《我還是救護員的日子》: 3.2 Lock In

「特別服務，懷疑有人被困，生命有危險…秋名山去456號救護車...」
 
懷疑有人被困，呢類案件一般被稱作Lock in。
 
通常係當事人被反鎖於屋內，無人應門，於是門外既人報警。或者係平安鐘啲姑娘聯絡唔到單位內既公公婆婆，擔心佢地出咗事，於是報警求助。而好多時公公婆婆回應唔到平安鐘姑娘，係因為佢地落咗街買嘢，又或者本身佢地係撞聾，於是聽唔到電話中姑娘對佢地既叫喚。
 
只要係特別服務，消防員就會一同出動。做呢類型既call，佢地通常係負責爆門。
 
爆門入去之後，可能會發現一具死咗好多日既屍體；又可能係根本無人喺度，屋主只係落咗街；又可能係事主心臟病，入到去發現對方訓咗喺地，救護員需要立即進行搶救。
 




每次接到Lock in，我都係抱住「最好乜都唔使做」既心態去車，因為無嘢做即係無人有事。
 
試過有一次，係一個小朋友將自己反鎖咗喺屋企個廁所裡面，出唔到黎。家長感到手足無措於是報警，勞動哂警察消防救護，總共十幾廿人。
 
去到事發單位，消防員三兩下手勢就打開返廁所道門，小朋友出返黎，似乎有啲受驚，但無任何受傷，無乜大礙。
 
報警既人係一位婆婆，當時屋內只有呢位婆婆同個小朋友，而小朋友係婆婆個孫仔。
 
小朋友被反鎖於廁所裡面，自己又唔識處理，又諗唔到原來可以搵鄰居幫手，於是報警求助。雖然動用咗好多人力物力，但老人家唔識嘢，無得好怪。
 




「孫仔出返黎喇，但搞到好大陣象啊，好多人上咗黎屋企啊…」婆婆同電話中既人講，電話既另一邊應該係小朋友既父母：「又警察，又消防員，又看更，仲有啲著住白色衫既唔知咩人…」
 
真係悲涼，萬一你個孫仔有啲咩損手爛腳，幫佢既人會係我地，你竟然話我地係著住白色衫既唔知咩人…
 
估唔到市民對救護員既認知程度仲低過看更。
 
不過都唔緊要，畢竟係老人家，唔認識救護員都正常既。
 
小朋友相安無事，各單位陸續收隊。由於對方無任何損傷，所以唔需要送院，最後由婆婆簽張紙，我地就可以離開。
 




臨離開之前，我同婆婆講：「婆婆，我地係救護員，如果之後孫仔有啲咩唔舒服，就再叫我地黎啦。」
 
婆婆面露疑惑：「哦…原來係救生員…唔該哂你地…唔該哂你地…」
 
＃＃＃＃＃＃
 
另一單Lock in，係一個唔記得帶鎖匙既女人報警，時間係黃昏。
 
去到現場，透過女人同警察之間既對話，得知佢係啱啱放工返屋企。佢有個仲讀緊大學既女，大約二十歲，今日放假理應會留喺屋企，但拍極門都無人應，電話打極又無人聽。女人擔心個女唔知出咗咩事，於是報警。
 
我依舊係抱住「應該無料到」既心情出發，但爆門入屋之後，阿媽發現個女訓咗喺床上面，叫極都唔醒。有見及此，我地於是上前檢查。
 
就咁望埋去，個女仔既面色已經好唔妥…
 
點唔妥法，形容唔到，總之唔係一個正常人應該有既面色。




 
主管檢查之後，發現個女仔無咗呼吸脈搏，身上無明顯傷痕，但手腳有啲僵硬，皮膚上更呈現出明顯既屍斑...
 
係明顯死亡，估計已經死去至少十個小時。
 
個女人知道自己個女經已去世，當場崩潰大哭。
 
在場所有人，包括救護員都無嘢可以做到，根據部門指引，我地毋須為事主進行搶救。
 
點解個女仔會忽然去世？
 
無人知，或者要等法醫驗屍過後先知。
 
我剩係知個女仔好後生，廿歲左右，仲讀緊書，本應有大好青春大好前途。
 




遇到呢啲case，個心會好唔舒服，原來做人真係可以咁化學，話無就無。
 
「無常，係救護員既工作日常。」
 
呢句說話真係好啱。
 
主管處理好善後工作，就吩咐盡快離場。剩低既事，就留返俾其他部門同事去處理。
 
「費事留喺現場咁耐喇，睇見人地咁樣，盞自己個心更加唔安落。」上到救護車，主管咁講。
 
的確，救護員係唔應該投放太多情感於工作，若然因為咁而影響到之後既工作效率，實在太唔專業。但要做到無動於衷，係無可能既事。
 
回程途中，我不禁喺度諗，其實呢種事幾乎每一日都發生，只係睇吓邊個咁唔好彩俾死神揀中。
 
我又會諗，假如係自己屋企人或者朋友出事，我又能唔能夠保持冷靜？




 
相信無一個人得，人就係有感情既動物。
 
珍惜身邊人，活在當下，雖然呢兩句說話真係好老土，但又有幾多人能夠真正做得到？