《我還是救護員的日子》: 2.9 濫用(一)
最令救護員感到洩氣既其中一個原因，大概就係經常接到醉酒案件。
醉酒都有分幾個情況，第一種係醉到貓咗，郁唔唔郁，好似昏迷咁。由於有人報警，救護員於是要將呢名醉酒人士送去醫院。基本上，除咗俾張床對方訓，其實係無咩治療可以俾到，因為對方各方面既指數都好正常，只係醉到訓著咗。
第二種係醉到發酒癲，呢啲最麻煩，因為失去咗理性，喺度郁手郁腳，做埋啲正常人唔會估得到既行為，例如喺你面前除褲屙屎，例如將啲唔應該擺落口既嘢擺落口…
啱啱屙完屎，你話有啲咩係唔應該擺落口？
情況簡直係層出不窮，有時情願對方醉到冧咗，當佢係一件貨咁運去醫院，咁樣大家都可以舒舒服服。
第三種係玩歡樂噴泉，嘔到五顏六色，最怕就係遇到呢種情況。有時喺救護車上面嘔到成地都係，唔單止要搞一大輪事後清潔，仲搞到車入面成陣臭味，然後一整日都隱隱約約聞到呢陣味，好難頂。
如果套制服俾對方啲嘔吐物整污糟咗，之後要返局更換過一套新，又係麻煩。
入正題之前，又想分享一吓啲經歷。
12月31晚，狂歡之夜返工，預咗要做通頂，因為十轉裡面有九轉都係醉酒，而且救護車所到既地區可能會越去越遠，因為各個環頭既車都喺度忙緊處理醉酒，所以啲車會被調派到亂哂。
今次既事發地點可以開名，係中環蘭桂芳，凌晨三點鐘接到一宗外藉人士醉酒。
現場有警察，救護電單車…你無聽錯，係救護電單車，為應付特別節日，有時電單車都要被安排返夜班。
當時個電單車我地都識，佢個名叫阿基。
個外國男人飲到好醉，就咁大字形訓咗喺條街度。聽警察講，本身係有個外國女人同行，聽聞好似仲係鬼佬個老婆黎，但個外國女人已經自己截的士走咗…
莫名奇妙，兩公婆出黎飲嘢，飲醉咗竟然可以就咁扔低個老公唔理，原來不知所謂並唔係香港人既獨有權利。
「送去醫院囉，老婆都走埋咯。」其中一名警察咁講。
在場有幾名警察，其中一個係著白衫既Madam，膞頭上面有花。
「頭先佢老婆走嗰陣，你地都喺度？」阿基表現得有啲燥。
莫講話佢，就連我地都做到燥，開工到而家完全未停過，做親都係醉酒。
「喺度...個鬼佬都想上車架，但醉得濟呢，上到一半又碌返落地…佢老婆都醉啦，自己個老公未上車都唔知。」
「咁你地睇住見住，都唔幫手的埋條鬼佬上車？」
班警察無回應，只係詐傻扮懵咁繼續講其他嘢。
「師傅，係咪準備送佢去醫院？」隔咗一陣，另一名職級較高既警察問。
廢話，唔通送去你屋企咩。
遇到呢啲情況，警察最叻就係將個波一嘢踢俾救護，仲恨不得我地快啲抬個醉漢上車，因為佢地可以快啲收隊。
目測之下，個鬼佬起碼有二百幾磅，將佢抬上床嗰陣，我感覺到自己條腰好似就快斷。抬咗對方上床，佢身長仲長過我地張床，對腳係長到頂住我個心口。
推床走既時候，其中一名警察諗住幫手扶住張床，但由於佢唔熟點樣推床，某程度為我地添上少少阻力。
有份幫手推床既阿基突然開聲：「喂我屌啊！咪撚拉住我地張床啦，我推緊你又喺度拉，玩啊！？」
「好好好，幫唔到手唔緊要，唔使咁勞氣既師傅！」個警察立即縮手，笑笑口想打圓場。
當時我心諗…屌得好。
自己伙記俾人鬧，但個女Madam完全唔敢出聲，望都唔望，因為佢自己心知而家啃緊豬頭骨既係我地，佢地只係拍吓籮柚走人。
結果，當晚夜班係第二朝五點幾先第一次揸車返到局。
另一單既醉酒地點係某條普通屋村，對象係妙齡少女。
一打開升降機門，就見到有一名身穿白色小背心配牛仔熱褲既長髮少女訓咗喺地。
地上面有一灘頗大範圍既嘔吐物，估計係屬於呢名少女，而佢正正係訓咗喺灘嘢上面，全身包括頭髮都沾滿哂自己既嘔吐物。
老實講，個女仔睇落係幾索，但係佢而家搞到咁既款，真係見到都有啲唔開胃。
同場有兩名年輕男士，應該係事主既朋友。
益哥：「你地幫佢報警架？知唔知佢住邊？」
其中一名男士指住條走廊：「佢就住喺前面個單位咋嘛。」
當時心裡面真係屌咗一聲，仲爭兩步就返到屋企都唔頂埋佢。
仲有，既然屋企門口就喺前面，咁仲叫乜鬼嘢救護車呢？兩個大男人扶返佢入屋咪得。
「送佢去醫院啦阿sir。」另一名男士。
今次連我都忍唔住要出聲：「返屋企會唔會近啲啊哥哥？」
「佢而家咁既款，返到屋企又無人睇住，我驚佢搞唔掂啊。」
有咩會搞唔掂，飲醉酒咪返屋企訓，訓飽就自然會醒。
「你快啲送佢去醫院啦阿sir！」兩個人不斷催促，好似好趕時間，想快啲甩身咁。
講到尾又係將個波踢俾救護員。
由於個女仔成身好都好污糟，我地只好用幾張床單將佢包住，然後再抬佢上床。
當我地三個準備將佢抬上床之際，少女突然用雙手捏住自己條頸，大嗌想死，仲不斷話做人好辛苦。
有見及止，我地即刻彈開，慎防佢發酒癲亂咁揮拳，搞到我地自己都傷埋。
「我想死啊…點解個天唔俾我死…」少女不斷重覆呢兩句。
！？
然後，少女用頭頂住個地下，以類似拱橋既姿勢將自己身軀撐起，形態有啲似電影裡面既驅魔人。
「我想死啊…我想死啊…俾我死啊…」少女一雙手依然係捏住自己條頸，而且力度好似有所增加。
為免醉酒變成窒息，我地三個人夾手夾腳拉開佢雙手，一嘢抬佢上床，然後離場走人。
不過將佢抬上床既時候，由於佢個頭係咁郁，把長髮不斷擺來擺去，頭髮上面啲嘔吐物於是黐哂落我件白色制服上面。
唉…一陣返到局又要換衫。
「你呢個死仆街，無良心啊你…」上到救護車，少女不斷對住空氣破口大罵，好憤怒，好兇惡。
「如果我今次死唔去，我一定會返黎隊冧你…」佢突然又變返好傷心，好柔弱，然後不停喊。
「係你！」少女忽然指向我，將我變成佢既發洩對象：「你無用架！你呢個死仆街！」
無情白事俾人鬧，但我無嬲，反而覺得有啲好笑。
「你呢種人，一定會落地獄，俾上帝鞭你屍…」
地獄…？上帝…？
說話內容可以話係語無倫次，完全無跡可尋。
「你呢啲人死無全屍都唔使恨啊…係你…一日最衰都係你…我一定要俾返綠帽你戴…」
嗯…綠帽。
「佢有咩比得上我啊！？我靚佢咁多！係你條冚家產唔識貨！」
佢…第三者？
「做咩唔應我啊！？無嘢好講？知衰喇咩？知道自己唔啱喇咩？」
我唔係唔應你，但假如我應咗你，咪即係自認仆街冚家產？
「鬼唔望你有愛滋病…你條死癲佬….」
講吓講吓，少女漸漸變得迷迷糊糊，然後訓著咗。
從佢既說話當中，我大概估到發生咩事，九成都係男朋友出軌，被對方狠心拋棄，於是就借酒消愁，醉到而家咁既款。
我認為醉酒call係一種濫用，救護服務唔應該用喺醉酒人士身上。
醉酒call通常都係發生喺半夜三更，甚少出現喺日光日白…
有既，唔多囉。
如果唔係嗰一兩轉醉酒call，夜晚或者可以爭取多少少時間休息，就算係一兩個鐘都好。又或者即使無得休息，如果可以做其他有意義啲既call，幫一啲真正有需要幫助既人，條氣點都會順啲，因為起碼係做緊一啲同呢套制服相關既嘢先。
有句說話叫生命影響生命…
其實係市民既生命影響緊我地做救護員既生命。