《我還是救護員的日子》: 4.8 師兄弟
今晚係一年一度既師兄弟飯局，出席既人除咗有廿幾位操班時認識既師兄弟，仲有幾位曾經教過我地既教官。
教官喺學堂入面係高高在上既阿sir，但出到黎就係可以一齊飲酒吹水既朋友。
其實要約齊人食飯真係幾難，畢竟大家都要輪班工作，而且返工時間好唔一樣，所以要大家互相遷就時間。
不過，大家一直都有個信念，就係只要齊心就事成，而呢個信念大家喺操緊班既時候就經已開始貫徹。咁多年來，飯局從未試過有人出席唔到，就算當日要返工，放工都會立即趕到，因為大家都非常珍惜呢個一年只會舉辦一次既飯局。
酒樓內。
「喂搞錯啊，小雲咁耐都仲未到既！？」一個叫賓佬既人舉起酒杯，一飲而盡。
賓佬係我地一班師兄弟當中年紀最大既一個，佢名字當中有個「賓」字，份人又麻甩佬，所以叫佢做賓佬。
「條契弟不嬲都動作慢架啦！」阿秋附和，為賓佬將酒杯斟滿。
呢個阿秋係一名浪子，出名瀟灑不羈，憑住俊朗既外表，身邊既女伴貨如輪轉。
「唔使斟酒俾我，我飲汽水得喇。」發記「咔」一聲開咗罐可樂。
佢係當年我地班既最佳學員，係一名救護痴，對救護既嘢非常熱愛熟悉，係少數到而家都仲保持到工作熱誠既救護員。
「唔係咁掃興呀嘛發記！？師兄弟出黎食飯唔啤啤佢？」佢叫西芹。由於佢份人好西，個名又有個勤字，所以大家都叫佢做西芹。
雖然佢今晚坐喺我隔離，但其實我唔係太鍾意呢個人。
發記搖搖頭：「唔啦，聽日要返早，費事搞到無哂精神。」
「唔好啦！飲少少啦！一杯喇？再唔係半杯？」拎住酒樽既西芹不斷遊說對方飲酒。
「人地都話第二朝要返早，好心你就咪勉強人啦…」阿秋喺冰桶拎咗一枝全新既啤酒：「你想有人陪你飲咋嘛！？我同你飲囉！」然後一吓子飲咗半枝。
其實呢位浪子仲有個朵，叫「千杯不醉秋」。
呢個時候，有人推開酒樓房門：「唔好意思遲咗少少！臨收工接到單DBA，搞咗勁耐。」
佢係最後一個到場既師兄弟，佢叫做小雲，係成班人當中最後生既一個。當年入班既時候，佢只得十八歲。
「次次都係你最遲！唔好講咁多住，而家要罰你乾咗佢！」賓佬向小雲遞上一罐啤酒，仲要求連氣都未抖順既佢乾杯，擺明就係撚化對方。
「哦！」小雲竟然無拒絕，仲傻奸奸咁一口氣飲哂罐啤酒，最後搞到紅都面哂。
可能係佢太年輕幼嫩既關係，喺大家眼中佢成日都好似成嚿雲咁，所以成為咗被大家「欺負」既對象。
望住佢地每一個，舊時既操班回憶點滴，呢刻好似走馬燈咁呈現於腦海當中…
「飲酒啦阿寶！發咩呆啊你？」千杯不醉秋過黎搭住我膊頭。
「無…諗緊嘢咋嘛。」我回應。
「諗咩諗到咁入神先？」阿秋問。
「無聊嘢者。」
其實我喺度諗緊，好唔好將想辭職既念頭講俾一班師兄弟知，但諗諗吓都係唔好講住，因為今晚係難得大家聚埋一齊既開心時刻，我唔想因為自己既事而大掃各位興致。
師兄弟另謀出路既例子其實唔係無，有啲中途轉做消防員，有啲過咗其他紀律部隊，有啲成功考上做消防隊長或者救護主任，有啲轉咗做政府文職…普遍都係留返喺政府部門入面工作。
但我既去向比較特別，一旦除低救護員呢套制服，我就等同脫離公務員行列。
諗真啲，假如真係做呢個決定既話，應該所有人都會覺得我傻，因為紀律部隊有宿舍可以住，公務員糧準福利好，係一般人眼中既鐵飯碗，有好多人想考入黎都考唔到，但如今既我竟然想劈炮唔撈…
無錯啊，因為我覺得人一世物一世，趁自己仲後生，仲有時間，想放手一搏試吓追求「夢想」。
呢個時候，三位主角終於黎到，佢地係我地操班時既教官，分別係陳sir，戴sir，仲有張sir。
一班師兄弟見到三位教官到場，立即企哂起身一齊大叫：「Good evening sir！」
「Carry on！Carry on！」陳sir係一個非常慈祥既大肥佬，聽聞佢未入學堂教書之前經已係咁既身型。
「人齊未？」戴sir為人比較嚴肅，操班既時候大家都好怕佢，因為佢真係好惡，見親面都會搵我地是但一個黎鬧。
「點解唔開定枝啤酒俾我架！？係咪想全部人落地做掌上壓！？」張sir身型比較高大，表面睇上去好惡好有威嚴，但其實內裡非常玩得，仲好劈得！
呢一晚全部人都好盡興，雖然食既唔係啲咩美酒佳餚，只係非常普通既酒樓菜式，但係我相信在場既所有人都一定有種滿載而歸既感覺。
單係嗰短短二十六週既操班經歷已經可以講足同笑足一晚。
嗰次某某因為睡房個廁所洗得唔乾淨，俾阿sir發現到，於是被罰做廁所長，要洗足廿六個禮拜廁所。有一次阿邊個因為唔記得剃鬚，俾阿sir罰做「掌上壓放題」，最後做到無力兼喊哂口。又有一次那誰落操場進行步操竟然唔記得喺制服上面貼自己個名牌，於是連累全班人都要受罰，所有人圍住學校跑咗足足二十個圈…
操班期間真係發生咗好多蝦碌嘢，每個人都曾經因為犯下低級錯誤而導致全體人一同受罰…
一人犯錯，全體受罰既原因，係因為教官希望大家記得，自己既輕率大意唔單止會影響自己，仲會連累到其他人。等同第時喺出面工作，假如做錯一個決定，影響既隨時係對方既一條人命，而呢條人命又會牽涉到一整個家庭。
三位教官經常將呢句說話掛在口邊：「以後邊個人犯錯，我唔會罰佢，但我會罰佢既隔離左右，因為我要佢永遠都記得呢種內疚同唔好受既滋味！」
操班時犯錯，就話俾人罰做掌上壓。假如出到黎做嘢，因為自己做錯嘢而累到人地無咗個爸爸或者無咗個女，到時就算喺人地面前做夠一萬下掌上壓都唔能夠作出任何彌補。
隨住年紀既增長，能夠開懷地放聲大笑既時刻變得越黎越少，但今晚我真係笑得好開心。
師兄弟呢樣嘢真係好奇怪，雖然大家唔係成日見，但每一次見面都總係會有多嘢講，每一次食完飯都係抱住依依不捨既心情散場。
雖然呢種「兄弟」關係未無任何血緣可言，但彼此之間就係有一份深厚既情感，因為…
嗰廿六個星期裡面，大家並唔係一同接受訓練咁簡單，而係一齊並肩戰鬥。