佢去旺角睇個中醫，食完果幾包中藥又好似精神唔錯咁。」
可勇：「係呀阿哥，今日我用你電腦果時，有人搵你，話打唔到電話比你，你一陣睇返。」
我：「係喎，我批貨聽日就到，我都唔記得左。」
Yoyo：「呢兩個星期金價都跌喎，阿哥你果批貨要睇緊小小。」
我：「妳又知我批貨係啲爛銅爛鐵黎既？」
Yoyo：「你有同我講丫嘛，可勇都聽到。」
可勇：「下？有咩？好似係喎。」
我：「果度小問題，就算跌都影響唔大。」
阿爸：「可正呀，你平時有正經嘢做就唔使成日返黎架喇，事業要緊呀，有乜嘢就記住親力親為..」
「唔好得失班客丫嘛，阿爸我知架喇。」
阿爸：「你知就最好啦。」
食完飯，我陪阿爸傾多一陣計就走左，返到屋企，諗起頭先阿爸叮囑我既事，我先有心情，留意下個金價跌左幾多。
原因係世界上所有金屬既價格都係有關連，無論你係打造手飾既黃金，又或者係已經成為垃圾既爛銅鐵，只要國際金價有升跌，佢地都會跟蹤個比率作出升跌。
我認真一望，先知原來金價跌左好多，雖然我覺得只不過係黃金大牛市既回吐調整，但始終，我呢一批貨呢一刻已經要蝕錢。
第二日我去到元朗一個車場收貨，計一計數，因為金價既跌幅，呢一批貨我總共損失左十八萬。
十八萬，對現階段既我唔算係一個小數目，不過反正我覺得金價只係暫時回落，呢批貨唯有搵個地方收好佢，等個價升返先再賣返大陸。
夜晚，返到舊屋之後，Yoyo拉左我埋一邊，細細聲咁同我講：
「阿哥呀，今日我聽到阿媽喺廚房自己同自己講嘢。」
我：「自己同自己？講緊電話咋下？」
Yoyo：「唔係呀，我睇得好清楚，佢一路切雞一路細細聲同自己講嘢。」
我：「咁阿媽講咩？」
Yoyo：「我又唔係聽得好清楚，係聽到小小，話冇啦，冇啦，我點算呀之類。」
「妳肯定冇聽錯？」我猶豫左一陣，開始有小小擔心。
Yoyo：「我唔肯定點會拎呢啲嘢亂講呀。」
阿哥：「我會叫可勇睇實啲阿媽，妳自己都係呀，BB就生得唔好周圍走呀。」
Yoyo：「我知架喇，仲有阿哥，我呢個月出多左佣，你今個月唔使比錢阿媽同阿爸，我同可勇會搞掂架喇。」
阿哥：「做咩無端端會講到錢呢個問題？」
Yoyo：「咁你而家搞生意丫嘛，留多個錢旁身，點都好小小啦。」
阿哥：「阿爸阿媽我都有份架，我得喎，BB就出世妳地好多嘢要買，我問妳夠唔夠錢用呀？」
Yoyo：「夠呀，哥，以娜姐真係冇搵你呀？」
我：「冇，電話打極都唔通，我諗應該冇用果個號碼。」
Yoyo：「如果你搵到以娜姐，你會點做？」
我唔知點解Yoyo會突然問我呢個問題，因為呢個問題我自己都問左自己好耐，如果有一日我打電話比以娜，佢接電話之後，我應該第一句同佢講既係乜嘢，,我諗左好耐，最後，都係諗唔到。
「而家阿爸咁，我仲可以講咩？都未知以信情況點，唔通叫佢為左我返香港咩？」
一個月後，Yoyo同可勇既BB終於出世，係BB仔黎，阿爸阿媽都好開心，第二日，阿媽已經急不及待咁要我陪佢去醫院探Yoyo。
阿媽：「Yoyo呀，我帶左薑飯黎呀，妳記得食哂佢呀，驅風呀，我生妳老公果時都係一日三餐食佢架咋。」
Yoyo：「多謝阿媽，妳地睇左BB未？」
我：「未呀，似邊個呀？」
Yoyo：「你細佬話似佢，我就話似我多啲，係呢，阿爸呢？」
阿媽：「你阿爸又去左飲茶囉，今朝一早又話要買左報紙先，我唔理佢自己出左黎。」
我：「媽….阿爸都冇出黎，佢而家喺屋企呀。」
阿媽：「係咩…唉，老喇，成日唔記得嘢，我去洗個生果先。」
講完，阿媽就拎左包蘋果行入廁所，可勇行埋我身邊，向我打左個眼色，
「阿媽呢一個月總係記住老豆未有病之前果個樣，早兩日仲唔記得比藥阿爸食，我覺得阿媽應該係壓力太大，我要帶佢睇醫生。」可勇好細聲咁向我講
我：「阿爸而家身體咁差，如果比佢知道阿媽都有事，我怕會再影響到佢身體。」
可勇：「係喎，你地出左黎，邊個照顧阿爸？」
我：「四姑姐去左睇住阿爸，我已經同四姑姐講左阿媽情況，佢應承我隔日就會過去幫阿媽手。」
「係呀可勇呀，去邊度睇BB呀？」阿媽呢個時間走出黎，
可勇：「一陣姑娘會抱佢返黎，頭先去左檢查之嘛。」
阿媽：「你地打算改乜嘢名？」
Yoyo：「我冇諗呀，可勇話問過阿爸意見先。」
阿媽：「阿爸話叫天佑喎，妳地話好唔好？」
可勇：「天佑，幾好丫，天都保佑喎。」
Yoyo：「好呀，就叫天佑啦，薛天佑，薛天佑，都幾順口呀。」
阿媽：「咁我同阿爸講妳地用佢改呢個名架喇。」
「好呀。」
大家傾得興高采烈既同時，我行出病房，又再打多一次長途電話比以娜，當然，已經係唔記得左幾多次既失望。
呢一個月，每逢我有心事又或者係乜嘢消息，我都會嘗試打電話比以娜，可惜既係，每一次，我都係失望而回，冇辦法想我想講既事，向以娜細訴。
Yoyo出院，我同可勇之前已經一早將我原來既房佈置成BB房，當可勇抱住天佑行入屋企既一刻，阿爸已經好心急咁由房入面行出黎望下個孫仔。
「比阿爺睇下，唉呀，似我地薛家，有個高鼻樑，第時一定係靚仔黎既。」呢個時候既阿爸，唔知點解，把聲已經開始變沙。
阿媽：「似阿媽都係靚啦，比我抱下。」
可勇：「老婆呀，入房休息先啦妳。」
Yoyo：「嗯，咦等等，我有電話響，我個手袋呢？」
阿勇：「阿哥頭先幫妳拎住丫嘛。」
「係呀，我拎住，我幫妳拎出黎丫。」我作勢想幫Yoyo由手袋拎個電話出黎，唔知點解佢好緊張咁走埋黎拎左個手袋走。
「可能係公事呀，阿哥我自己聽得喇。」Yoyo好尷尬咁望住我講，然後拎個電話出黎「喂，係呀，我啱啱返到屋企，好我入房先講。」
我：「Yoyo啱啱生完就咁搏命？」
可勇：「係囉，可能忙掛。」
果晚，我地一家人食左一餐好開心既飯，我地由一家四口，變成一家五口，再去到而家一家六口，最後，我地由全家人，排排坐，影左一張全家福。
呢一張，亦都係我同阿爸影既最後一張相。
果一個星期因為天佑既出現，令我地都覺得好開心，阿爸既情況比預期穩定，朝早仲可以拎住拐杖由阿媽陪住佢自己慢慢行去餐廳食早餐。
可惜既係，一個星期之後，可勇帶左阿媽去睇心理醫生，最後醫生診斷到阿媽因為壓力太大，而患左輕微既抑鬱症。
返到屋企之前，可勇約左我去餐廳商量一下點樣隱瞞阿爸。
阿媽：「其實我平時係冇咩事，你地兩兄弟唔使太擔心，我應承你地唔亂諗嘢啦好冇？」
可勇：「媽，妳擔心阿爸係應該架，我只係想同阿哥商量下點幫妳收埋妳既藥，唔好令阿爸太擔心。」
阿媽：「我唔食啲藥住，你地搵地方收好佢咪得囉。」
我：「點可以唔食架，你而家有事就一定要食，一係咁啦，叫Yoyo幫阿媽收好佢，就算阿爸睇到，到時就話係Yoyo既藥咪得囉。」
可勇：「咁都好。」
阿媽：「講開Yoyo，可正你又話搵唔到以娜既？點解前日我聽到Yoyo同以娜傾電話架，佢冇話比你知架咩？」
「Yoyo同以娜有通電話？」面對阿媽突然間向我透露既消息，我有小小摸不著頭腦。
阿媽：「係呀，Yoyo仲猛咁講天佑既事。」
呢個時候，可勇用隻腳踢一踢我，然後向我打個眼色。
可勇：「阿媽，妳聽錯喇，果個係Yoyo同事黎架。」
阿媽：「我邊有聽錯，Yoyo仲話你阿哥公司呢排生意一般。」
可勇：「都話妳聽錯，好喇，埋單返去喇。」
阿媽：「你地去，我去個廁所先。」
阿媽離開座位，自己一個行左向廁所方向。
我：「阿媽個病唔可以拖，可勇你記得叫Yoyo提住阿媽食藥時間。」
行出餐廳，我收到Gini既電話，
Gini：「薛可正，最近點呀？」
我：「幾好丫，妳個金市又點呀？」
Gini：「冇左你陪我做單邊有咁順利丫。」
我：「講笑啦妳。」
Gini：「喂，有個人想搵你傾計。」
我：「邊個呀？」
「喂，可正。」電話筒突然傳黎一把好親切好熟悉既聲音，係德叔！
我：「德叔，你幾時返左黎架？」
德叔：「我呀？返左幾日啦，打比你首先想知第一件事，來哥身體點呀？」
我：「阿爸身體一般，而家可以做既都做哂，要等阿爸自己慢慢調養好。」
德叔：「我聽日想去你地屋企果度探探來哥，你幫我約一約阿爸有冇問題？」
我：「冇，一定冇問題啦，可勇做左人老豆喇，你可以上黎見埋阿爸個孫仔。」
德叔：「好呀，咁你覆返我啦。」
收到德叔既電話，我整個人心情都好左好多，聽電話入面德叔把聲同輕鬆既語氣，佢大陸生意上既麻煩應該都解決得七七八八。
返到屋企，我第一件事就同阿爸講德叔返左香港，仲話佢知德叔聽日會上屋企探佢，點知阿爸好大反應，好決絕咁同我講：
「唔好，你唔好叫阿德上黎，我唔使人睇，知唔知？」
「阿爸做咩呀？你唔舒服呀？」見到阿爸既反應，我有一種好不祥既感覺。
阿爸：「冇唔舒服，總之唔好成日叫人黎探我，我未死！」
阿媽：「個仔都唔係咁既意思，咁阿德咁耐冇見你，想黎探下你都好正常，你做乜鬧個仔？」
我：「算啦媽，阿爸，你唔鐘意我叫德叔唔好黎，你唔好勞氣喇。」
阿爸：「我冇勞氣，係你地成日搵嘢比我煩。」
講完，阿爸就行左入天佑既房，我地幾個大家你眼望我眼，都為阿爸過大既反應而奇怪。
阿媽：「你阿爸呢幾日脾氣差左好多，都唔知點解會咁？」
可勇：「冇事既，可能係比啲藥影響到情緒。」
食完飯，返屋企果時，我打電話比德叔，同佢講，阿爸唔係太舒服，所以唔想德叔去探佢住。
德叔：「可正，到底阿爸而家係唔係好嚴重？」
德叔開門見山既問題，令我猶豫，阿爸從來都唔想示弱喺任何人既面前，如果我照實咁講，我知道德叔一定會即刻黎探阿爸，咁樣只會令阿爸更唔開心。但反之，德叔同阿爸咁多感情，如果我唔向德叔講出真相，又好似漠視左佢地之間既友誼，一時間，我都唔知可以點去抉擇。
德叔：「一係咁啦可正，我聽日會返多次大陸，一個星期後呢，我就會返香港，你就喺呢一個星期幫我勸下阿爸，比德叔同佢見個面，食個飯好冇？」
「好，德叔。」面對德叔卑躬屈膝既要求，我只可以盡力而為。
第二日，德叔上大陸之前再比多一次電話我，提醒我記得勸服阿爸。
可惜，德叔呢一走，以後，佢都再見唔到阿爸。
當晚半夜，我收到可勇既電話，阿爸個肚又再劇痛，佢地而家已經報左警叫左救護車，而我，亦都即時換衫趕去屯門醫院。
趕到屯門醫院，醫生幫阿爸打左止痛針，詳細檢查之後，醫生向我地講出一個非常、非常、非常壞既消息。
「你地要有心理準備，病人既情況黎睇，已經捱唔到幾多日。」
阿媽聽到呢個消息，成個人即時暈一暈，可勇扶住佢，走到另外一邊既休息室，而Yoyo就叫我抱住天佑，由手袋入面拎左個電話出黎。
「阿哥，快啲打比以娜姐，佢話過如果阿爸有事，佢會趕返黎架！」