《我還是救護員的日子》: 2.6 問症

入正題之前，想講吓關於救護每一日既車更問題。
 
一架車三個人，主管司機車籠，只要有齊呢三個角色就可以組成一架車。
 
每個區都會有一個「可行走救護車車輛指標」，假如當日on run既救護車數量低於呢個最低消費數字，就算係官方字面上既「車更不足」。
 
但事實上，我認為每一日返工都要面對車更不足呢個問題，因為如果車更係足夠，就唔會有伙記食唔到飯既情況出現。
 
假如當日返工有六個人，而又剛剛好可以組成兩架救護車，行內會稱呢個情況為「齊口」。
 




若然多咗人，而嗰啲人又唔能夠自己組成一架「可行走」既救護車，譬如剩係得司機同車籠，或者剩係得兩個車籠，呢個情況就係「凸人」。多出黎既同事就要去「頂更」，要去隔離區甚至更遠既地區拍住啲唔識既人做嘢。
 
呢行好怪，每個主管既做事方法都好唔同，可以係南轅北轍，假如要拍啲唔熟甚至唔識既人，自己需要花時間去重新摸索對方既做事風格。
 
司機先慘，明明係揸開秋名山，無啦啦要走去伊呂波做司機。人生路不熟，啲路又多髮夾灣，有時做call又急又趕但又唔熟路，都幾大壓力。
 
講返正題。
 
當日我係返日更，開工嗰陣發生咗啲小插曲。
 




「我唔會去頂更架，你地自己搞掂佢。」一個膊頭上面有一條柴，大家都叫佢做阿慈既人表現得好燥。
 
「咁而家凸一呀嘛，頂一次半次者，咁都唔制？」負責編配車更既三柴咁講。
 
「人手調配既嘢唔撚關我事，總之我今日一定係留喺呢度，唔會出去頂更。」
 
其實頂更係屬於豬頭骨既差事，正常都會派我地呢啲做細既去，而唔會搞啲做咗十幾廿年既大師兄。不過聽講個三柴同一柴係有過牙齒印，估計三柴係想公報私仇，有心玩嘢。
 
「你而家係咪咁唔合作先？」三柴拍哂檯咁，明顯係不甘示弱。
 




都明既，咁多細既在場睇住，話哂都三柴，無理由一啲反抗都無就縮。
 
「我就係咁唔合作，你吹得我脹啊！？」講完之後，阿慈走咗入電視房，坐喺沙發上睇電視。
 
見習救護主任咁啱經過，於是過黎問發生咩事。
 
「無…傾緊安排緊人手既問題咋嘛。」三柴答。
 
見習救護主任見阿慈個樣嬲爆爆，應該都大概估到發生咩事，於是就走入電視房：「慈哥！咩事咁勞氣啊？」
 
整個傾談過程之中，我見個主任都表現得客客氣氣，無擺出任何官威，假如除低咗套制服，會以為阿慈先係大佬，而個見習救護主任係佢啲手下。
 
呢層當然，否則點會叫做防撞欄，人地阿慈入行嗰陣，你條見習救護主任都唔知升小學未。
 
傾完之後，阿慈行返出黎，表現明顯無剛才咁火爆：「我而家去睇醫生，今日唔返工喇。」




 
即係射波，我都認同射波係最好既方法。有時當啲師兄知道自己要去偏遠地區頂更，有啲都會揀射波，因為咁樣就可以完美解決咗凸人呢個情況。
 
當然，有時就算凸人都唔一定要頂更，因為出面橫頭都齊口，全世界只係凸咗自己一個，呢個時候通常會留返喺自己局等運到，話就話係Stand by，其實係R春袋無嘢做，車又唔使去。有時真係要準備定膠布，因為真係會R到損。
 
聽落好似好爽，但呢種情況絕對唔多，因為部門會千方百計搵工作崗位將你安置，或者逼你放假，總之就唔要見到有人返工無嘢做既情況出現。
 
開工後第一轉接到既call係男性胃痛。
 
去到事發單位，見到一名後生仔坐喺廳度打緊PS4。
 
「邊個叫救護車？」主管杰佬問。
 
「我叫架…」後生仔繼續打機，眼睛無離開過電視。
 




「咩事架？」呢個時候，杰佬已經感到有啲燥燥地。
 
過咗一陣，後生仔先放低個手制：「我個胃好痛。」
 
可以面不改容咁打機，我諗痛極都有限。
 
杰佬問：「幾時開始痛？」
 
「今朝。」
 
「今朝同尋晚食過啲咩？」
 
「今朝未食嘢，尋晚同朋友喺街食拉麵。」
 
「邊個位置痛，指黎睇吓？」




 
後生仔指住自己既上腹位置，杰佬往相同位置輕輕按咗幾下。
 
「係間歇性咁痛，定係持續咁痛？」
 
「間歇性。」
 
「本身有無長期病患，食開藥，或者要覆診？」
 
「無…哎呀哎呀，而家又痛喇。」
 
唔理係真定假，個後生仔的確七情上面。
 
「你最近屙出黎啲屎咩顏色架？」
 




問呢個問題既原因，係想睇吓胃痛既原因會唔會關內出血事，因為假如有內出血情況，屙出黎既屎通常會係黑色。
 
「啲屎係黑色架…」
 
屙黑屎，代表有機會真係內出血而導致痛楚出現。
 
「不過，我尋晚係去咗食豚王，仲要係叫咗黑玉，唔知關唔關事呢阿sir？」
 
「哈哈哈！」輝仔聽完後立即忍唔住笑，而我都嘖一聲笑咗出黎。
 
因為我都試過類似情況，食完碗黑色湯底既拉麵，之後嗰一兩日屙出黎既屎的確係黑黑地。
 
聽完之後，杰佬即刻反白眼：「幫我攞set vital sign先。」
 
最後，我地都送咗呢名後生仔去醫院，究竟佢因咩事胃痛，要照過驗過先知。或者最後可能連醫生都診斷唔出，因為條友仔根本就無事，可能只係想射波，但射波還射波，自己行落樓下睇醫生咪得，點解要叫救護車呢？
 
香港就係充斥住呢類人，百思不得其解。



================================================================================================================  
 
救護日常：
 
可能大家會發現，點解救護員好多時會問長問短，咁係因為救護員做嘢係有程序，而呢個程序其實等同問症。
 
問症既大前題，當然係要病人本身係清醒，假如唔清醒甚至無知覺既話，根本問唔到症。
 
救護員問症，大概會有以下步驟：
 

1.邊度唔舒服 / 痛？

2.以前有無試過同樣唔舒服 / 痛？如有，請提供病歷。

3.(i) 請指出邊個位置痛？ 
(ii) 點痛法？(例如：針拮，壓迫)
(iii) 痛楚有無擴散到其他部位？
(iv) 需唔需要止痛？
(v) 幾時開始痛？
(vi) 痛楚有無規律？(持續性/間歇性)

4.有無其他病歷？需要覆診入院？

5.有無長期服藥？如有，咩藥？幾時食過？

6.有無食物藥物敏感？
 
真係幾多嘢問，但唔一定會問哂，視乎當時情況，但病人所提供既答案隨時會影響到救護員所下既決定，例如心口痛，究竟係之前撞傷過所以痛，定係心絞痛嗰種痛呢？
 
兩者既治療方法係完全唔一樣。