男人唔可以窮: 10
聽到呢個消息，我成個人軟軟咁坐左喺地下，感覺好氣餒，阿媽攬住可勇不停咁喊，而Yoyo就不斷安慰阿媽。
「醫生，咁我地屋企而家可以有乜野做？」可勇問
醫生：「再繼續做化療，或者你地屋企商量完又贊成既話可以再開多次刀，但今次個位置已經唔同左，同埋腫瘤既面積大左好多，呢次應該要由背脊果邊開刀。」
開多一刀？呢一樣係我非常唔願意再見到既事，上一次阿爸做手術之後果個情景我仲未可以忘記，但如果唔開刀，只係再用化療，阿爸仲有冇機會復康？
醫生唔會直接同任何病人家屬講邊一個方法一定可行，邊一個方法係冇用，佢地永遠都只會用機會率黎模糊我地既焦點，加上阿爸而家住既係私家醫院，佢地只會想你做更多既檢查，永遠唔會比到病人家屬一個佢地想要既安慰。
但我由呢位已經認識左大半年既醫生口中語氣感覺到，阿爸既情況係已經差唔多冇哂辦法，可以做既都已經唔多。
阿勇：「媽，不如幫阿爸做多次手術。」
阿媽：「我唔知呀，我好亂呀可勇。」
我：「醫生話阿爸個腫瘤有某部份係收埋左一大堆腸入面，開刀只不過係切走外面果一部份，實際上….問題仲喺在。」
可勇：「咁唔通唔理阿爸咩？」
「可勇，唔係唔理，係大家一齊再商量一個好啲既方法，唔使阿爸郁下就開刀，咁樣佢仲辛苦。」今次，係我兩個月冇見可勇之後，第一次心平靜和同佢講嘢，我真係唔想阿爸有事，仲見到我地兩兄弟鬧交。
最後，我地決定唔開刀，然後再用鏢靶治療黎幫阿爸控制病情，呢一種藥，每一個月既費用要三萬蚊，阿媽問過我有冇困難，如果有需要就好似上次既決定咁按樓，我同阿媽講唔使擔心，阿爸既醫藥費我可以應付到。
走入病房，見到阿爸已經止左痛，坐左喺床度睇報紙，佢冇問我地任何事，因為醫生已經將佢既實際情況講左比阿爸知。
今次，我係真係有絕望既感覺，人生第一次望住阿爸，有相對無語既悲嘆，我細細個成日覺我，人應該係變左老人家，先會再慢慢有病，跟住離開呢個世界。
我從來冇諗過，阿爸會提早離開我地。
當晚，可勇留喺醫院陪阿爸，而阿媽就同Yoyo返左屋企，至於我，坐左喺電腦之前，上左線，開左Msn，但已經隱左身兩個鐘頭，望住已經上線兩個鐘頭既以娜，我真係冇勇氣，
我應該點去決定？
等左兩個鐘，我始終都係冇出聲，唔敢面對以娜。
突然電話響，長途電話，係以娜。
我猶豫，但好多野始終都要面對，我始終都要接呢個電話。
以娜：「薛可正，喂？你今日好忙咩？聽晚上機喇喎，仲未搞掂哂啲嘢呀？」
我：「唔係。」
以娜：「薛可正，做乜嘢，你把聲點解會咁？係咪有事？」
「以娜，我諗，聽晚我唔可以過黎。」我諗左好耐，先可以有呢個決定。
以娜：「點解？」
於是，我向以娜講出阿爸既病情，講既過程入面，我一路留意以娜既反應，但佢一句聲都冇出。
講完，我等左幾分鐘。
以娜：「薛可正，你返到屋企上網，比你張機票我睇。」
「哦。」
本來我就已經喺電腦前面，幾分鐘後我將我已經訂好既機票喺電腦比以娜睇，睇完，佢喺電腦入面笑一笑。
以娜：「咁得喇，薛可正，你聽日唔好過黎，一路照顧來叔叔，直到佢既病好番。」
我：「以娜，妳冇嬲咩？」
以娜：「薛可正，家人係最重要，以信而家情況已經咁樣，來叔叔有事，我真係唔可以叫你咁自私黎陪我，加上我真係見到你真係有訂機票，我知道你冇呃我。」
我：「我會陪多阿爸幾日，如果情況好小小，我會改機票日子再過黎。」
以娜：「唔好，你同我講來叔叔情況已經好差，佢好需要你喺佢身邊，就好似以信需要我地屋企，我地先會考慮移民過黎英國。」
我：「多謝，以娜，我唔知講乜嘢好。」
以娜：「唔使講任何嘢，所有事都有緣份，薛可正，比起以前，你已經對我好左好多，多謝你。」
跟住，整晚傾計既氣氛已經變得好無奈，本來歡天喜地既展望，已經唔知道到幾時先可以實現。
第二日，醫生話阿爸已經可以出院，再過多個星期就返去做療程，可惜，夜晚，阿爸因為太痛，又要再入多一次醫院。
三日後，可勇決定同Yoyo結婚。
可勇結婚，完全係為左阿爸沖喜，當然，比一個名份Yoyo都係其中一個原因。
果晚，我地喺醫院商量婚禮應該要點安排，阿爸非常雀躍咁比左好多提議我地，阿媽又話要訂造旗袍做新奶奶，一家人傾得非常之開心。
可惜因為時間太倉促，可勇同阿爸講根本訂唔切酒席，所以佢地今次只係去尖沙咀中心一間婚禮公司先舉行簽字儀式，酒席再搵一個好日子補擺。
阿爸睇黎精神左好多，阿媽話阿爸佢平時冇特別問題，只係痛起上黎就完全失控，上次仲痛到咬傷左口唇，流左好多血。
呢一晚由阿媽陪阿爸過夜，我同可勇Yoyo走先。
離開病房，我同佢地兩個一齊行，Yoyo係一個聰明女，好快佢就主動打開話題：
「哥呀，我地結婚果日，你記得要著靚啲呀，你係大伯，我地都要敬茶比你架。」
我：「果啲禮堂唔係西式架咩？點解會有中式敬茶？」
Yoyo：「可勇話，想阿爸阿媽飲杯正正式式既新抱茶，個屋企開開心心高高興興咁，希望阿爸個病會快啲好。」
行入電梯，Yoyo既話題完左，我地三個都冇再對話。
到左地下，走之前，我同可勇主動咁講第一句說話：
「可勇，阿哥唔係話你冇錢，不過…如果結婚果度洗錢多既，阿哥呢度有。」
可勇望一望我，個表情古怪又嚴肅咁答我：「得架喇，我都仲有小小錢，阿爸果度已經係你比，我自己結婚我會自己搞返，唔該，我地行呢邊，走喇。」
我唔知道可勇係仲嬲緊我，定係佢真係仲有錢。早幾日，德叔同我講，早兩個月可勇做爆果一堆倉既客，而家全部比Yoyo果邊既經紀聯絡緊，德叔話呢一班客既資料唔可能同一時間比同一間公司既人聯絡，所以好大可能係可勇約資料交比Yoyo。
我冇怪可勇，更加冇怪Yoyo，喺呢一個行業入面，香港既金市要生存，你就一定要不擇手段，加上Yoyo公私一向好分明，呢兩個月就算係可勇收入唔算多，佢去左屋企住之後，每個月都會比一筆錢阿媽做家用，加上平時又會送好多禮物比阿爸阿媽，所以我覺得佢會係一個好媳婦。
我已經唔想再用某一兩件事去主觀判定其他人係錯，就好似當日我判定以娜咁。
由向以娜講我唔可以去英國果晚開始，每當我返到屋企，一有時間，我就會拎張機票出黎發呆。
本來，我可以拎住呢張機票，搭上一架夜機，開開心心咁去英國，陪以娜渡過佢一世人可能係最難捱既日子。
偏偏阿爸既病就喺呢個時間復發，令到我一步都唔可以走開。
其實阿爸入院當晚，我有打過電話比王力維，佢教我可以去改機票既時間，過去一兩日見一見以娜，之後再返香港。
我同佢講，我去英國係為左陪以娜打一場硬仗，之前本來我已經準備好所有，如果有需要，我可以留喺英國更長既時間。我要做既，係比以娜一個安穩既心情，要等佢知道，如果佢有事，我無論喺邊，都會盡我能力，第一時間去到佢身邊。
所以如果我只係去一至兩日，咁同一個觀光遊客有乜野分別？何況如果去到英國，以信病情突然有轉變，我係咪丟低以娜一個，自己按照時間表返香港？如果我唔返香港，阿爸既事我又點同家人去分擔？
最後既，係阿爸既醫藥費，三萬蚊一個月，加上其他開支，要我一定留喺公司把握德叔比我既所有機會，呢一樣已經係我當前最需要做既一樣嘢。
跟住既一個星期，阿爸出左院返屋企，亦都好快開始左化療，德叔知道阿爸既事之後，明顯咁比左好多客我跟，而佢亦少左喺公司出現。
每晚，我都會同以娜聯絡，有時係Msn，有時係長途電話，以信既病情已經好返好多，之前撞傷都已經康復，以娜已經接左佢返屋企，唯一問題係隻手仲係未太靈活。
一晚，
以娜：「薛可正，香港果邊會唔會有一種比手部有殘障又或者係缺憾既病人專用碗筷？」
我：「應該有，我要幫妳睇下。」
以娜：「好，英國呢邊好貴，全部都要訂造，貴到不得了。」
我：「咁以信而家點食飯？咪好唔方便？」
以娜：「冇辦法，要我餵佢，以信上次入醫院已經額外用多左錢，而家所以開支，要慳得就慳。」
我：「好，我幫妳盡快睇。」
第二日，我用公司既戶口，匯左一萬英磅比以娜。
日子依然係咁過，每朝我都同可勇Yoyo都會陪阿爸阿媽去飲茶，下晝就返到公司，安排好所有公事，到夜晚我就會返到屋企一邊同以娜傾計一邊做單，日子簡單，有時快樂，但大部份係遺憾。
突然幾日後，我未返到屋企，以娜就打長途電話比我。
以娜：「薛可正，你匯左一萬磅比我呀？」
我：「妳咁快知既？」
以娜：「邊個叫你比錢我？你而家仲多錢要用！拎返走。」
我：「我夠呀，呢個月份佣又多左，妳慢慢用啦。」
以娜：「唔得呀，我屋企既事我地仲應付到，我同你講我要慳，唔代表我地屋企真係冇哂錢，只係我地要為將來打算，我唔知你諗乜野，但你無緣無故匯錢過黎做乜野？」
我：「我只可以咁樣幫到你。」
以娜：「無端端塞錢比我唔係叫幫我，係比麻煩我，你拎唔拎返呀？」
我：「喂，大姐呀我點拎呀，一係妳放好佢，等妳返香港先比返我啦。」
以娜：「薛可正，下次你唔好再自把自為！你每晚陪我傾計我已經好開心，家姐呢兩日已經會過黎搵我，你搞到阿媽打比我問我點解英國戶口又會多左錢，又問我喺英國搞乜嘢，你好煩呀！你唔好成日以為錢咁重要好唔好呀？」
我：「對唔住…」
以娜：「唔講喇。」
以娜就咁就收左我線，跟住我返到屋企，上電腦已經見唔到佢上線，跟住果幾日我打電話比佢，佢唔係冇接，就係以信話佢出左去。
我好失落，但既然以信都話佢只係出左去，咁即係佢只不過係嬲左我，,並唔係因為有事，所以跟住幾日我都冇再打比以娜。
阿爸做左化療之後胃口開始變差，平時除左做運動同去醫院之外，大部份時間都會留喺屋企，仲有一個星期，可勇就同Yoyo結婚，今日，Yoyo幫阿媽拎左佢訂造既旗袍返屋企比阿媽試身。
我：「阿媽，呢隻紅色又幾靚，好襯妳呀。」
阿媽：「係咪呀，爸爸呀，我靚唔靚呀？」
阿爸：「靚…靚咳咳！」
Yoyo：「阿爸一定話阿媽靚架啦，哈哈。」
可勇，「阿爸，你都試下你套禮服啦。」
突然，我電話響起，係一個無來電顯示既電話。
我：「喂？」
「薛可正，你去左邊？」
我：「以娜？呢幾日妳去左邊？」
以娜：「我問你而家去左邊呀！」
我：「我咪喺屋企試緊衫囉。」
「咁冇嘢喇。」
「喂喂！」我未講完，以娜果邊已經斷左線，
媽：「可正，邊個打比你呀？」
我：「以娜囉，問完我去左邊又收左線。」
Yoyo：「以娜姐唔係去左英國咩？不過講時講，我都未見過佢。」
我：「我都唔知佢做乜，算啦，阿爸，到你試。」
我同可勇拎左阿爸之前度身訂造既禮服出黎幫佢試身，阿爸試完出黎，整個感覺係佢瘦弱左好多。
「幾好睇喎阿爸，著得你好型呀。」我個心好難過，但唔可以比任何一個人見到。
試完禮服，阿爸上左床休息，我同阿媽收拾既同時，有人按門鐘。
可勇打開門，企喺門口既，竟然係以娜。
「以娜姐？妳又會黎既？」可勇
「以娜？」聽到可勇咁講，我好奇，起身一望，企喺門口既真係以娜。
「以娜，點解妳會返左黎？」我走上前問，但以娜冇理我，推左我一下就走左入屋。
「阿姨，好耐冇見呀。」以娜瞬間變臉咁向阿媽笑住講。
「唉呀，以娜，妳黎左既？我都好耐冇見妳喇。」阿媽見到以娜突然出現，開心到放低手上既嘢，第一時間走過去。
阿媽：「黎黎，以娜我介紹妳識，呢個我細新抱，Yoyo呀。」
阿媽將以娜拉過去Yoyo身邊，Yoyo有小小尷尬咁同以娜握一握手。
Yoyo：「以娜姐，上兩次都唔好意思呀。」
以娜：「傻啦，我都冇記住。」
阿媽：「咦妳地之前識架咩？」
以娜：「冇嘢，哈哈，阿姨，來叔叔呢？」
阿媽：「佢訓左，我睇下佢訓著左未先。」
以娜：「唔使喇，我坐一陣等等佢。」
然後，三個女人就坐埋一齊，一時研究下阿媽件旗袍，一時又講下Yoyo而家見肚未。
半個鐘頭後，阿爸起身，行出房門，拎起個杯想行去飲水。
「來叔叔。」
阿爸：「以娜？乜妳黎左既，可正都冇同我講既，妳黎左好耐呀？」
「來叔叔。」以娜兩隻眼微微通紅咁拉住阿爸既手，
「傻妹，做乜嘢，坐低先。」
以娜：「冇嘢，來叔叔，你要快啲養好病。」
阿爸：「而家調理得好好呀，放心。」
可勇：「係呀以娜姐，妳會唔會去我同Yoyo婚禮，下個星期日。」
以娜：「去，到時我再搵你阿哥去。」
Yoyo：「好呀。」
就係咁，一家人就圍住以娜不停咁講嘢，以娜好細心咁逐一解答佢地既問題。有時我望見以娜，我會覺得點解世界上有人會咁細心，無論幾多人問佢嘢，佢都會不厭其煩咁慢慢滿足人好奇心，從來唔會覺得煩躁，當然，除左對我之外。
果晚，以娜應承阿爸阿媽陪佢地一齊食飯。
食完飯，我送以娜返屋企，行出門口，以娜先正式同我講第一句說話，佢將一個公文袋塞左比我，然後好細力咁，一鎚打左落我心口度。
「薛可正，下次你再自把自為，唔記得我講既嘢，我去邊度都會返黎，一鎚打爆你個頭。」
我：「妳點解會返左黎？以信呢？」
以娜：「佢冇事，係家姐過左去，我返黎香港搞埋小小私人嘢，同埋我又想探下來叔叔，最重要就係比返錢你。」
我：「我都話唔使咁急。」
以娜：「你仲講！我走喇。」
我：「我車妳啦。」
以娜：「唔使呀，你送我去坐車就得喇。」
雖然我幾番要求，但最後以娜都係堅持自己返屋企，返到屋企，佢亦都只係好簡單報個平安就訓左覺。
第二日，我如常咁大約下晝返到公司，好奇怪，今日我竟然見到德叔好早就已經坐左喺佢辦公室入面。
我：「德叔？今日咁早既？」
德叔：「可正，係呀，返黎執小小嘢。」
我：「丫係呀，下星期可勇結婚，個衰仔自己唔好意思請你，託我問你一聲你會唔會到？阿爸都叫你黎呀。」
德叔：「好呀，我會去上海幾日，下星期應該可以返到香港。」
我：「好，咁我叫可勇寫張帖比你。」
德叔：「係呀可正，你過黎。」
「係，德叔。」
「拎住，當係我比可勇既賀禮。」德叔即場開左一張支票比我。
「二十萬？德叔，太厚禮喇」
德叔：「拎住，可勇同你搞成咁其實我都有責任，你覺得有多既，就當係我幫補來哥既醫療費，呢幾日去上海我係有一樣好緊要既嘢做，你記住，如果任何人問你，你都係話幫我打理金市，一句都唔好講多，知嘛？」
「知道…」
「德叔走喇，你比心機做嘢。」
德叔走左，唔知點解，我有一種好不安既感覺，直覺話比我知應該發生左特別事，跟住我去到Gini間房，見到佢坐喺電腦前面，一副好沉重既表情。
「咯咯咯」
「Gini，有冇時間？」
「喂正，坐丫。」
我：「德叔啱啱走左，佢走得好急，係咪發生左事？」
Gini：「我都唔知點講。」
我：「講出黎啦，如果係關德叔事既話，我想幫下手。」
Gini：「邊有得幫，你過黎睇下。」
Gini將電腦轉過黎比我睇，原來佢同詠航用QQ聯絡緊，由詠航口中所知，成件事就係德叔同一個大陸商家搞公司，專承辦大陸大西北地區既工程，合作左半年，比人發現公司既鋼材原來係國家既資產，即係變相偷國家既財產，但果批鋼材明明就係德叔同個大陸佬夾份一齊買，最後大陸佬失左蹤，有份做董事既詠航同德叔就比大陸公安問左幾次話。
Gini：「上面班公安話比一個月時間德叔，証明唔到成件事係個大陸佬搞出黎既話，就拉人兼封左間公司。」
我：「所以德叔就呢幾日上去搞掂件事…」
Gini：「係呀，不過我地都幫唔到手，都係聽德叔講留喺公司幫佢打理好金市呢邊。」
「嗯。」
到夜晚八點，因為今晚美國有非農業職位數據要公佈，好多同事一早就去左食飯打算夜啲返黎做單，正當我百無聊賴喺度諗緊德叔件事既時候，以娜打電話比我。
「薜可正，食飯未？我啱啱中環整完嘢，陪我食飯。」
我：「好，想食咩？」
以娜：「你樓下大家樂啦。」
我：「下，上次分手之後我冇去過喇喎，唔好啦，去中國會，我訂位。」
以娜：「我唔鐘意，就大家樂，十分鐘後，上次分手果個位等。」
十五分鐘後，我去到大家樂，見到以娜，但並唔係坐住我地上次坐果個位。
我：「喂，又話果個位既？」
「坐低啦白痴，果度有人坐左呀，你望下，好似都係鬧緊交呀。」以娜指指另一邊既位同我講。
我坐低以娜旁邊，同佢一齊好留心咁聽下果對情侶喺度講緊乜嘢
男人：「點解要分手？」
女人：「係咪應該問點解唔分手，你拖住個女仔比我見到喎。」
男人：「兩個月前喇喎，妳唔係已經原諒左我喇咩？」
女人：「我原諒左，但我原諒唔到自己原諒你。」
男人：「我講左我下次唔會架喇，妳唔好又拎返出黎講啦好冇呀？」
女人﹝開始喊﹞：「我唔係拎返出黎講，係我每次夜晚自己一個，諗起親眼見到你拖住另一個女人果個畫面，我好難受，真係好難受呀，我可以點忘記呀？」
男人：「………」
「咁個男人又衰左啲。」本來我以為只係當一場鬧劇咁去睇，點知我擰轉面，以娜已經一面眼淚咁衝左出門口。
「以娜。」我唔知發生乜野事，跟住就跑出去追以娜。
上到電梯，去到花叢我拉住以娜，問佢到底發生乜嘢事。
以娜轉身，一下就攬住我，攬得好實好實。
一邊喊，一邊好大聲咁講：
「薛可正，對唔住呀嗚嗚…，我知你好難受，我一路都知，但我真係唔知點去彌補呀，嗚…」
「我冇事，冇事。」我攬住以娜任佢不斷放聲咁喊，一喊佢就喊左十五分鐘。
中環區甲級寫字樓下，黃金晚飯時間狂喊十五分鐘，何其壯觀。
果日天氣好凍，而長江大廈地下呢個位，因為皇后大道中既關係，係特別扯風。
我攬住以娜，其實我係一直覺得好凍好凍。
「薛可正，你真係冇嬲過我？」
我：「點會冇？」
以娜：「咁點解你仲要搵我？」
我：「因為我唔捨得妳。」
以娜：「去英國果段時間，我成日諗，其實，比你見到我同Grace一齊果日開始，我已經覺得自己好醜。我知你好難堪，但之後我地一路鬧交，我根本搵唔到一個落腳點，比自己好好咁反省一下。」
我：「而家冇事喇。」
以娜：「你比我講埋，今次唔講，我唔知幾時先敢講。」
我：「好。」
以娜：「你知唔知我根本冇同Grace一齊，果日你見到我錫佢，係基於我仲當佢係一個女人，果種好曖昧既感覺令我有好多錯覺，佢對我好好，好到我以為自己唔需要你，到後來原來我先知我每一日都會諗住你。見到你拖住Yoyo果晚，我冇再去食飯，返到屋企喊到差唔多暈低，以妮叫我搵返你，但我唔敢，我亦唔識，唔識點樣可以令你原諒我，我一路覺得自己做得好錯。」
「我同Grace講唔可以再落去，佢繼續對我好好，就算我要去英國佢都放我大假，直到我知道自己真係可能去英國，我先真真正正辭職，佢留左我好多次，但佢愈留我，我就愈記得果日既事。」
「我一直都好想你爭氣，一直都好想你事業有成，我地可以有我地既天地，到今日，你搵返我，你事業有成，你識關心我，但原來世界上仲有其他人，仲有以信，仲有來叔叔，仲有阿姨同埋我阿爸阿媽，我好掛住我地啱啱一齊果時無憂無慮既時光，可惜唔可以，已經唔可以喇薛可正。」
我：「以娜，我地再喺埋返埋一齊好嘛？」
以娜：「薛可正，你唔好再亂講嘢喇。」
我：「我冇亂講嘢，我認真，今日好凍，我可唔可以繼續攬住妳？」
以娜又再一次攬住我，眼淚一直不停咁流，我見到好多同事經過，以好奇怪既眼光望住我，但我已經唔介意，我只係等以娜比最後一個答案我。
「薛可正，來叔叔喺香港，以信喺英國，你要我放棄定係你放棄？你聽住，我唔會再同你一齊，以信同來叔叔都會無事，一定會無事，我以後都唔會同你一齊架！」
「我知妳辛苦，唔好喊喇好嘛？而家收聲先，其他事慢慢再打算。」我拍拍以娜安慰佢，
「我冇嘢。」
十五分鐘後，以娜補完妝，依然係兩眼通紅咁由洗手間行出黎，若無其事咁拍左我一下：
「好喇，去第二度食嘢。」
我：「妳唔係要食大家樂咩？」
以娜：「好瘀呀，唔食喇。」
「傻婆。」
「你白痴仔。」
「喂，張以娜，拎隻手黎。」
「做乜？」以娜伸伸手。
我捉住佢隻手，由我自己既頸鍊度，拆左一隻戒指方落佢手心度，
「唔要！」以娜縮開手，
「生日禮物黎架。」
「痴痴地，下年生日都黎，仲禮乜嘢物？」
「總之收左佢，乜嘢意思都冇，呢隻戒指我帶住喺身好耐，妳以後幫我帶住佢，去到邊都唔好除低佢。」
以娜：「好貴架？」
我：「唔好理啦，帶實佢呀。」
「返屋企先帶，不過，多謝你，薛可正。」
呢個時候，班馬線既紅色公仔亮仔，原來唔經唔覺之間，我地兩個又企返喺大半年前以娜生日果晚，我地發生爭執既地方。