男人唔可以窮: 9
見到個訊息，我嚇左一跳，諗緊打唔打比以娜好，睇真啲，先發覺個訊息原來係三分鐘收到。
我立即打比以娜，響左好耐，以娜先接電話。
「妳點呀？對唔住我返左大陸收唔到電話。」
「婆婆走左，走得好突然，媽咪佢地喺屋企想趕黎都趕唔切。」從電話入面聽得出，以娜啱啱有喊過。
「妳仲喺醫院？邊間，我黎陪妳。」
「嗯，仁濟醫院，你黎到打比我。」
半個鐘後，我到達仁濟醫院，由的士踏出車門果一刻，我又再一次見到一個我好討厭既車牌 – JC115。
我估計到Grace應該都已經黎左，我有小小緊張，雖然今時今日既我已經唔係當日既窮小子，但距離Grace，我仲有一段好大既距離，起碼佢唔係坐的士黎。
但環境好似唔容許我猶豫，我打比以娜：
「我到左喇，幾樓？」
「Grace自己黎左，你怕唔怕？」
「怕乜野？幾樓？」
「三樓。」
「我而家上黎。」
上到去，見到以娜，仲有以娜既其他親戚，包括佢爸爸媽媽。
我離遠見到Grace一個企喺好遠既走廊位置，但佢對眼就一直望住我。
因為場面有小小混亂，以娜有某部份既親戚仲趕緊去醫院見婆婆最後一面，但醫院方面因為衛生問題，最多只可以等多十五分鐘，所以以娜同一班在場既親戚就一直聯絡其他人盡快到。
以娜叫我照顧以信，我推住以信既輪椅就行到去某一個角落。
「喂，薛可正，幾日唔見，點解你咁冇精神？」以信問我，
「係咩？可能訓得唔好。」
「二家姐喊得好厲害，要大家姐扶住佢。」
我：「點解你冇喊？」
以信：「我見過婆婆十次都冇，喊唔出。」
「以信，入去，我地屋企人最後同婆婆講一次再見。」以妮行埋黎，同我打個照面，跟住就接左以信入去婆婆病房度。
我覺得無聊，就走左出大門口透透氣，始終生離死別既氣氛實在令人太鬱悶。
走出大門，時運低，咁啱就見到Grace。
呢條八婆次次見到我就好似導航咁，一定要追住我黎咬，今次都唔例外，一見到我已經走埋黎我度。
「哈你個薛可正又會黎既？」
「人地屋企有白事，妳就出少句聲。」
「如果你知道自己比唔到幸福以娜，點解隔左咁耐仲要黎煩人？」
「喂你條八婆都幾煩架喎，有乜野可唔可以離開呢度先講呀？」
其實呢個問題我一直都係好糾結，我個人認為，百份之九十既女性戀者都有一個怪癖，就係一條根咁往同一個地方不斷鑽。就好似Grace，以往次次見親我都會提起我照顧唔到以娜呢個重點，目的就係要話比我知佢有錢，佢可以照顧以娜。
當然，呢個都真真正正係我當初輸比佢既地方，至少我當日係咁認為。
所以當今次Grace不斷喺醫院外面話我照顧唔到以娜就唔好再搵以娜既時侯，唔知點解連我自己都估唔到我會講出一句我以前從來唔會講既說話：
「八婆妳聽住，我一定會喺妳手上搶番以娜返黎，再好好咁照顧佢。」
但估唔到，Grace答我果句說話令我更加震驚：
「我已經同以娜冇一齊好耐喇。」
Grace既呢一句，唔知點解，令我既心情突然間好左好多，係好到完全唔想同佢嘈。
突然，以娜走過黎，拎住幾張紙，交左比Grace。
以娜：「其實我轉頭返公司比妳咪得，真係咁急咩？」
Grace：「我見經過呢邊順手睇下妳，妳冇野嘛？」
以娜：「冇嘢呀，我入返去喇。」
以娜走左之後，得返我同Grace，我知道佢已經唔係同以娜一齊，基本上，已經唔需要點去理佢。
再加上睇埋頭先既對答，佢而家應該係申請緊做以娜隻兵，女人都要做兵，真係第一次見。
我走左入男廁，打左返公司傾左半個鐘頭，出返黎，Grace已經走左。
跟住我就企左喺醫院出口，一路耐心咁等侯。
以娜安排好佢婆婆既所有醫院入面既事之後，已經係個半鐘頭後，佢行出醫院門口，見到我仲喺度，個樣好似有小小驚訝。
以娜：「點解你仲喺度既？」
我：「妳好似冇叫我走。」
以娜：「你喺度就同我講，我叫你走先嘛。」
我：「得啦，妳走未，食唔食飯？」
以娜：「都得既，你等我一陣。」
以娜回頭向以妮交帶埋其他事，我就同以娜去左一間餐廳食飯。
言談間，我地傾到以信。
以娜：「其實以信今次都唔係好適合返香港，但婆婆病得太厲害，先要冒險返黎。」
我：「點解？」
以娜：「以信最近既情況差左好多，之前喺英國試過昏迷一段時間，所以我都去左英國睇住佢。」
我：「最差既情況係點？」
以娜：「佢呢個病其實只會一路差，問題係快定係慢，英國果邊舅父生意差左好多，媽咪話，佢可能要去英國長期照顧以信。」
我：「請個工人又或者以信返香港住唔好咩？」
以娜：「請工人我地邊放心，返香港你覺得醫療好好咩，如果私家又太貴，公立既，搞手續排隊都有排你搞，如果呢段時間發生乜嘢事點算？」
我：「所以…」
以娜：「我有機會去英國，長時間都唔會返黎。」
我：「去英國？咁以妮佢地點？仲有妳爸爸都仲喺香港。」
以娜：「我地已經開左家庭會議，如果以信既病真係愈黎愈差，我地盡量都會去英國陪佢，直到有乜嘢變數，我地再做決定，一家人，去邊都好，最重要齊整。以信同我地相處時間已經好少，我地唔想佢個病變差果時，陪住佢既仲係舅父同工人。」
其實當時我聽到以娜講呢番說話，我會慚愧到不得了，我諗起阿爸既病，諗起阿媽既操勞，仲有諗起同可勇既鬧翻，一家人，最重要齊整，知易，行難。
飯局入面如果長時間存在住太沉重既話題，會好容易有胃痛，正因為咁，我選擇左轉話題。
我：「係呀，妳拎返果五萬蚊未呀？」
以娜：「你仲好講，果日你張支票比以信睇到，佢同媽咪講左，媽咪叫我入返錢落戶口，香港果個聯名戶口上次又比媽咪取消左，而家佢一定要我入落英國個戶口度。頭先喺醫院我話聽日去銀行拎比佢，佢又問我比咁多錢佢拎喺身做乜，煩到死。」
我：「妳媽咪同妳一樣咁有性格。」
可娜：「仲講？」
我：「乜嘢英國戶口呀，妳比號碼我我幫你搞喇，我公司過數去其他國家既銀行好快，唔好咁嬲喇。」
「我寫支票後面，你自己兌左匯率就入落去。」以娜將英國銀行既戶口號碼寫去我比佢果張五萬蚊既支票背面，然後交左比我。
以娜：「喂，埋單喇。」
我：「咁快？」
以娜：「阿婆啱啱走咋，我想返去陪下媽咪。」
我：「咁好啦。」
坐完車，行返去以娜屋企家門之前，有五分鐘既路程。一路行，我同佢就好似一對稍稍親密既普通朋友咁談天說地，有時我激到佢嬲佢又會輕輕咁打我一下，到去到較高既石級，佢又會慣性咁拉住我隻手去行過，去到樓下，以娜正準備行入大堂果時，我叫停左佢：
「張以娜，我有冇可能追返妳？」
「薛可正，發生左太多事喇，我同你，再包括以信既事，呢個時候，好多野都根本唔到我揀。」
我知道呢個係拒絕既訊息，就係咁，畢正咁企喺原位，等以娜判我死刑。
「但今次見返你，你變左好多，大家都長大，包袱多左，責任亦大左。
早啲返屋企喇，小心啲呀，拜拜。」
以娜講完，行入大堂，我再見唔到佢既身影，呢個時候，天開始落雨，一場落得啱啱好既雨。
雨愈落愈大，我行到中途完全搵唔到地方避雨，結果我全身都濕哂，加上幾日冇返屋企，我決定返去換件衫再打算，如果可勇仲喺屋企，或者我會去王力維屋企借宿一宵。
返到屋企，見到度門打開左，我行入去，就見到可勇同Yoyo帶住行李企左喺度，而阿爸阿媽就走黎走去，好忙咁喺度執嘢。
「阿哥。」Yoyo叫我，可勇聽到，就故意望向另一邊。
阿媽：「咦可正你返左黎既？做乜成身都濕哂架，大陸返黎就買把遮啦。」
阿爸：「正你快啲沖個涼換左衫先啦，一陣冷親呀。」
「得喇，我換件衫就走。」
「啱啱返又走去邊呀，聽日先啦。」阿媽同我講嘢，我冇出聲然後自己行返入房。
「唔想見到我咪走囉佢。」可勇好細聲咁講，但我聽得好清楚，不過我知Yoyo有左身紀，加上我真係唔想再要阿爸阿媽操心，所以冇理到可勇。
行到入房，第一樣走入我對眼既係兩個大行李箱。
我：「媽呀，呢兩箱野唔好就咁放啦，放埋小小比條路人行丫嘛。」
我已經有幾日冇返屋企，我以為返到去果時，阿爸阿媽會即刻關心我多啲，又或者會好緊張咁問我呢幾日去左邊。
可惜我返到屋企果時，只係見到佢地兩老好辛勞咁幫Yoyo同可勇張羅，冇問過我去邊，就連我私人既空間都要搞到公家地方咁放哂雜物。加上頭先同以娜既事，呢一刻，我既感覺真係好差好差。
「果兩個箱係Yoyo架，我見你未返咪放住先。」阿媽答我
我：「都唔係咁放架大佬。」
「唔放得咪拎返囉。」突然可勇走入黎，一手搶返兩個行李箱走。
我：「喂你係咪次次撩交鬧呀？而家我講嘢係咪唔得？」
Yoyo：「哥對唔住呀係我亂放，薛可勇你唔好成日咁大脾氣好冇呀？」
可勇：「我大脾氣？」
「阿正呀，搬嘢就一定亂架啦，一家人相就下，點解一返黎就要搞到家嘈屋閉呀？」阿爸走入黎做和事老，但佢既語氣令我唔覺得佢有持平。
我：「阿爸，我嘈？」
阿媽：「得喇得喇，正去沖涼啦。」
我冇理阿媽，拎左個運動袋，隨手拎起幾件衫同必需品就走出房。
「媽，我搬出去住。」
然後毫無留戀咁走出大門。
果晚，阿爸同阿媽打左比我好多次，但我冇聽到。Yoyo比左幾個訊息我，內容大概係叫我萬事有商量，叫我返屋企先。
最後，果幾晚我去左王力維屋企訓，一個星期後，我喺屋企附近租左間屋。
阿媽有向我講返果晚其實係Yoyo屋企樓上有住戶裝修，加上Yoyo又有身紀，所以搬去我地屋企住幾日，佢同可勇啱啱入門口未放好行李，我就跟住返黎，最後先搞到咁既結果。
阿媽：「阿正呀，你唔好再激個阿爸喇，佢呢排因為你地兩兄弟既事，搞到成日訓唔到。
我：「阿媽，而家唔係我一個人既問題，總之我搬開左就唔會再同佢嘈，我有時間會返黎陪妳地食飯，叫阿爸唔好操心喇。」
就係咁，我就一個人搬開左住。
兩個星期後，以娜要陪以信返英國，佢飛果朝，我有要事唔可以去機會，只可以打一個電話比佢送行。
我：「去到果邊記得打比我。」
以娜：「電話費平咩，Msn咪得囉。」
我：「係呀，上次張支票既錢匯左去妳比我個戶口喇，返到去自己查下。」
以娜：「得喇，我入閘喇，再傾啦。」
我：「喂喂！張以娜，妳會唔會唔返黎？」
以娜：「你好煩呀你問左幾多次呀，我一定會返，但可能要陪多以信一段時間先，走喇，拜拜。」
「喂…」未講完，以娜已經收左線。
「點呀，女朋友去邊呀？」同我一齊坐緊車既德叔笑笑口問我。
「冇呀，朋友之嘛。」
德叔：「德叔今日好似阻住你喎。」
我：「傻啦，做野要緊，開飯丫嘛。」
德叔：「叻仔，哈哈，不過如果唔係詠航行唔開，我都唔會今日叫你陪我去。」
我：「詠航個衰仔去左邊？好忙咩？」
德叔：「早排佢幫我搞小小生意，呢排有小小阻滯，所以冇咩事，我都唔叫佢陪我住。
我：「其實佢幫你做乜？」
德叔：「衰野囉，哈哈，總之你幫德叔搞好金呢邊啦，夠食架喇你。」
我：「我都係八卦，哈哈。」
德叔：「係呀，我前日同來哥飲茶，佢話你同可勇仲鬧緊交，你兩兄弟鬧還鬧，睇住個阿爸，我見來哥面色唔多好呀知嘛？」
「知道。」
以娜一去英國，就去左兩個月，呢兩個月我既起伏並唔精彩，依舊係獨居，每日返工放工，德叔交伕我做既倉愈黎愈多，我既收入亦都愈黎愈好，就上個月單月既佣金已經有七十三萬，不過我冇比呢一大舊錢沖昏自己，我只係將佢放入銀行，等有需要既時候再用。
經過左呢一段時間，無論係阿爸既癌症，又抑或係以信既病，我都深深體會到，原來錢除左可以用來換虛榮之外，仲可以帶比人好大既安全感。
之前成日覺得以娜係因為虛榮而離開我，到而家睇返，我先覺得令到佢離開我既，係安全感。
身為一個家姐，有一個長期病患既弟弟，試問佢又點可能揀當日既我做終身伴侶，以娜講得啱，我真係冇試過站喺佢既立場去睇，但我自己以前仲一路覺得冇錯，不斷認為係其他人既錯。
而家每一個星期，我都會抽兩日返屋企同阿爸阿媽食飯，當然，我返去既日子都係可勇出左去既時間，由阿媽口中得知，而家Yoyo仲有返工，聽講話新工做得唔錯，而可勇就冇再做金，搵左一份跟車，安安份份咁邊做邊準備做爸爸。
我問阿媽可勇甘心咩？以前一晚都搵到既數目而家竟然要辛苦一個月先有，阿媽話可勇都唔係太想做，只係佢已經承受唔到再做金市既壓力，寧願而家咁樣安定一段時間，等做左爸爸之後再諗將來。
阿爸阿媽都好開心，見到佢地就黎有孫抱果種快樂，我自己都覺得好感動，可惜係我已經有兩個月冇見過可勇，我已經冇再嬲，但我唔知道佢仲有冇嬲我。
又一個星期，今個禮拜我去左一個好耐都冇去既地方 – 足球場。
因為做金市，已經好耐冇試過早起身去踢波，已經久違左細細個同朋友一齊衝鋒陷陣既感覺。
我住友愛邨，愛信樓樓下既球場就係我地細個既主場，呢個球場其實都出現過唔少球壇名人，有成日半場就起腳射我地既賴啟卓、去過英國伯明翰做財監既馮家奇，仲有踢踢下波走左去唱歌，C AllStar既陳健安，呢幾個都曾經同我交過手，當然論球技我係拍馬都追唔上佢地啦。
踢完波，出完一身汗，感覺真係舒服到不得了，同我既波友威仔一齊行去發發食個飯，跟住就打算返去探阿爸。
我：「威仔，呢排做乜嘢？好耐冇聽見你消息咁既？」
威仔：「做倉囉，另外幫屯門隊踢緊丙組。」
我：「丙組，係咪踢到飛沙劈石咁？」
威仔：「係呀，上個月先穿完頭，縫左四針，痛到我暈。」
我：「咁仲踢？又唔係多錢，為乜？」
威仔：「其實冇話為乜，你都知我最鐘意同最叻都係踢波，如果做自己鐘意既嘢都要問為乜，人生都好沉重喎。」
我：「但你都知香港踢波就算踢到去甲組都冇用，一萬幾千，夠個仔學費定老婆化妝品？」
威仔：「咁我而家後生，可以去試我自己想試既野，搵錢我幾時都可以揀，但做運動員呢，年紀一過就唔到你自己話事，而家搞屯門隊果個老闆有鬥心呀，聽講仲話想踢到上甲組。」
我：「你又講得啱聽，好多嘢真係有時限。」
威仔：「正，老實講，緊係做左自己鐘意既嘢先，再做冇咁鐘意既嘢架啦，你知我唔識講嘢，但你明我想講乜，
我細個老豆帶我入旺角場睇南華，見到個陳志康帶住個波，幾千人牛仔牛仔咁叫佢，我成日都好想知個感覺係點，你話有一日比我試到就真係死而無憾。」
我：「威，你講得好啱，有目標，就要去做，任何事都係有時限，大家一齊比心機。」
威仔，四年後代表屯門足球隊作客大球場爆冷嬴南華二比一，現役甲組球員，曾效力屯門足球隊征戰甲組聯賽兩季，現效力FC橫濱。
威仔，梁國威，人稱孖指， 人有夢想，方有奇蹟。
呢兩個月，我都一直猶豫，如果有一日以娜返香港，我應該點做？
果晚送以娜返屋企既情景不斷喺我腦入面徘徊，佢所講既包袱同責任，我覺得係指我地大家之間屋企既問題，以信同阿爸既病。
我將我銀行存摺拎出黎，望住入面差唔多近一百萬既存款，我覺得，錢可以解決我地所有既問題。
等以娜返香港，我會同佢講，我地再喺埋一齊，所有問題，都由我去解決。
就好似威仔咁講，人，永遠都應該向自己最鐘意既事，全力跑過去，莫論得失。
呢兩個月，我同以娜都係用Msn聯絡，有時係夜晚，有時係朝早，以娜話以信上個月突然暈左兩次，有一次仲昏迷左接近半日，醒返之後，左手到而家唔可以控制自如。
有幾次，以娜忍唔住喊，我隔住個電腦，乜都做唔到，只可以不停叫佢唔好喊。
可惜既係德叔最近好多公事要我陪佢去做，加上做金市呢一行係好困身，基本上有市既時間你就要廿四小時準備客人打比你，絕對唔可以話放假就放假，每個星期，我只可以放星期六日，但兩日時間，根本唔夠我去英國陪以娜。
再過多一個星期，以妮都飛埋去英國，我意識到，以信既情況愈黎愈令人擔心，但我當時既心情好矛盾，如果以信有乜野不測，以娜會好傷心，但同時佢亦都唔需要再留喺英國，慢慢，我內心有一個陰暗面，覺得以信呢種病既病人大多數都係折磨十幾年，跟住好辛苦咁死。
如果以信呢個時候真係病情轉壞而離開，換個角度睇，咁唔係一件好事咩？
當然，我冇將我呢個諗法公開，我依然係每日都定時上網陪以娜，同分擔佢既所有不快。
有一日，我同德叔喺公司商量公事既時候，德叔同我講左一堆好古怪既說話。
德叔：「正，如果有一日有人問你同詠航熟唔熟，你記得只係話係同事，但工作上係冇關係。」
我：「點解咁講呀？」
德叔：「你照講就得架喇。」
我：「哦，係呀，德叔呀，我有件事想你幫我。」
德叔：「好呀，你講比德叔知。」
我：「我想請兩個星期大假，我要去英國。」
如果以信呢個時候真係病情轉壞而離開，換個角度睇，咁唔係一件好事咩？
當然，我冇將我呢個諗法公開，我依然係每日都定時上網陪以娜，同分擔佢既所有不快。
有一日，我同德叔喺公司商量公事既時候，德叔同我講左一堆好古怪既說話。
德叔：「正，如果有一日有人問你同詠航熟唔熟，你記得只係話係同事，但工作上係冇關係。」
我：「點解咁講呀？」
德叔：「你照講就得架喇。」
我：「哦，係呀，德叔呀，我有件事想你幫我。」
德叔：「好呀，你講比德叔知。」
我：「我想請兩個星期大假，我要去英國。」
德叔：「兩星期呀，時間唔短喎正，你都知有啲倉你放耐左，叫佢再比你做嘢分分鐘有阻滯架，而家股票果邊個景都唔錯，你自己怕唔怕班客聽到你放兩個星期就勾啲錢去玩股票呀？」
我：「我諗左架喇德叔，好多客都溝通得幾好，我話屋企有小小事佢地都冇問題，有幾個仲話我有交帶。」
德叔：「好，既然你搞得掂就冇問題啦。」
我：「多謝德叔。」
當晚，我就搵王力維落酒吧，順手問下去英國要點樣安排，近幾年佢收入多左，同女朋友去旅行係佢每年必定既節目。
我：「喂，我照你咁講去買哂嘢就得架喇下？」
王力維：「得架喇，去唔去睇波，我有個朋友喺紐卡素果邊。」
我：「唔啦，我去陪以娜，佢細佬個病情況好反覆。」
王力維：「喂，你咁去，即係代表上身架喇喎。」
我：「即係點呀？」
王力維：「你地一齊過又分開過，而家佢細佬既情況你又知道，咁樣過去陪佢，咪即係話以後你都會陪佢一齊過所有難關。
一個唔覺意如果佢細佬呢兩星期有咩頭暈身慶三長兩短，你點都唔會返香港住架啦。」
「都係架。」
王力維：「咁咪係囉，一不做就二不休啦。」
我：「即係點呀，講清楚小小啦。」
王力維：「喂大佬我工都唔返飛過黎陪妳，咁既誠意算足喇掛，你薛可正一場去到冇可能兩手空空，一於上機前去周大福買定隻兩卡戒指啦。」
我：「買黎做咩？」
王力維：「買黎唔通送比佢老母咩，緊係求婚啦。」
「求婚？」
果晚，返到屋企，我立即打開電腦，一上線，已經收到以娜既訊息。
平時我地都係用視像，唔知點解今日佢會用文字叫我。
以娜：「薛可正。」
我：「點解會打字既？妳好懶打字架？」
以娜：「以信頭先由輪椅跌左落黎，撞到個頭流左好多血，我而家喺醫院陪佢，我好擔心呀薛可正。」
我：「佢情況點呀？」
以娜：「止左血，但佢主診醫生而家返緊黎。」
我：「唔使怕，止左血就應該冇事。」
以娜：「我係睇住佢半邊身冇反應成個人打斜跌落黎，我想扶佢都黎唔切。」
我：「妳電話轉左做靜音未，小心嘈住以信訓覺。」
以娜：「轉左，一入房就轉左。」
一分鐘後，我打長途電話比以娜。
「有Msn點解要浪費長途電話費呢？」以娜一聽電話已經咁講。
我：「我怕妳驚，呢筆錢唔慳得。」
「嗯…」聽得出，以娜喊左好耐，
「張以娜。」
「嗯？」
「我飛過黎英國陪妳好冇？」
「………….」
「我已經請左兩個星期大假，我下星期就黎陪妳好冇？」
「………………………….」
「我屋企有事果時，我記得妳奮不顧身都要借五萬蚊比我，到妳而家有事，我唔可以睇住妳自己一個。」
「……………………………………」
「以娜，比個機會我陪妳，好嘛？」
「……………………………」
「以娜，我唔會再令妳難過，比我陪妳，好嘛？」
以娜另一邊既哽咽聲，令我同佢都覺得好難過，呢一種咁痛而又咁遠距離既感覺係我從來未試過，我呢一刻，真係好想見到以娜。
「以娜？」
「好呀…薛可正，你下個星期過黎，你下個星期就即刻過黎，我真係撐得好辛苦呀，嗚….」
果晚，我同以娜傾左三個鐘頭長途電話，商量好下個星期去英國之前，我要幫佢去邊度買佢想買既野，喺細節入面有幾句對話，令我知道自己之前再度誤解左以娜。
以娜：「你幫我去置地廣場果度買一隻冷，我要織冷衫。」
我：「使唔使去到置地呀，周圍都有啦。」
以娜：「果度既冷線靚好多架，你買完我比返錢你啦。」
我：「又唔使，你叫我去買LV就要比返錢我。」
以娜：「LV我唔買啦，之前果個我都想賣。」
我：「果個？唔係人地送比妳架咩？」
以娜：「低能，真係我自己買架。」
我呢一刻至真正相信，真係以娜自己買。
第二日，我去左航空公司訂機票，最後我決定左搭夜機，我又去左中環幫以娜買冷線，仲有一啲香港先買到既藥油，最後，係因為以娜一句「好想食澳門既牛肉乾呀」，而我就去左澳門走左一圈。
所有嘢都買哂，以信既情況又慢慢好轉，跟住果三日，我好冒險咁將工作帶返屋企，由屋企上公司網去做單，點解話係冒險，係因為屋企上公司網，個價同公司入面既報價機係一定有誤差，就算係幾毫子，個損失都係唔可以忽視。
但為左以娜，呢啲都只不過係小事。
可惜，自古以黎，謀事在人，成事在天，無論你覺得感覺有幾良好，前面係有幾光明，個天只要睇你唔順眼，只需要一眼，大概係一眼，佢就可以將你，置於死地。
就喺我上機前既兩晚，阿爸半夜訓訓下覺得個肚非常痛，痛到完全講唔到嘢，可勇同阿媽立即將阿爸送入醫院，做完全身檢查，第二日，就即係我上機前既一日，阿爸之前既主診醫生好遺憾咁話比我地一家人知，阿爸既癌症復發，已經去到好嚴重既地步。