男人唔可以窮: 13
「點解妳會有以娜電話？阿媽上次同我講既嘢係真既？」
「唔好理住啦哥，你快啲打。」講完，Yoyo就抱住天佑，行左去休息室果邊既方向。
我望住Yoyo電話入面果個長途電話號碼，係一個我唔認識既號碼，我猶豫，到底我應唔應該打呢個電話。
最後我都係選擇試一次。
電話打出，等待對方接聽果十幾秒，我覺得漫長又難過，每一秒都好似一個獨立既時間咁，終於…
「喂，Yoyo姐，香港而家半夜喎，做咩呀？天佑又叫醒妳呀？」電話筒傳黎既我最熟悉既聲音，佢，真係以娜。
我：「以娜…係我。」
以娜：「點解？Yoyo個衰婆…咪住，薛可正，來叔叔點呀？」
「阿爸啱啱又入左醫院，醫生話…情況唔樂觀…」我已經唔知可以點講落去。
「我知道喇，薛可正，記得照顧好阿姨，我有事做，我唔講喇，拜拜。」
「以娜…」我想再叫以娜，但電話已經收左線。
我唔明白以娜既用意，我只不過係想問清楚佢以信而家既情況。我拎住電話，慢慢走返去休息間既一邊，睇下阿媽情況。
Yoyo：「阿哥，以娜姐點呀？」
我：「阿媽點呀？」
阿媽：「我冇事我冇事，一陣快啲入去睇下你地阿爸。」
可勇：「阿哥對唔住，上次阿媽講以娜姐件事，係我瞞住你。」
我：「點解會咁？你地一直有同以娜聯絡？」
Yoyo：「係，阿哥，以娜走之前有搵我，以信既事佢要走得好急，但佢都好想陪住阿爸，所以…返到英國佢就打比我，一直都有問你同阿爸既情況。？
我：「唔怪得上次阿爸入醫院，我半夜收到以娜訊息，仲有我買果批貨既事，都係以娜叫妳提我？」
Yoyo：「係…」
我：「點解佢成日都要咁神秘，有乜嘢唔可以自己問我同我講咩？」
Yoyo：「阿哥，你到而家都唔知以娜姐點解要咁做咩？」
我：「我都好想知，點解佢走之前唔比我搵到，返左英國又唔聽我電話，但偏偏就要一直問妳我同阿爸既情況，佢到底想點？」
Yoyo：「呢一段時間，以娜姐差唔多隔日就同我傾計，以信既情況已經穩定左好多。佢同我講，佢地全家人而家去左英國重新開始，大家開始一齊搵屋，各自搵工作，因為以信由以娜姐媽咪照顧返，所以所有照顧以信既配套佢地都要重新安排，
佢成日同我講好想返香港睇阿爸，但佢自己屋企既事都要兼顧，佢點可能放低自己屋企人，黎陪你既屋企人呀，阿哥？」
我：「但都唔使唔聽我電話！」
Yoyo：「以娜姐話佢同你講要走果刻，你都只係仲記住要佢比個返香港既時間你，但佢根本就唔知自己跟住會點，以信會點？全家人去到英國會點？佢隨便比一個時間你到底有乜嘢意義？
哥，到底你愛自己多啲定係以娜姐多啲？」
可勇：「老婆，唔好咁同阿哥講嘢。」
「唔緊要，Yoyo講既嘢冇錯。」我擺擺手，示意Yoyo繼續講。
Yoyo：「哥，我唔係想多管閒事，但以大家都係一個女人黎睇，以娜姐已經做哂佢可以做既事，但偏偏你永遠都係見唔到佢既時間你先會去學識欣賞，大家都浪費大家既時間。
以娜姐講過，如果阿爸真係發生乜嘢事，佢一定會返多香港一次，阿哥呀，如果你真係鐘意以娜姐，你今次就一定要留住佢呀。」
講完，Yoyo既眼淚令我明白，無論我話過點樣改過都好，我都係一直傷害緊以娜，又或者係，我地之間既感情。
「我知道架喇，我行入去睇下可以探阿爸未。」
「可正。」突然，阿媽拉住我隻手。
「點呀媽，妳好啲未？」我摸摸阿媽既頭。
「可勇，你都過黎。」
可勇：「點呀媽？」
阿媽：「頭先，你地阿爸好痛果時，一直叫我救佢，我知道你地阿爸差唔多時間架喇，黎緊如果見到任何情況，你地記得唔好太傷心，如果阿爸真係要走，我地一家人，就用最開心既一面，比佢望住我地離開，Yoyo，妳抱住天佑就唔好行入去喇，知嘛？」
「知道喇媽。」
太約一個鐘頭後，醫院終於比我地見阿爸，我同可勇做足心理準備，然後掀起分隔每個病位既白布，見到既，竟然係阿爸好精神咁坐左喺度向我地微笑。
阿爸既狀態係我同可勇意料之外，佢精神既程度令我地有啲不安，同阿媽頭先所講既完全係兩個樣。
我：「爸，你點呀？」
阿爸：「好啲啦，好啲啦。」
可勇：「真係一啲都唔痛喇？」
阿爸：「哈哈，係喎，唔知點解又會唔痛，你地都黎哂呀？咁天佑仔呢？」
可勇：「Yoyo抱住佢喺佢出面。」
阿爸：「係呀，呢度入面多細菌，唔好抱佢入黎，叫佢地返屋企先啦，我冇事呀。」
我：「得架喇，知架喇阿爸。」
最後，因為太夜關係，可勇先送Yoyo同天佑返屋企，而我同阿媽就繼續陪住阿爸。
因為之前以為阿爸既情況轉壞，阿媽已經聯絡左整個家族既親戚，慢慢，幾個姑姐同阿叔都陸續黎到醫院。
最擔心阿爸既，係四姑姐。
其實本來佢地兄弟姊妹之間既感情長大後已經變得唔算太好，但因為阿爸有癌症既事，四姑姐成日會陪佢去睇中醫，令到佢地兩兄妹喺阿爸最後呢段既時間入面，感情增進左好多。
我成日都會諗，點解我地要等一樣嘢就快消失，我地先會將佢捧喺手心入面當寶？
呢個劣根性，擁有者包括我在內。
因為阿爸係排第二，於是乎整晚所有親人都不斷出出入入阿爸既病床位置，個個都二哥前二哥後咁圍住阿爸。大姑姐同阿爸傾返細個既趣事，二姑姐就鬧阿爸成日都飲奶茶，三姑姐係基督徒，呢段小小時間，我見到佢用佢最大既心機去令阿爸既心情安穩，而四姑姐就一齊默默咁坐喺阿爸隔離。
一切都好似又回復正常，直到一個鐘頭後…
一個鐘頭後，阿爸突然成個人變得好平靜，每個人向佢講嘢，佢都唔會即時答我地，有時又好似聽唔到我地講嘢咁。
我：「阿爸，你冇事嘛？」
阿爸冇答我，只係指一指個鼻上面方便佢呼吸果條管。
我：「做乜呀？壞左呀？」
阿爸：「吸唔到…」
我：「我叫姑娘幫你睇下。」
阿爸：「哦。」
姑娘黎到，好快咁檢查完阿爸果條吸氣管。
姑娘：「冇事噃，伯伯係試下大力小小吸。」
講到呢度同大家分享一件小事，由細到大，我只係聽過人叫阿爸做叔叔，因為阿爸只係五十幾歲，外表亦都唔係太老，所以每個小朋友都係叫佢叔叔。
呢個轉變，由阿爸第一次入醫院做手術開始，我仲好記得，阿爸入手術室前果一刻，有個姑娘只係好輕鬆咁行過阿爸身邊，然後講左句：
「伯伯呀，唔好整甩件衫呀，再整好麻煩架。」
我聽到呢句，唔知點解成個人突然間腎上腺急升，好快咁向果位姑娘講左句：
「咩伯伯呀？我阿爸五十幾歲架咋。」
講完，我都覺得自己有小小古怪，其實阿爸幾多歲，又或者，個姑娘稱呼佢做乜嘢，又有乜嘢咁重要？
喺果一刻，我知道，原來我真係好怕成長，好怕見到雙親慢慢老去既樣。
好怕，佢地離開我既一剎那。
講返阿爸果條吸氣既膠管，姑娘整完之後，阿爸都好似未係好滿意，呢個時候，我發覺阿爸既動靜愈黎愈似一個小朋友。
佢好似撒嬌咁向我同阿媽講：「未得喎，可正你睇下，仲未得喎。」
我：「得架喇阿爸，乖啦唔好搞佢。」
阿爸開始變到有小小神智不清，佢開始扯走身上面既喉，當中包括一條吊鹽水既針喉。
果條插住阿爸手背既針喉一扯走，阿爸隻手就即時流血，阿媽好緊張咁叫姑娘黎，但姑娘黎到只係再插返落阿爸手既同一位置就走左。
如是者來來回回，阿爸不斷掙扎，不斷想拎走身上面既喉，佢比我既感覺係煩躁，仲有不安。
其他親人都因為太夜而走左，呢個時候，只係得返我同阿媽喺阿爸隔離。我不斷咁制止阿爸，而阿媽亦都喺旁邊安慰佢，但阿爸好似同我地係兩個世界咁，完全唔肯聽我地講既說話，只係不斷咁想離開張床。
最後我逼於無奈，用力咁捉住阿爸隻手。
「啪！」阿爸突然一巴打落我度，我當時成個人呆左，完全唔知應該係做乜嘢反應。
「你係邊個呀？做乜嘢捉住我？」
「唉呀爸爸你做乜呀？可正你出去先。」阿媽一邊拉開我，一邊制止阿爸。
「同我叫可正黎，仲有可勇呢？以娜呢？天佑仔呢？」望見阿爸不斷既語無倫次，我個心真係非常非常之痛，點解一個正常既人，會比病魔折磨到咁樣？
我走出病房，見到一個當值既護士，我忍唔住問佢點解阿爸會呢個情況？
「其實你爸爸呢個情況已經係好唔樂觀，你應該要有心理準備。」
我深呼吸，主觀叫我唔可以相信呢位護士講既嘢，但客觀底下，我知道而家發生緊既係乜嘢事。
我：「姑娘，我想妳好坦白話我知，妳既意思係咪即係話，我爸爸好快就會死？」
「以我所見過既…」
我：「？」
「嗯。」姑娘點點頭，之後拍一拍我，就離開左。
果晚，阿爸就係咁，不斷掙扎、不斷大叫既情況下，渡過左佢喺醫院既第一晚。
一直去到天光，阿爸先因為太疲累而訓著，我同阿媽先可以鬆一口氣。
我坐喺度，望住阿媽幫阿爸洗面，我先記得，由禽晚阿爸神智不清開始，阿媽就已經冇再喊過。
我行埋去阿媽身邊，輕輕咁攬住佢，呢一樣已經係我唯一可以比到阿媽既安慰。
我：「媽，妳食左藥未呀？」
阿媽：「我唔使，食左藥我會好眼訓，就照顧唔到你阿爸。」
「媽，如果妳想喊出黎就喊，我知道妳辛苦。」
「我地咪話過要比阿爸見我地最開心既一面架咩？阿媽冇事，你唔使怕。」阿媽全神灌注咁望住阿爸，
呢個時候，可勇打電話比我。
可勇：「哥，阿爸點？」
我：「愈黎愈差，可勇，Yoyo呢？」
可勇：「佢訓左冇幾耐，咩事呀哥？」
「妳叫Yoyo再打比以娜，同以娜講，阿爸就快唔得，問佢可唔可以返黎見下阿爸。」
可勇：「阿哥，我會同Yoyo講，你等我，我而家黎醫院。」
「嗯。」
半個鐘之後，可勇黎到醫院，我想陪阿媽返屋企換件衫，沖個涼，但係阿媽點都係唔肯。
無可奈何，我只可以自己一個返我自己屋企，返到去，望住一間空無一人既屋，諗起阿爸既病情，諗起阿媽同可勇既疲態，諗起，我由細到大都引以為榮既家將會改變，一個永永遠遠無法修補既改變。
雖然全晚都要照顧阿爸，但唔知點解呢一刻我完全冇睡意，我開左電腦，走上OpenDiary留低左一篇我當時心情既日記，然後沖左個涼，跟住就坐左喺梳化，一路咁發呆。
發呆既原因好特別。
係我竟然唔敢再去醫院，
呢種事喺我身上已經唔係第一次發生，
某一年既年三十晚，爺爺重病在身，一直都係處於彌留狀態。果晚，我當晚凌晨收工，返到屋企已經係半夜三點，當我準備休息既時候，電話突然響起，另一邊既消息傳黎，阿爺已經差唔多要斷氣…
當時我放低電話，然後坐喺床邊，望住阿爸同阿媽換衫著鞋，然後阿爸問我點解仲唔起身？
「我啱啱收工，我唔想去。」
阿爸冇理我，同阿媽即時趕去醫院，十分鐘後，大姑姐打電話比我，火力全開咁狂鬧我點解唔去，我唔識答佢，只係拎住個電話，不停不停流眼淚。
唔去既原因，係我可以準備一個點樣既心情，去迎接我將要永永遠遠失去一個至親既事實？
永遠要失去一樣嘢既感覺，真係太可怕，可怕到我係完全冇能力去招架。
去到今日，我再一次行入醫院見返阿爸果時，佢既情況會差到邊一個程度？佢會唔會認得返我？又或者係永遠唔會醒？
我完全唔敢諗，我完全唔敢去面對，只係希望時間停喺呢一刻，起碼我仲可以擁有一個爸爸。
可惜，蒼天倘能盡人意，山作黃金海作田。
一個鐘頭後，可勇比電話我：
「阿哥，要返醫院，醫生有事要同我地商量。」
聽到呢個電話，我已經冇嘢可以考慮，拎起外套就走出門口，坐車途中，我再打多一次電話比Yoyo。
「Yoyo，妳有冇打比以娜？搵到佢嘛？可勇叫我返醫院，我唔知阿爸發生咩事。」
Yoyo：「阿哥我打左，以娜姐話佢已經訂緊機票，會盡快返黎。」
我：「哦，係呀，妳同天佑點呀？」
Yoyo：「佢成晚都唔肯訓，抱緊都係喊，啱啱先停左一陣。」
我：「妳自己記得照顧好自己，呢幾日我同可勇都可能留喺醫院。」
Yoyo：「哥你放心啦，我自己搞掂，你去睇阿爸啦。」
「嗯。」
趕到醫院，未入到病房我已經聽到阿爸大叫，好微弱，但係好聲嘶力竭咁大叫：
「唔好縛住我呀，可勇，同我解左佢。」
我跑到床邊，發覺阿爸成隻手都係血跡，兩隻眼既眼神係好散渙，就好似搵唔到焦點咁。
「阿爸，我係可正，你唔好亂郁啦。」
阿爸：「唔好縛住我呀，可正！解左佢。」
「阿媽你睇住阿爸先，阿哥我同你出去。」可勇拍拍我，將我拉到病房外面。
「阿爸點解會咁？」
可勇：「你走左之後，阿爸已經自己拆走身上既喉好多次，個肚一路痛，就一路大叫，醫生搵過我同阿媽，佢話阿爸而家既狀態係好痛，已經痛到失哂常性，如果我地唔想阿爸受太多苦，佢地可以幫阿爸由背脊打一支針，阿爸就會慢慢訓著…」
我：「跟住呢？」
可勇：「跟住…直到阿爸…」
我：「直到阿爸離開？」
可勇點點頭，望住我，想由我去比一個決定佢。
「阿哥，我真係決定唔到呀哥。」可勇突然攬住我，好似一個細路仔咁喺醫院病房外面好大聲咁喊。
「只要我點一點頭，我就永遠見唔到阿爸，阿哥，我唔敢決定，但阿爸好辛苦，阿爸好辛苦呀哥！」
「你想我決定？我可以點決定？」
「哥。」可勇攬住我，我知道如果要逼可勇去做呢個決定，佢一定支持唔到。
我係薛家長子，阿爸既事，應該由我去決定，我安頓可勇坐低，然後行返入病房。
呢個時間阿爸已經安靜左，阿媽依舊都係唔出聲，一路好細心咁幫阿爸清理手上面不斷滲出黎既血點。
「媽。」
「可正，你陪下阿爸，阿媽出去一陣。」講完，阿媽就起左身，整個人既氣息係非常、非常咁平靜。
我坐低，摸摸阿爸既頭髮，阿爸轉個頭望住我，佢好似花左好多力氣先可以認得出我。
「我係可正。」我提醒阿爸，因為我已經唔想再聽到佢問我係邊個。
「可正。」
「點呀爸？」
「我係咪會死？」
「點會？你唔會死。」
「如果我會死，可正，你可唔可以比我快啲死？」
聽見出自自己父親口中既呢一句，再堅強再有心理準備既我都完全唔可以招架，腦袋空白一片咁，只係不停用手安撫阿爸既同事，口入面，不斷重覆一句冇意義既說話
「唔會架，傻啦，唔會架。」
我重來冇諗過我既一生當中會遇上呢種情況。
曾經有一位遠房親戚，九十三歲時某一日，三餐之後自己上床休息，睡夢當中悄然離世，年少既我聽到阿媽向阿爸講：
「呢種就真係叫好死喇，幾生修業呀。」
當時我只係覺得死就係死，死左既人就係好慘，點解會有好死呢樣嘢存在？
而家，終於明白。
阿媽返黎，拍一拍自己既肚，就吩咐我同可勇去買飯比佢。
我：「媽，妳一個人得架喇？」
阿媽：「有咩唔得？」
「咁阿爸有任何情況妳記住打電話比我地。」
「好，你地都食小小嘢先。」
經阿媽一提，我先醒起由阿爸入醫院到而家我近乎冇食過嘢，跟住我就陪可勇一齊去醫院既餐廳食飯。
預期係叫食飯，不如就當係我地一個精神休息既好時間，我只係食左一份三文治，,而可勇，就只係飲左杯熱茶。
突然，可勇拎左部電話出黎，拎左幾張天佑既相比我睇。
可勇：「哥，你睇下天佑，幾似阿爸。」
我：「做左人阿爸，而家先知自己個阿爸好呀？」
可勇：「係…我望住天佑，幻想佢第時既路，雖然佢而家只係好細個，但係我已經好擔心佢既將來，跟住我又諗，唔知我同你細個果時，阿爸阿媽，係咪都係咁樣為我地擔心？」
我：「你知唔知坐監果段時間，佢地瘦左幾多？」
可勇：「我知，偏偏我知錯既時候，阿爸就變到而家咁。」
我無言，因為我都同可勇有同一樣既感覺。
三十分鐘後，我地返到病床，見到一班姑娘已經幫阿爸整理好被舖。
阿爸訓著左，而阿媽就靜靜咁企喺佢隔離，一句說話都冇出。
「媽，阿爸訓左？」
「唔係，醫生已經幫佢打左支針。」
「媽。」我同可勇有小小驚訝咁望住阿媽，但阿媽依然保持住同一個表情。
「我係佢老婆，呢個決定，應該由我去做。」
呢一刻，我地一家四口，喺同一個地方，因為唔同既處境，都有唔同既心情。
「你地阿爸，早幾晚同我講對唔住。」阿媽慢慢咁坐低，好似想向我地靜靜咁講一個故事。
可勇：「點解？」
阿媽：「原來人之將死，真係會其言也善，阿爸話對我唔住，自從十幾年前佢出事之後，就成日對我冷言冷語，冇理我感受，果晚，佢不斷向我講對唔住。」
然後，我地就靜左落黎，大家一直咁望住阿爸一起一伏既呼叫，喺度等一個唔知幾時會發生既結果。
時間到中午，一班親人又陸續咁黎到醫院，望見已經再冇動靜既阿爸，全部人都意會將會發生既事，每個人都開始顯得好悲傷，喺走廊外面圍成一圈，特別係幾個姑姐，為左唔會令氣氛太傷感，佢地都故意將阿爸細個時候既趣事向我地分享。
但估唔到，阿爸呢個狀態，足足維持左兩日兩夜。
呢三日三夜，我地一家三口一路留喺醫院，極其量都只係返屋企沖一個涼，換一件衫，然後就盡快趕返醫院。
親戚們都返工既返工，讀書既讀書，始終每個人都有佢既正常生活。
阿爸已經轉左入一間獨立既病房，醫院既訊號已經好清晰，儘管呢個安排令人好沮喪。
一切一切，都係令人有好恐怖既感覺。
阿媽見到阿爸呢個情況，開始有喃喃自語既表現，佢拖住阿爸隻手，細細聲，咁喺阿爸耳邊講：
「阿來，如果太辛苦，你就安心走，屋企我會同兩個仔打理好，唔使擔心我地，你唔好再受太多苦，安心走啦好嘛？」
阿媽就係咁不斷向阿爸講類似既說話，然後幾位姑姐黎到，又好似阿媽咁叫阿爸如果太辛苦既就唔好太多牽掛，安安心心咁去佢需要去既地方。
可勇見到呢個情況，最後終於忍唔住，向佢地講：
「點解妳地要叫阿爸走？如果阿爸可以選擇唔走，係因為佢想陪多我地一段時間，我地一班人不斷咁叫佢走，一走左，就以後都唔會再見，妳地覺得阿爸會走得開心咩？」
一眾人語塞，但呢個時候，我發現，阿爸既眼角，竟然有一滴眼淚，慢慢，慢慢咁滲出黎。
「媽，妳望下。」我指住阿爸，指住阿爸眼角既果滴眼淚。
阿勇：「妳地唔好再叫喇好嘛？」
「阿來，對唔住。」阿媽依舊既一個表情，依舊既一個動作，去幫阿爸清潔面容。
「可勇，出去抖下氣先。」我安慰可勇，其實大家都知道大家都冇錯，只係呢種情況根本冇人可以正確咁做出應該做既事。
我將可勇拉到醫院地下大門外面，希望佢可以食支煙，提提神，再去繼續陪阿爸走餘下既路。
加上，我有另外一件事想問佢。
「可勇，Yoyo有冇打比以娜？」
可勇：「有，但禽日開始個電話就閂左。」
我：「閂左…哦。」
可勇：「以娜姐會返黎。」
我：「我呢幾日一路諗，阿爸仲有邊一個人想見，可能係天佑，可能係德叔，又可能係以娜，我唔想阿爸帶住遺憾咁走。」
可勇：「天佑又咁細，醫院都唔比入，唔知可以點。」
我：「或者你可以試下叫Yoyo整喊天佑，等阿爸喺電話入面可以聽下天佑把聲。」
可勇：「咦？點解我諗唔到？哥我上去先。」
我：「好，你快啲上去比阿爸聽。」
可勇走左之後，我一個人企喺大門外面。
我係幾咁希望，呢個時候可以見到妳既出現。
半個鐘之後，我返上病房，見到可勇拎住個電話放去阿爸既耳仔旁邊：
「老婆，他整到天佑喊大聲啲。」
天佑既喊聲愈黎愈大，大到我距離可勇幾個身位都可以清楚聽到，阿爸聽到天佑喊聲之後，對眼既微弱眨動次數係明顯多左，兩邊既眼角都可以見到有眼淚不斷打圈。
可勇：「阿爸有反應，阿爸有反應。」
「咇。」突然…心跳機突然有反應，阿爸昏睡期間一直保持住既每分鐘七十五至八十下心跳，突然間一降就去到四十五。
「爸。」可勇大叫，突如其來既轉變令可勇手忙腳亂。
「咁即係點？」我問左一個問題，但當然唔會有人答我，阿媽依舊冇反應，只係用手捉住阿爸既右手，捉得愈黎愈緊。
我跑出病房，隨手拉住一個醫生：
「我阿爸部心跳機突然跌到去四十幾？咁即係會點？」
面對我既廢話，呢位醫生用安撫既態度好有耐性咁解答我
「即係話個情況係轉差左。」
我：「咁即係會唔會升返七十五或者更高？」
「可能性好微。」
我：「好微？咁即係…」
「咇。」恐怖既聲又再次響起，我立刻跑入病床，我睇住阿爸既心跳由四十五一路跌，跌到三十七…三十…二十一…八…然後…
「咇…………………………………………………………」
「阿爸！！」我同可勇同時衝埋去，但阿爸已經完全冇反應，之前一路既起伏都已經消失左。
整個人就好似突然之間冇左生命力咁，我同可勇完全接受唔到…我已經唔記得當時我有講過乜嘢說話，只係記得自己好似失控咁不停大叫阿爸起身，可惜，佢已經聽唔到。
阿爸，終於死左。
薛天來，終年五十八歲。