《我還是救護員的日子》: 3.11 人生百態 (二)
朝早返工，剛剛換好制服就俾救護主任召咗上房。
坐低後，主任對我咁講：「最近有單投訴好似係關你事，知唔知係咩事？」
「唔知道。」自問最近無做錯任何嘢，就算係投訴都一定係無理投訴。
主任：「最近做call有無經過xx豪庭？」
我：「都有既。」
主任：「就咁既，有位女士投訴我地啲救護車聲開得太大聲，嘈住佢個仔訓晏覺…」
聽到訓晏覺呢三個字，我內心嗰團無名火即時著起，到底係訓晏覺重要啲，定救人重要啲？
究竟班市民識唔識得分輕重？如果出事既係佢地既屋企人，又會唔會嫌救護車發出既聲音嘈吵？
呢班住豪宅既中產，其實只係一班離哂地既冚家產。
主任又繼續講：「下次經過xx豪庭嗰陣，自己注意一吓啦…你明我講咩架可？」
「明…」屌！
佢呢番說話既意思，係叫我每一次經過嗰個地方都將救護車響號調到最細聲，細聲到無人聽得到，以避免再一次收到居民既投訴。
主任：「我稍後會向所有同事傳遞呢個訊息，希望以後唔會再收到類似投訴。」
「收到。」正一食屎狗。
成件事簡直就係本末倒置，救護車趕住去救人幫人，打開響號有咩問題？我自問每一次都唔係將聲音扭到最大，只係調較至適當既音量，令馬路使用者能夠聽到，我亦相信其他司機都一樣係咁做。
咁都要投訴？仲要係日光日白？
夜晚去車既時候，司機多數剩係著藍燈而盡量唔打開響號，因為我地會企喺市民立場諗，呢啲聲音或者會擾人清夢。到真係好有需要既時候先至開一開，提醒一吓附近既人，因為救護車要趕赴現場，將會衝紅燈甚至會加快速度。
面對市民投訴，呢班上司永遠唔會諗吓點樣幫大家拆解問題，而係叫班喺前線打緊仗既伙記下次做好啲。
離開咗主任個辦公室之後，局內立即響鐘，係一宗男性長者呼吸困難既案件。
我將救護車駛到事發大廈既附近，一推門落車，就有個阿婆氣沖沖咁行埋黎，旁邊仲拖住個著住校服既小妹妹。
「死白車佬！拍架車喺度阻住哂！」阿婆第一句就鬧。
「有咩問題啊婆婆？」我好聲好氣問。
「我個孫女要返學架！你架白車泊咗喺校巴平時停嗰個位啊！」
「哦…咁咪叫校巴司機泊前啲囉，救護員趕住救人啊，唔同你講喇。」
然後阿婆一輪咀講咗一堆唔知福建話定潮洲話，雖然唔知講乜，但內容一定係鬧緊我，最後我終於聽到一句我聽得明既廣東話：「死仆街！抵你一世揸白車啊！」
去到現場，病者係一位八十幾歲既伯伯，佢條氣好促，SPO2偏低，情況唔太理想，要盡快送院。
當升降機門打開，我地準備推張輪椅入去既時候，道門竟然隨即關上。我於是按制再次打開升降機門，但見到裡面有個師奶，佢對住我地幾個目露兇光：「妖咪阻住我啦，我趕時間架！」
都未黎得切反應，升降機門已經再次關上。
算，既然對方咁唔友善，我地唯有等一部。
等咗一分鐘，下一部升降機終於到。
裡面企咗個女人，或者佢見到伯伯既情況唔多理想，個女人竟然露出一副嫌棄不屑既表情，然後擰轉身搵個背脊對住我地，就好似去到大酒店屬牛屬馬要迴避咁樣。
咁樣算係岐視定點？有邊個想病得咁辛苦？
只係短短一個早上，就一連串發生幾件令人感到相當洩氣既小事，而呢啲小事既背後顯露出好多人性既醜態。
＃＃＃＃＃＃
可能係當日心情不太好既關係，遇到既call多數比較危急，DBA都做兩單…
係吸引力法則。
呢行真係有氣場呢樣嘢，心情同信念係會影響到當日接啲咩類型既call，假如當日心情係豁然開朗，做既call都會特別輕鬆。
臨放工既時候，突然收到一轉「懷疑有人被困於大廈平台」既call...
Lock in？
唔係…唔係普通lock in 咁簡單…
只要稍為諗真啲，就會意識到字面意思背後既真相。
好地地一個人點會無情白事被困於平台？
如果事發地點係大廈平台既話，一係行入去，一係喺高處跌落黎…
文字如此描述既原因，可能係因為報案人係由高處望落去，見到有人喺平台度，於是報警。
而我心底經已有所打算，呢宗應該係一宗跳樓案件。
然而，事實亦證明咗我既推斷係無錯。
去到現場，一大班警察消防都已經到場。
經過一樓平台既時候，我已經見到欄外既地上訓咗個男人，成地都係血。我留意到男人既雙目係打開，俗稱既「死不瞑目」。
！？
見到呢個畫面，我感到有啲震驚，唔係因為死狀恐唔恐佈既問題，而係因為…
我覺得呢個人有啲熟口面。
然後我記起，呢個男人係無幾耐之前一宗呼吸困難個案既事主，佢以前係一位古惑仔，名字叫阿財。
主管為男人進行檢查，我亦有上前幫手。
當我摸向對方個頭既時候，發現觸感完全唔似摸緊一個人頭，而似係摸緊一個經已完全漏氣既皮球…
因為對方既頭顱骨已經碎哂。
當掂到對方肢體上既皮膚，亦有種凹凸不平既感覺…
因為對方四肢既骨頭經已完全粉碎，斷裂部位既尖刺向皮膚表層撐起。
由於見到腦漿流出，主管宣佈係明顯死亡。
心情有啲沉重，因為於不久之前我曾經勸過呢位阿財入醫院，當時既畫面仍然歷歷在目。之後佢出院並返回到自己住所，但最後出現咗而家呢個結局…
佢可能係厭世，可能係覺得唔想俾個病繼續纏繞落去，於是選擇結束自己既生命。
原因係乜，相信只有阿財自己先知。
由於係明顯死亡，我地只好將裝備執拾好然後離場。
當時天色經已變黑，經過樓下公園既時候，我見到一班小朋友喺度玩得好開心，周圍佈滿嘻嘻哈哈既歡笑聲，與剛才一樓平台相比，簡直就係兩種完全唔同既氣氛，兩個截然不同既世界，一邊係絕望，一邊係快樂…
而我彷彿係一個需要不斷於呢兩個世界之間遊走既人。
從小朋友既歡笑聲當中，我感受到佢地既無憂無慮，童真…仲有希望。
呢種生命上既強烈對比，再一次令我確切體會到，人生其實係充滿住無比既唏噓。