《我還是救護員的日子》: 4.9 決定
「真係好好味啊！」Janice正在品嚐我親手整既雞蛋仔，食過之後佢不停讚好。
「試埋呢個綠茶芝士味！」我整咗幾款唔同既口味，包括香芋味，咖哩味，仲有羅宋湯味。
「都好好味！無諗過原來你整嘢係咁好食。」
「唔好食太飽啊，一陣仲有雪糕格仔餅同班戟食。」
放假既感覺真係好，特別係連續放七日既Rota。就算唔去旅行，喺屋企同另一半睇吓影碟，玩吓煮飯仔，我都已經感到好滿足…
不過如無意外，今次應該係我職業生涯裡面最後一個Rota。
或者咁講，我既救護生涯經已接近尾聲，因為我決定辭職，放完假之後就會返去遞信。
之後會做啲咩？
我會開鋪頭，主要係賣吓小食同埋甜品，而格仔餅同雞蛋仔係其中一樣主打。有位識咗十幾廿年既老死整甜品好叻，我地會一齊合作。
換言之，我將會榮升做老闆，而呢個亦係我之前所提及過既「夢想」。
至於點解會係夢想，因為呢個唔單止係我既意念，仲係我細佬阿傑既諗法。
前排執拾舊物既時候，我無意中睇返阿傑過往每年所寫俾我既生日卡，佢每一次都會寫好多嘢，而內容當中經常提到第時大個咗想學整嘢食，當中一定會有佢最鍾意食既格仔餅。如果可以既話，第時會開一間屬於自己既店鋪，仲叫我記得一定要多啲去幫襯。
點解會最近先發現到，因為一直以來我都無勇氣去接觸佢既遺物，細個睇既時候又唔會為意到呢樣嘢。
但機緣巧合之下，Janice屋企最近要進行翻新，於是要搬過黎我度住一排，而我為咗清空啲地方俾佢擺嘢，於是就開始執拾舊物…
無諗過自己整嘢食的確係有少少天份，只係上網自學，然後自己買料買器材試整，得出既效果竟然唔錯。
真係唔賭唔知時運好，唔整唔知天份高。
「你仲有三日就放完假喇喎…」Janice問：「做呢個決定…你真係捨得？」
「……」於廚房製作食物中既我並無回應。
腦海中，忽然浮現返好多畫面…
======== ======== ======== ======== ======== ======== ======== ========
「Good morning sir！我叫李寶明，編號15xxx，今日第一日黎報到！」
「出到黎唔使sir架喇，入訓房擺低啲嘢先啦。」
「Yes sir！」
「丫係喎…新師兄你邊一隊架？」
「E隊！」
「哦…咁你以後係跟我喎，一陣帶你去見吓我地老總。」
「收到！」
「唔使咁拘謹架，呢度唔係學堂…」對方搭咗我一吓膊頭：「叫我阿益得架喇。」
「係既益哥！」
======== ======== ======== ======== ======== ======== ======== ========
「點啊？做嘢慣唔慣啊？」坐喺司機位既細華問。
「需要多啲時間適應。」我回應。
「出咗班有無三個月？」
「啱啱兩個月。」
「四個月左右啦…到時啲嘢就會開始上手。總之做嘢遇到有咩唔明就問，千奇唔好收收埋埋。」
「知道。」
「出班後半頭年係蜜月期，就算做錯嘢大家都會體諒，因為新人係需要時間去摸索…但半年後就唔係咁講喇，所以有咩唔明就要趁早問。」
「明白。」
「加油啦，總之死人冧樓都唔好怯，因為萬大事都仲有我頂住。」
======== ======== ======== ======== ======== ======== ======== ========
「喂新師兄你做咩！？」
「俾氧氣佢囉。」
「我都無叫你俾。」
「但係學堂…」
「學堂還學堂，出到黎還出到黎，佢SPO2咁高，條氣又無促，俾黎做乜！？如果次次都俾氧氣，咁搞法多多氧氣樽都唔夠用啦！」
「哦…」
「同埋你有無問過人地想唔想聞氧氣架？」
「咁又無…」
「阿伯伯，你想唔想我同事俾啲氧氣你聞啊？」
伯伯搖搖頭。
「咪係囉，人地都唔想聞！」
======== ======== ======== ======== ======== ======== ======== ========
「阿寶，出黎幫幫手！救護站出面有人暈咗啊！」。
身在休息室既我立即出去睇吓發生咩事。
但出到外面之後，我發現局內燈光全部關上，有人手上仲拎住個蛋糕，仲開始唱起生日歌….
Happy birthday to me...
益哥：「預祝你後日生日！」
後日係放假，大家毋須返工。
樂文師兄：「同埋慶祝你順利渡過試用期！」
呢三年時間真係過得好快。
細華：「仲有慶祝局長終於俾人調走！」
聽到呢句，全場一齊振臂歡呼。
======== ======== ======== ======== ======== ======== ======== ========
「讓開啊！救護員要做嘢啊！」馬路上，一名小朋友被車輛輾過。
益哥：「細華set鹽水，阿寶猜住先！」
「收到！」
情況嚴峻，手腳唔可以怠慢，必需要爭分奪秒。
千奇唔可以亂，因為一亂就急，一急就錯。
附近有一位跟傷者年紀相若既小朋友，佢淚流滿面，估計係傷者既屋企人或者朋友。
臨離開現場之前，我將傷者身旁沾有血點既幪面超人公仔執起，並交到嗰位小朋友手上：「細佬呢度危險啊！唔好企喺馬路邊！同我行返入去行人路！打電話通知爸爸媽媽！」
我表現得頗為嚴厲，因為我希望用憤怒將對方從驚恐之中喚醒，希望佢可以振作，希望佢往後即使要面對失去屋企人或者朋友，都要繼續堅強落去。
======== ======== ======== ======== ======== ======== ======== ========
「我決定咗辭職，今個月內會遞信。」
「都啱既…搵到自己鍾意做既嘢就趁後生搏，我呢啲老鬼返唔到轉頭架喇…」益哥。
「點都好啦，最緊要自己鍾意。」細華。
「條路自己揀，仆街唔好喊。」樂文師兄。
「寶師兄，我會記得你教過我既一切。」輝仔。
======== ======== ======== ======== ======== ======== ======== ========
我捨唔捨得？
老實講，真係有啲唔捨得，特別係一班共事多年既同事…
應該話係出生入死多年既手足。
呢幾年所遇到既人或事，絕對係畢生難忘。
因為我係負責救人，所以會接觸到生死，亦因為咁而見盡人與人之間既生離死別…
因為著起呢套制服，我見識到社會既另一種面貌，而呢種面貌係慘痛多於歡欣…
因為呢份工作需要經常接觸到人，我欣賞到千奇百趣既人生百態…
因為走在最前線，要親身體驗呢個世界既水深火熱，我意識到自己仲呼吸緊某程度已經算係一種幸福…
因為呢份經歷係如此特殊，我變得更加了解自己，更加明白自己生存喺呢個世界上到底有咩意義…
無論如何，我慶幸自己曾經穿上過呢一套白色制服，我亦為自己過往所做過既一切感到自豪…
因為無論過咗幾耐之後，我都可以同人講，李寶明曾經都係一名救護員。