《我還是救護員的日子》: 3.10 濫用(二)

救護車被濫用既情況一直都存在，而且越黎越嚴重，但我遇過最離譜既濫用，係以下呢單。
 
臨近收工時間，忽然接到一單令我感到莫名奇妙既call。根據資料顯示，病況就只有四隻字：身體不適。
 
叫得救護車就一定係身體不適，但究竟係邊度不適至得架！？
 
今次既案發地點並唔係住宅單位，而係喺街上面。
 
我將救護車駛到案發地點附近，但一直發現唔到報案人既行縱，主管益哥於是打電話俾報案人，話俾對方知救護車所在既大概位置。
 




過咗一陣，我見到有人揮哂手咁跑過黎：「咦…似係呢一男一女喎！」
 
輝仔：「仆佢個街…行得跑得都要叫救護車！？」
 
一對中年男女上車坐好後，益哥問：「咩事叫救護車？」
 
男人率先開聲：「係我報警既阿sir，我老婆頭先想去廁所小便，但屙極都屙唔出，我驚佢身體唔知有咩事，所以想去醫院檢查吓。」男人既說話腔調唔似係香港人。
 
聽完對方解釋之後，相信我地三個心入面都有團無名火起。
 




輝仔：「屙尿屙唔出！？你咪坐耐啲坐到屙得出為止囉！」
 
「我屙咗幾次架喇，明明係好急，但坐好耐都屙唔出。」女人說話既腔調比男人更唔似香港人。
 
益哥：「咁你而家有邊度唔舒服丫！？」
 
女人：「好急尿囉，谷住谷住咁。」
 
我：「咁你覺得救護員有咩可以幫到你呢？」
 




女人：「我想去醫院呀嘛，所以咪叫你地黎。」
 
輝仔：「其實你行得走得，可以自己搭車去。」
 
男人：「因為我地本身唔係住呢度，今次只係黎探人，我地唔知醫院喺邊，又唔知喺邊度搭車，所以...」
 
益哥打斷咗男人既話，一臉唔耐煩：「得喇得喇…同你做啲基本檢查先。」
 
女人：「可唔可以快啲開車，因為我真係谷得好辛苦。」
 
益哥：「如果想快就坐的士，叫得救護車就緊係要做啲檢查架啦。」
 
「哦…」女人無言以對。
 
然後我好似平時一樣，幫個女人量吓血壓同探吓熱。




 
男人察覺到氣氛有啲異常，於是夾硬搵嘢講，打算緩和一吓氣氛：「你地啲救護車都幾快架喎，幾分鐘就黎到。」
 
「緊係啦，救護車係用黎救命架。」益哥講「救命」呢個字既時候，刻意加重語氣。
 
男人：「做你地呢啲係咪都需要輪更架呢？」
 
輝仔：「當然要啦，我地日日都俾市民輪姦！」
 
做完檢查，準備開車既時候，個女人忽然解開安全帶企咗喺身。
 
輝仔：「麻煩你坐低扣返好安全帶，我地準備開車。」
 
女人：「但我個肚真係好唔舒服，谷得好辛苦，我可唔可以企喺度？」
 




益哥：「唔可以！萬一行車途中發生啲咩意外咁點？」
 
男人拍一拍女人手臂：「哎…你坐返低啦，好快到醫院架喇。」
 
女人一臉心不甘情不願，但喺自己丈夫既勸喻之下，最後都坐返好。
 
「坐好喇嘛！？咁我開車架喇。」我問。
 
當時有種好洩氣既感覺，洩氣並唔係因為接到呢轉call而導致遲收工，而係因為我覺得呢個世界真係好荒謬…
 
諗真啲，仲有咩荒謬得過急尿屙唔出然後叫救護車？
 
曾經聽某師兄講過以下呢番說話：「我情願做一轉call，嗰轉call係動用哂救護車上既所有裝備同物資，都唔想日日做啲濫用救護服務既垃圾call。」
 
我諗我明白佢既心情。