《我還是救護員的日子》: 2.7 人生百態(一)
當日係星期六，亦都係母親節。
黃昏時間，收到一轉女性長者頭暈既call。
行車途中，身旁既益哥話：「母親節喎，你兩條友仔有無同老母去飲吓茶咁架？」
「有架，聽晚返夜，聽朝諗住同佢去飲個早茶，就當係慶祝。」輝仔答。
「我年年都係咁，無特別話要去慶祝。」我問：「你啲仔女又有無慶祝？」
「有…不過剩係慶祝母親節囉，父親節就唔記得咗我。」
聽落益哥同佢啲仔女既關係好似唔係咁好…真係家家有本難唸的經。
案發地址係一條非常舊既屋村，入到單位裡面，見到有個阿婆坐咗喺床度，屋內佈滿雜物，仲隱約聞到一陣酸臭既味道。同時，亦見到兩名同呢個環境顯得非常格格不入既女士。因為呢兩個女人打扮得身光頸靚，其中一個仲要係著短裙，露出一雙白滑玉腿，望落大概三十歲左右…
見到咁既畫面，我地三個立即互相打哂眼色，口罩底下露出不懷好意既淫笑。
「咩事叫救護車？」益哥。
「係我叫既。」著短裙嗰位女士憂心忡忡咁話：「我係佢孫女，今日同媽咪黎探佢，我地帶咗啲嘢俾佢食，但婆婆一直話好頭暈唔想食，我怕會有啲咩事，於是就叫你地黎。」
「哦…知唔知婆婆今日有無食過嘢啊？」
「應該就無。」
「婆婆係獨居？」
「係啊。」
趁益哥同家屬講緊嘢途中，我同輝仔已經自動波上前攞Vital sign，順便驗埋血糖。
結果血糖機既讀數係3.1，指數偏低。
婆婆面青口唇白，望落去好似好攰，隻手仲有啲震。
「婆婆血糖低啊，我地而家會俾啲葡萄糖水佢飲，飲完就應該好快無事架喇。」
婆婆用飲管啜得好快，只係一陣間就已經飲咗大半包糖水，而過咗無幾耐之後，婆婆個樣亦開始精神返。
「嗱，飲完糖水即刻好返啲喇係咪？」
「嗯！唔該你啊醫生！」
「我地唔係醫生黎架，係救護員…來自消防處架。」益哥指住膞頭上既臂章。
「係咩係咩…唔好意思…」短裙女一臉唔好意思。
「同婆婆去醫院檢查吓啦。」
然後，我地將婆婆護送到救護車上，兩名女士當然有跟車。
「嗱…講明先，救護車一般只準一個人跟車，但今次俾你地兩個一齊上埋啦。」
「唔該哂你阿sir…」
！？
呢個時候，我留意到婆婆訓緊嗰張救護車床上面有啲黑色嘢喺度郁郁吓，由於張床單係白色，所以非常顯眼。
我望真啲…
原來係曱甴仔！仲要唔止一隻，係兩三隻！
我本應係坐喺司機位等開車，但由於短裙女既關係，我都走埋入車廂裡面睇吓有無嘢需要幫手…
男人既嘢，大家明架啦。
「咦喂…」輝仔都留意到有啲唔妥：「呢啲郁緊嗰啲…會唔會係曱甴黎呢？」
但無啦啦車上面又點會有曱甴？
然後我留意到，啲曱甴仔係喺阿婆啲衫入面走出黎，而且越走越多，由兩三隻變成五六隻。
短裙女個阿媽睇見，立即使出佢既六脈神劍，當機立斷用手指將啲曱甴仔撳死哂，撳都不特止，仲打橫一掃，喺白色床單上拖出一條血路。
短裙女見到咁既畫面當然咿嘩鬼叫，而我同輝仔則無乜特別感覺，做救護員有咩核突嘢未見過？最緊要唔好整污糟我地架救護車。
一輪戰地風雲之後，個阿媽若無其事咁坐返低，手都無諗住抹，我於是俾咗啲紙巾佢。
過程中，我留意到個短裙女時不時用手輕撫阿婆塊面，仲會捉住阿婆隻手不斷噓寒問暖，一臉憐憫愛錫既模樣。
我忍咗好耐，終於忍唔住問：「你地都係住附近架？」
「唔係啊，我地住喺XX灣嗰邊。」短裙女答。
聽見個地方名，都知唔係一般人可以住得起。
「住得都幾遠喎，咁咪唔可以成日黎睇婆婆囉？」呢句說話，當然係有弦外之音。
「都係架…但我地逢大時大節都會過黎。」
我當時心諗，真係好諷刺。
作為阿婆既屋企人，自己就著到身光頸靚，住靚樓。但阿婆就住緊舊式公屋，屋企環境惡劣，惡劣到可以有昆蟲喺個身度爬出黎。
睇見佢關懷備至噓寒問暖個樣，我就覺得嘔心。如果係真心錫阿婆，就唔會母親節先循例探一探佢，就唔會忍受得到要佢一個人住喺啲咁既地方。
唔知點解，我覺得成件事有啲惺惺作態。
之後我坐返去司機位，無再留喺車廂入面。
條裙就算幾短都無用，我唔想再睇，因為我見到既只係豔麗背後既醜陋人性。
＃＃＃＃＃＃
某日下午，收到一轉小朋友跌倒受傷既call，地點係某屋村附近既公園。
到達現場，公園有好多家長同小朋友。我地上前查看，發現有個細路仔訓咗喺地，但係清醒既。
益哥問：「發生咩事？」
估計係嗰位小朋友既家長好驚青咁回答：「佢頭先玩玩吓喺個樓梯度跌咗落黎，然後就一直話隻手好痛郁唔到，我都唔知發生咩事，你快啲幫吓佢啦阿sir！。」
然後我地幫小朋友進行檢查，因為佢係跌傷，仲一直話隻手好痛，所以懷疑係骨折。
當摸到右手前臂既時候，小朋友忽然話好痛，但表面上無腫無瘀，亦無變形。
只要懷疑係骨折，救護員就會當作骨折處理，因為唔怕一萬，只怕萬一。
我地用一啲專門係處理骨折既工具幫小朋友穩固好右前臂，繼而包紮。
過程中，在場好多家長都拎住部手機喺度拍，好似覺得救護員救人好新奇咁。我地三個全部上哂鏡，但都唔緊要，因為我地只係正常工作。
準備離場既時候，由於人太多，所以阻擋住我地既去路。
呢個時候，益哥終於忍唔住：「讓開條路啦！一個二個喺度影影影！你地有無顧過呢位小朋友既感受啊！？有無問過小朋友同佢既家長想唔想上鏡啊！？如果係你地自己啲仔女整親，然後喺度係咁俾人影，你地自己又會有咩感受啊！？」
好少見益哥咁燥，但我覺得佢鬧得真係好啱。
在場部分家長立即覺得無癮，於是放低手機，有部分就當聽唔到，繼續做戰地記者。
其實益哥隨時會因為鬧市民而俾人投訴，而如果真係投訴，我地三個人都會有手尾跟，要寫報告詳細解釋，然後又會俾高層照肺。
不過寫報告咪寫報告，都唔係第一次寫，況且我認為有需要教育一吓呢班無知市民。
身為三柴既益哥當然唔驚，喺呢行打滾咗幾廿年，想開聲屌邊個就屌邊個。但相信有啲三柴未必有咁既勇氣，但益哥一定敢，因為佢份人夠雷，呢種小事絕對剎得起，就好似當啲細既有事，佢都一定會為大家挺身而出。
又試過有一次，又係小朋友跌傷，但只係擦傷少少，當時又係有家長喺度影，而呢位家長正正就係嗰位受傷小朋友既媽媽。
樂文師兄發現個家長喺度拍片，於是上前對住個鏡頭雙手舉Ｖ，笑笑口咁講：「點啊？影得我靚唔靚先？救護員救人有咩好影啊？自己小朋友受傷竟然唔係關心佢既傷勢，而係顧住拍片？」
個媽媽俾樂文師兄窒到無聲出，只好收返埋自己部電話。
香港人啊…香港人，有時真係唔明佢地諗乜，乜拍片同影相真係咁重要咩？
有時我會諗，當有一日佢地自己即將要死既時候，會唔會拎部電話出黎幫自己自拍返一張遺照先捨得死呢？