《我還是救護員的日子》: 4.7 人生百態 (三)
消防處總共有八個總區：
港島總區，九龍總區，新界總區，總部總區，消防安全總區，牌照及審批總區，行政科，救護總區。
八個總區裡面，就只有一總區係關救護事…
咁又難怪救護界一直被視為「二奶命」，消防既地位往往好似比救護高一等咁。
其實都啱既，因為假如一個家庭入面，有一個兄弟係同母異父，而另外七個兄弟係同父異母，咁當然係同父異母嗰七兄弟會團結啲。
團結係需要兩個人或以上先可以做到既事情，而救護總區就只得一個，唔通用左手同自己右手團結？
單係講「宣傳」呢方面，到底有幾多公眾係知道，救護服務被濫用既情況日益嚴重，資源其實係應該留返俾其他更有需要既人？
截至二零一五年，救護車被召喚既次數已經超過每年七十萬次以上，而呢個數字係每年平穩遞升，相信只會繼續升而唔會減，而根據觀察，每年既平均數字升幅大概係一萬五千，即每年至少多咗一萬人叫救護車…
呢啲數字唔係我作出黎，部門既年報入面可以睇到。
根據個人經驗，最少有一半以上既召喚都係屬於濫用。於救護員既專業角度，當佢地認為病人既傷勢及病情係毋須叫救護車，呢個情況可以被視為濫用。因為救護員係負責將病人送去醫院既急症室，而事實上又有幾多病情係屬於「急症」？
夜晚就無得好講，啲診所關哂門，市民想睇醫生既話或者真係需要到公立醫院急症室，但係佢地叫救護車既原因，其實係咪只係因為想慳錢同方便，當咗救護車係白色的士？
日光日白，行得走得，因為有幾聲乞嚏同咳而叫救護車…
無得傾，呢啲一定係濫用，而呢種情況其實遇唔少。
＃＃＃＃＃＃
或者只有行內人先知道，消防員同救護員既文化其實係有少少差別。
消防員既階級觀念比較重，比較看重「職級」同「年資」呢樣嘢。
舉個例子，救護員有時需要於消防局駐守，因為救護站分派咗部分救護車到消防局。呢個時候，救護員好多時都會同消防員撞口撞面，通常大家見到面都會打聲招呼，互相叫對方一聲師兄。
遇過有啲消防師兄係幾好，佢地夜晚開飯會特登留返幾碗老火湯俾救護員飲，可惜救護呢行實在太忙，有時都未行到入消防局個飯堂，或者係飲飲吓湯又會再次響鐘，然後又要去車。
相比之下，消防員去車既次數其實少好多，佢地有時間食飯，食完飯有時間休息，夜晚可以一覺訓天光既機率係相當高…
呢啲機會並不屬於救護員，不過無得好比較，始終工作性質上係有分別。
一句講哂，消防員返工係搵命搏，但救護員唔係，單係呢一句就已經將後者完全比下去。
不過，好多時救護員返工係搵緊命搏既時候，公眾係睇唔到。
試過有一次，喺樓梯口遇到個消防兩柴，我於是有禮貌地同對方打聲招呼：「早晨啊阿sir！」
但呢個消防兩柴竟然無任何反應，只係掂行掂過，就好似睇我唔到咁。不過當佢遇到喺我身後既救護三柴，佢立即表現得肅然起敬：「老總早晨！」
咁即係代表咩？
我膊頭係一塊白板，即係乜柴都無，於嗰個消防兩柴眼中，我根本乜都唔係，只係一名最低級既散仔。或者係因為咁，所以佢覺得無必要同我打招呼，但我主動向佢打招呼可能係應份。
呢種就係消防既階級觀念，喺救護入面係唔會有，或者好少見。
當然並唔能夠一竹篙打一船人，畢竟呢種文化係屬於老一輩，而老一輩都開始陸續退休，比較開通既新一代亦開始上位，隨住時間既推進，呢種古舊既階級文化將會逐漸消失。
救護員之間無呢種階級文化既原因，可能係因為呢行比較忙，根本無時間去搞咁多呢啲階段觀念既無謂嘢。況且一架車裡面只得三個人，一日去成十轉八轉車，大家係需要緊密合作，需要經歷一齊食唔到飯或者一餐飯分幾次食，需要一齊面對好多危急或者得啖笑既情況，所以救護車上面呢三兄弟，似手足多過似上司下屬。
＃＃＃＃＃＃
「救人大撚哂？返工時間泊架救護車喺路口，搞到成條路塞死哂。」
圖片中，一架救護車停泊於路邊，導致交通出現擠塞，三名身穿橙衣既救護員正在附近工作，場面被某位道路使用者拍低咗，對方仲將圖片擺咗上網，只係短短一個早上經已於各大社交平台被瘋傳…
而駕駛呢架救護車既司機正正就係我。
我選擇將救護車停泊喺呢個位置，係因為想方便大家做嘢，當時正處理一宗交通意外，一名亂過馬路既途人被車輛撞到，我地需要為對方進行急救。
對於呢張圖片，網民有好多不同既留言：
「救人就係大撚哂！」
「如果訓喺地下被搶救緊既人係你老母，你仲會唔會覺得係阻住？」
「嗰度係意外現場，救護車唔泊嗰度唔通泊喺你屋企？用個豬腦諗吓啦！」
「呢啲人心地好差，救護員喺度救緊命，你就影低佢想公審人地。」
「返工緊要啲定人命緊要啲？」
「OMG！How the fuck can you say that？」
「趕時間就搭地鐵啦仆街！」
「兩個字，自撚私！」
「樓主祝你生仔無屎忽。」
「DLLM！」
「留名等睇刪post。」
網民既留言一面倒撐救護員，無人撐嗰位將圖片上載到社交平台既事主。
我只係咁啱於討論區睇到呢幅截圖，因為事主於上載後唔夠十分鐘就已經將圖片刪除，可能係抵受唔住網民既圍插，於是要敗走。
諗起都覺得好笑，事主本身諗住網絡公審救護員，點知最後被公審既竟然係自己…唔知嗰位事主而家到底係咩心情呢？
我一邊喺救護站入面食飯，一邊瀏覽呢個討論區，我發現九成網民都意識到救人既重要性，唔會覺得救護車阻住哂，道路使用者更表示一定會讓路俾救護車。
我一邊睇，一邊會心微笑…
因為我覺得，自己終於見到人性既光明面。
大眾對救護員既認識一向都唔高，有啲人認為救護員返工係好得閒，應該得閒過消防員好多，但事實係相反。
有啲人認為救護工作好輕鬆好容易，只不過係包包紮紮，又唔使好似消防員咁入火場。但啲人無諗過，撇除入火場，其實救護員係幾乎乜都要做。
有啲人認為救護員經常偷懶，成日揸架救護車去買嘢食，但啲人見唔到救護員點樣將個飯盒分開幾次食。
有啲人唔識得尊重救護員，叫佢地白車佬，話佢地只係搬運工人，其實救護員都好想日日做啲好熱血既call，無奈市民普遍將救護車當成白色的士，於是救護員心入面嗰份熱血開始慢慢冷卻。
有啲人甚至唔認識救護員呢個職業，就算對方出現喺面前正在為身邊人進行搶救，啲人依然唔知道對方原來就係救護員，佢地係來自消防處。
其實我最想講既係，當救護員除低咗套制服之後，佢地同大家一樣都只係一個好普通既人。