《我還是救護員的日子》: 2.5 救護工作的危險性
消防員既工作危險，相信唔會有人質疑反對，因為佢地要入火場，為咗救人，一個唔好彩隨時連命都可以無。
但假如我話救護工作其實都有危險性，唔知大家又會點睇。
救護工作既危險性，可以係肉眼見唔到。
救護車一日載十個八個病人，呢啲病人可能有傳染病，就算我地點樣高度戒備，清潔，消毒，只要一個唔小心，病菌一樣可以找上自己。
況且呢行咁忙，根本唔可以每完成一轉call之後都進行消毒，講緊係連屙屎食飯時間都咁緊逼既時候，仲邊有閒情逸志去搞咁多嘢。
發生交通意外，救護員同消防一樣都係要落馬路做嘢。啲車喺馬路上快速奔馳，不斷喺自己身邊駛過，馬路上工作人士被撞死既案例並唔係無，只係從未撞死過救護員咁解。
意外既嘢，要發生既時候就會發生，唔會理係咩職業咩背景。
做call好多時會遇到癲佬癲婆，若然對方有心害你，衫袋褲袋收埋把刀仔，趁你幫佢做檢查嗰陣捅你一嘢，真係無從防備，就算係葉問都擋唔切。
試過有一次，當時幫個癲婆量緊血壓，睇住佢伸手入袋，慢慢將把鉸剪拎出黎，我立即大叫：「小心佢右手把鉸剪！」
另外兩位同事見狀於是即刻彈開，我都即刻閃埋一邊，先同對方保持一段距離，打算以靜制動。
下一刻個癲婆就發癲，諗住襲擊我地。我地三個立即放低哂手頭上既裝備，三個大男人出力將佢壓制。一個人癲起上黎，力度真係可以好大，三個人用咗好幾分鐘先將個癲婆收服，最後要綁住佢送院。
不過我都算好彩，癲佬雖然遇得多，但未至於俾佢攞命，只係試過俾對方兜嘢踢一腳。
其實救護員面對受傷既機會都唔少，只係大家於做嘢時都抱持一個非常小心謹慎既態度，因為大家都清楚明白，如果連救人嗰個都傷埋，仲點去救人？
道友又係遇唔少，若然對方身上有支針筒，high起上黎用枝唔知收埋喺邊既針拮你一嘢，又係無仇報，有愛滋既話咁就一世。
所以做call一定要好小心小心小心，但就算幾小心都好，意外總能夠於穿透防不勝防既罅隙之中。
救護員經常會遇到暴力事件，暴力有分級數，通常係一級二級暴力，家暴屬於最常見。好多時係啲男人飲大兩杯，借機會發圍，搞到自己同屋企人見紅。
救護員既職責係為傷者進行治理，要近距離接觸，但由於對方情緒不穩，佢下一步想做咩有時好難估得到，或者係請你食兜搥窩麵，或者只係鬧你祖宗十八代，或者係向你吐口水。
「話我廢柴！？佢有咩資格話我廢啊！？」去到現場，一個頭破血流，連褲都無著既中年男人喺門外大吵大鬧。
「先生，你冷靜啲先，你個頭仲流緊血…」拎住盾牌既警察作出勸喻。
「流咩血啊！？我邊度有流血啊！？」中年男人腳步浮浮，一睇就知係飲大咗。
一位婆婆行出門外，將條黑色長褲扔落地，對住中年男人講：「你唔好再搞事喇！你走啦，呢度唔歡迎你。」
中年男人：「走咩啊走！？呢度係我屋企！點解係我走！？係走都係入面條死仆街走先啦！話我廢柴！？佢先廢啊！」
婆婆：「你唔好再喺度發癲喇！生著你啲咁既仔，我都覺得好羞家啊！」
中年男人：「你條死老嘢，寧願幫，自己個仔都唔幫！」
男人繼續大吵大鬧，而且講黎講去都係嗰幾句，就係唔滿意有人話佢廢柴。
隔離左右都紛紛打開門睇吓出面發生咩事，可能係八掛，又可能係覺得出面嘈住哂。
透過佢地既對話，我得知個男人會點解要鬼殺咁嘈。原本只係一家人普普通通食餐飯，除咗男人兩母子，仲有家姐同姐夫。食飯途中，男人開聲問姐夫借錢，而個姐夫一口拒絕，仲有意無意話對方遊手好閒唔搵嘢做，剩係識攤大手板問人攞錢，正一廢柴。然後兩個人發生推撞，俾人話廢嗰個被推跌，撞爆咗額角。
婆婆：「阿sir，麻煩你同我帶佢走啦，我唔想再見到呢個人。」
一發生事，市民最叻就係將個波推俾警察，然後警察就將個波扔俾我地…
救護員真係唔易做，因為好多時都要執埋哂啲無謂既爛灘子。
警察：「嗱…先生，乖乖地跟白車師傅去醫院檢查吓。」
白咩車師傅啊…救護師兄都唔識叫？
「去咩醫院啊！？你都痴孖筋！我好地地去咩鬼嘢醫院啊！？」中年男人指住個警察不斷鬧。
警察：「你最好乖乖地同我合作！如果唔係就將你綁去醫院！」
男人聽到呢句，火爆程度即時又再上升：「你試吓綁啊！睇吓我打唔打柒你班冚家富貴！綁你老母啊綁！」
頂佢個肺…好好地同佢傾吓唔得既，一黎就話要綁，係人聽到自己要俾人綁都會想反抗啦。再者，而家激嬲咗佢，佢地自己就收隊，但個男人陣間上到救護車繼續發癲就全程我地受哂。
有時真係唔明，啲警察為乜咁鍾意挑釁對方情緒？
呢個時候，救護車主管上前：「阿sir，不如交俾我地？」
然後我地發揮出救護員其中一樣最拿手既本領，就係吹水。
透過不斷同個男人吹水，扮哂企喺佢立場咁諗，間中講啲嘢附和吓佢，當察覺到佢條氣開始順返啲既時候，順便加句：「咪係囉，使乜同呢啲人勞氣？不如等我幫你處理咗個傷口先啦？」
救護員算唔算服務性行業？
我覺得算，因為我地好多時要處理既唔係傷勢，而係對方既情緒。除咗提供適當既治療，進行溝通及舒緩對方情緒都係一種服務。
顧及人地既情緒，並唔係因為怕咗佢或者要向佢屈服，而係免得過都唔想節外生枝。因為假如對方情緒唔穩定既話，對於喺救護車上面做嘢嗰三個人係一啲好處都無。
講到尾，其實救護員只係想順利並安全地完成每一轉call。