《我還是救護員的日子》: 3.1 P Call
轉院服務，即P call。(P = Priority)
P call 分P1 同P2，第一優先接送同第二優先接送。
呢類call無乜特別，純粹係將病人由一間醫院運送去另一間醫院，轉院既原因可能係由於某間醫院既床位緊絀，於是醫院要將新接收既病人運送去其他醫院。又可能係病人即將要做某啲治療或者手術，但原本住緊嗰間醫院無相關既儀器或專科醫生，於是救護員要為病人進行轉院…
轉院既原因可以有好多，總之醫生示意話要轉，病人就要轉，救護員其實只係收Order做嘢。
P1情況相對急啲(但其實一啲都唔急)，救護車要著藍燈去接取病人。P2相對無咁唔急(直情可以慢慢黎)，行車途中唔需要著藍燈。
唔好問點解要著藍燈，點解唔著藍燈，因為呢個係部門既指引，假如唔跟就等同犯錯，而犯錯就有機會要受到紀律處分。
救護呢行入面，P1同P2既分別在於時間上既唔同。當部門收到醫院既P1指示，要即時調派救護車去處理。而當收到P2，部門有一個鐘時間安排救護車接收病人。
至於到底病人係屬於P1定P2，就由醫生去定。
救護員一聽到係P2 就會好開心，因為呢類call比較輕鬆，大家可以趁住呢個機會休息吓，只要達到「救護車十二分鐘內到達現場」既服務承諾，過程可以點樣控制都得。(呢句說話背後蘊含住博大精深既意義，只有做過呢行既人先會明。)
不過P call對於司機黎講就會辛苦啲，因為有機會要揸長途車，一揸就隨時成個鐘。
轉院服務交俾救護員去處理既原因，係由於擔心病人於運送過程中出現病情惡化，從而需要進行搶救。假如由醫管局既一般職員及車輛去運送呢類病人，若然病人於半路中途出咗啲咩意外，職員並無相應儀器同技術去為病人進行搶救。
P call 其實係有機會演變成DBA，因為病人於行車途中忽然斷氣。聽聞係曾經發生過，但我未遇過。
基本上，P call係接近乜都唔使做，只係俾張床個病人訓，但若然因為咁而放下所有戒心，諗住全程可以玩電話，乜都唔使理既話，到出事嗰陣就大件事，所以最基本都要監察住對方仲有無呼吸心跳。
某次剛剛喺局食完飯，就收到一轉P call，我地三個人立即化身為草猛跳忘情森巴舞，因為呢轉P call係來得非常合時，簡直就係食飽飯進行消化既良好時機。
假如啱啱食飽飯就要去攀山拯救，我地既反應會係完全相反，三個人好似生意失敗咁。不過總好過飯都未食就要去行山，因為行一行山分分鐘要搞幾粒鐘，即代表唔知幾時先食到飯。
呢轉P call比較深刻，因為對象唔係平時處理開既嗰啲老人家發燒，而係一名只有幾歲既小朋友。
呢名小朋友患有魚磷症，固名思義，佢全身既皮膚望落去好似魚磷一樣，皮膚異常乾燥，全身既皮好似就快甩出黎咁。由於皮膚長期處於乾燥，所以會經常感覺到痕癢，假如龜裂情況嚴重更會感覺到痛，而呢種病目前好似仲未有根治方法。
有時會諗，個天其實公平咩，要一個幾歲既小朋友受埋啲咁既苦。
小朋友係由媽媽抱住，但可能救護車裡面環境陌生，又見到幾個著住白衫既陌生人，於是喊起上黎。
平常見到小朋友喊，我通常都唔會點理，等家長自己搞掂，但唔知點解今次我想做返啲嘢。
我拎咗隻手套，然後當手套係氣球咁吹脹佢，再喺上面簡單畫咗個笑哈哈表情…雖然呢個氣球係怪咗啲，有五條嘢喺個頭頂度擺吓擺吓，但係小朋友見到我呢個手套氣球之後，立刻收咗聲，仲眼甘甘望住我。
「送俾你！」我將手套氣球交到小朋友手上，而小朋友亦終於笑返。
「唔該你啊阿sir！」小朋友媽媽一臉感激。
開車之前，我落低咗窗簾，以免刺眼既陽光會影響到小朋友。
我再將冷氣調細，因為剛才我將氣球交俾小朋友既時候，我摸到佢隻手好似有啲凍。
最後我關咗車上既部分燈光，等小朋友同媽媽於行車期間可以喺一個暗暗地既環境底下進行休息。
雖然只係一轉P call，但我無選擇去揸流灘，反而想做多一步。
呢個世界裡面比自己更慘既人其實多不勝數，或者我已經算係幸福既一群。
＃＃＃＃＃＃
做P call有時係要運送初生嬰兒，嬰兒會被安置於育嬰箱當中。救護車裡面張床需要暫時放低喺局，因為育嬰箱某程度同救護車床設計相似，可以安放於同一位置。由於空間有限，救護車床同育嬰箱兩者並唔能夠共存。
呢類call其實無乜特別，但重點係有護士跟車。
唔少救護員之所以識到護士，仲娶埋做老婆，都係靠運送育嬰箱呢啲機會。
根據我經驗，護士通常有兩個，其中一個年資較淺。
當時我仲係做緊車籠，間唔時都會接到運送育嬰箱既call。車程二十幾三十分鐘，甚至更耐，點樣可以同到兩位護士進行有質素既交流，而又唔會被對方視為呃水吹既狗公，就要睇自身既造化及功力。
運送過程中無乜嘢搞，只係觀察住個初生嬰兒有無啲咩特殊情況，一般都唔會有咩問題。就算有，護士都會自己落手搞。
面皮厚啲既，主動同護士講吓嘢吹吓水，對方點都會大方回應。
「咦…你咪係之前嗰個阿sir？」其中一名護士忽然同我講。
聽到有人叫自己做阿sir，即刻有種飄飄然既感覺。
佢戴住一副無框眼鏡，口罩底下既輪廓望唔到，睇落幾籤瘦，斯斯文文咁。
前幾日都做過一轉育嬰箱，無諗過竟然可以咁有緣，連續撞同一個護士兩次，整定有緣份，而我點可以唔好好把握呢個緣份。
「係啊，咁你都認得我？」我回應，但並無將口罩刻意拉低。
「嘻…因為我記得你個名。」佢笑既時候，雙眼變得微彎，好似連眼睛都識得笑咁。
嗰一刻我終於發覺到，原來制服上面掛名牌竟然係有好處。
「哦…你真係好記性。」雖然我只係淡然回應，但其實心裡好想問返對方叫做咩名。
坐喺司機位既細華師兄似乎聽到我同護士既對話，忽然擰轉頭望住我，仲豎起拇指，拉低口罩露出一種非常奸淫既微笑。
整個運送過程入面，兩名護士一直互相交流心得，年資較深嗰位講好多嘢比另一位聽，我完全搵唔到位可以插入去。
到達目的地醫院，我地會幫手將育嬰箱搬落車。(育嬰箱好重，越多人幫手越好。)
臨離開既時候，嗰位認得我既護士過黎拍咗我一下手臂：「喂！」
我回身：「咩事！？」
護士：「我叫Iris。」
我點點頭，指住自己個名牌：「阿寶。」
佢又向我點點頭，然後慢慢退後，轉身離開。
唔知我地仲有無機會再見，而事實上好大機會係無，就算再見都未必認得。
我並無因為無攞到對方電話而覺得蝕咗，因為大家本身就天各一方。
但我學識到，原來呢一種邂逅既感覺真係好正。