《我還是救護員的日子》: 3.3 呼吸困難

SOB (Shortness Of Breath)，呢類call好多時都會遇到。呼吸困難可大可小，病人可能有氣管病或者肺病，而哮喘屬於常見。
 
呢種情況，救護員會比較緊張病人既SPO2，當發現SPO2唔理想，就要立即供應高濃度氧氣
，甚至轉用另一款強勁少少既面罩，以助谷返病人既SPO2上去理想範圍之內。
 
同時，亦會監察病人既呼吸頻率(RR，Respiratory Rate)，呼吸不宜過快，否則唔能夠將氧氣/氣管藥有效地吸入肺部。
 
救護員會有相應既氣管藥提供，好多時呼吸困難係因為氣管收窄，而噴藥有助擴張氣管。當然，用藥與否要視乎病人自身健康條件及身體情況，有啲情況係不適用，例如病人本身對嗰隻藥係有敏感。
 
呼吸困難既病人通常會比較緊張，因為感覺好似就快窒息咁，救護員好多時要費力去安撫病人情緒。




 
「嗱…你放鬆啲先，你咁緊張都無用架，吸氣吸大啖啲…」
 
「唔好講嘢住啦！專心啲聞氧氣！」
 
「抖氣唔好咁快，你吸氣都唔夠深，啲藥都落唔到去…」
 
「跟我打數，吸…呼…吸…呼…係喇，保持住呢個節奏…」
 
係啊，又真係幾似大肚婆生仔。




 
我職業生涯中第一次俾人投訴，就係做呼吸困難既案件。對象係一名中年男人，當時我只係按照正常程序俾氣俾藥，俾俾吓藥，個男人突然推開我：「妖…你整到我好唔舒服啊！」
 
「先生，你繼續聞藥啦，啲藥對你有幫助架！」我好聲好氣咁講。
 
「你而家咩態度啊？你份糧我都有份出架！」個男人明明條氣仲喘緊，但又要唔合作，仲惡人先告狀。
 
「我都係想幫你者。」我望望監察儀器屏幕上啲數字，發現SPO2指數正在慢慢回升，男人既呼吸亦無剛才咁急促。
 
「你叫李寶明？」男人望住我個名牌。




 
我無出聲，但內心感到非常無癮。
 
「我一定會投訴你啊！等收投訴信啦你！」
 
非常無奈，明明係我幫咗佢，而家竟然話要投訴我。
 
跟足程序做嘢，仲一直安慰佢，由頭到尾根本都唔知自己做錯啲乜。
 
既然對方話唔想聞藥，我都無謂勉強。最後男人連氣氧罩都話唔戴，我亦幫佢除埋。
 
一段時間之後，我果然收到投訴信，當聞悉自己被投訴既時候，我就回想起呢轉呼吸困難個案，心知一定係呢個男人。
 
「知唔知發生咩事？」辦公室內，救護主任問。
 




「…...」我點點頭，連嘢都唔想講。
 
主任問我當時既事發經過，我簡略地作出描述。聽完之後，佢竟然話：「下次自己注意返啲態度啦，其實病人已經唔舒服，我地要為對方諗多一步，做我地呢行要有同理心。」
 
聽完之後，真係火都滾埋。
 
叫我將來龍去脈講俾佢知，但佢聽完之後等如無聽，事實係個男人唔知痴咗邊條線忽然向我發難，我亦多次重申自己當時態度無問題，然後呢位救護主任竟然叫我注意一下工作態度。
 
咩叫為對方諗多一步！？對方無緣無故鬧我祖宗十八代，我仲要體諒對方鬧我背後一定係有苦衷！？
 
同理心…呢三個字最仆街，我對病人就要有同理心，但主任你對我地班手足又有無同理心！？
 
當前線同事俾人投訴，作為上司竟然可以完全唔企喺我地角度去諗，仲掉返轉頭要同事去作出檢討，啲說話真係難聽過粗口。換轉被投訴既係你，我向你講返同一番說話，你又會唔會服啊阿sir？
 
聽完廢話之後，我趕快離開辦公室，連thank you sir都無講，因為我覺得呢啲人唔值得我叫佢一聲阿sir。




 
＃＃＃＃＃＃
 
另一單比較深刻既SOB，係發生喺夜晚十二點，地點係舊式屋村。
 
對象係一名行動唔太方便既阿叔，佢大概六十歲，行路需要靠拐杖。
 
一入到屋，我地就發現佢呼吸好急促，SPO2得返85。了解情況之後，主管決定為對方提供氣管藥。
 
「阿 sir，我唔去醫院架！」阿叔一邊聞住氧氣一邊講。
 
主管：「唔去醫院！？你知唔知自己咩情況啊！？入醫院檢查吓，等醫生幫你啦。」
 
「我唔去！」
 




唔知點解，有啲人係好堅持唔去醫院，就算自己病到死死吓。
 
屋內有兩個人，報案既另一個男人，據悉係呢位阿叔個仔，但表面睇落佢地既關係連朋友都不如...又係家家有本難唸的經。
 
「你條氣喘到咁…醫院有床俾你訓，有藥俾你食，有護士照顧你，點都好過留喺屋企啦。」我試圖作出勸喻。
 
「我都話唔去咯！你俾張紙我簽，簽完你地就走啦！」
 
睇黎佢都幾熟行情，應該唔係第一次叫車，知道可以簽「拒絕送院」表格呢樣嘢。
 
主管：「咪咁硬頸啦…入去檢查吓，檢查完無事咪出返黎囉！」
 
「唔去啊，我唔想麻煩到人…」
 
我望望檯上啲信件，發現原來呢位阿叔個名叫張X財：「阿財哥，其實我地都一場黎到，唔麻煩都麻煩咗…你諗真啲喎，如果一陣我地走咗，然後你條氣又喘過，我地咪又要黎多次？到時先係麻煩喎！」




 
聽完我咁講之後，我留意到佢眼神出現一絲動搖。
 
其實嗰句說話係真心話，如果而家唔去醫院，然後半夜三更又再叫車，我地又要上黎多一次。
 
最後，阿財肯聽我地勸，我地用輪椅運送佢上救護車。
 
上到車之後，我同阿財吹咗陣水，閒談間得知佢以前原來係一名古惑仔，結過兩次婚，有個好多年無見既女。
 
呢轉SOB 我無俾人投訴，因為阿叔同我吹得幾開心，仲讚我呢位後生仔既服務態度好好。當佢講到舊時劈友開片既情形，仲成個人變得生龍活虎，連自己本身有氣喘都唔記得咗。
 
做救護呢行會遇到好多人，呢啲人有唔同背景，個個都係有故事的人。
 
有啲人好有錢，份人好離地，認為自己有份交稅就大哂；有啲人好窮，明明病得好重，但好怕麻煩到人…
 
真係一樣米養百樣人。