《我還是救護員的日子》: 2.4 夢

「阿哥！接波！」阿傑將沙灘波大力踢向我呢邊。
 
「到你！」我又將個波踢返過去。
 
喺沙灘入面，我地互相將個波踢黎踢去。
 
我盡量唔跑咁快，因為我怕動作一大自己就會醒…
 
我好清楚知道，目前所發生既一切只係個夢。
 




「跑怏啲啦阿哥！無食飯啊！？」
 
好耐無聽過佢親口叫我阿哥，如果可以既話，我想趁自己醒之前聽多幾次，於是我繼續慢慢行去執波。
 
我彎身執起個沙灘波。
 
「阿哥！」
 
！？
 




我望住阿傑嗰張蒼白既臉同埋佢全身濕透既身軀。
 
「你記得我邊一日生日嗎？」
 
我點點頭，示意記得。
 
點會唔記得，每一年既生忌死忌我都會去拜祭…
 
但係聽到佢咁問，個鼻即刻覺得有啲酸。
 




「我想食格仔餅，多花生醬。」
 
「好。」我鍾意食雞蛋仔，而佢就鍾意食格仔餅。
 
我將沙灘波踢到去阿傑腳邊，但佢看似無意欲將個波執起，只係企定定唔郁咁對住我微笑。
 
佢既身影逐漸變得模糊…
 
我知道，夢境即將要結束。
 
眼前出現一道白光。
 
只係微微將眼睜開，眼淚立即從眼角奔流到臉上。
 
今日係九月二十日，係阿傑既生日。




 
我，阿媽，仲有Janice去咗進行拜祭，當然不忘買咗佢最鍾意食既格仔餅，多花生醬。
 
「咁就十幾年喇…」阿媽蹲喺阿傑既墳前點香：「如果阿傑當年無走，而家都可能就快結婚…」
 
阿媽一直恨飲新抱茶，呢件事而家就只有我先可以做到。
 
佢露出一副有啲唔好意思既表情，回頭向我同Janice講：「唔好誤會啊，我唔係催你地結婚。」
 
我點點頭，示意無相干。
 
阿媽繼續講：「而家年代唔同架喇，以前就話要成家立室者，而家好多人選擇同居唔結婚，甚至唔生仔。」
 
「我地會喺兩年內結婚。」
 




我同Janice一直有結婚既打算，至於點解遲遲未結，係因為想再儲多啲錢先…
 
想上車？
 
都係既，但就算上咗車都會係同阿媽一齊住，主要係想俾個好啲既環境佢。
 
而家既香港人，喺上車之前可能已經上咗另一架車先，嗰架係救護車，啲樓貴到咁根本買唔起。
 
「無所謂啦，你地自己話事得架喇。」阿媽表現得有啲黯然。
 
可能係因為就快結婚呢句說話經已無法出自阿傑把口。
 
晚上，我同Janice需要出席某位大學同學既婚宴。
 
一班好耐無見既大學同學圍埋一齊，講既話題離不開結婚生仔買樓，當一堆人所傾既嘢係咁現實同乏味既時候，代表大家已經唔再年青。




 
我會唔會生仔？
 
應該唔會喇。
 
呢方面我同Janice已經有哂共識，採取無孩政策。與其為咗下一代奔波勞碌，不如輕輕鬆鬆享受吓二人世界。延續人類大命運呢種咁重要歷史性任務，就交俾其他有志之士去履行。
 
「喂，阿寶，Jenifer之前有無搵過你？」同檯其中一名男友人問。
 
Jenifer係我地既大學同學，亦都係今晚既新娘。
 
「有啊。」我答。
 
兩日前，Jenifer打黎問我可唔可以幫手做佢今日結婚既司機，但由於本身唔得閒，所以我推卻咗。況且，我唔鍾意做嘢咁臨急臨忙。
 




男性友人：「佢都有搵我啊，前幾日想叫我幫手搬嘢。」
 
我：「咁你一定無應承到啦？」
 
男性友人一副不屑既嘴臉：「無！呢個人太無誠意喇。」
 
「點無誠意法？」
 
「佢派俾我張帖，連名都寫錯既，你自己睇吓喇。」男性友人將自己部手機遞向我，原來佢將張帖既封面影低咗。
 
封面寫住「 Ronald Fung」，但男性友人個名係叫「Donald Chung」。
 
「嘩…咁又離譜咗啲，名串錯都算喇，連個姓都寫錯，直情變咗另一個人。」
 
「咪就係！」
 
事實上，我地呢班人其實同Jenifer唔算係好熟，大家出席既原因，只係因為派到埋黎無理由唔去咁解，講到尾就係俾面派對。
 
所以我同Janice 都決定唔擺酒，一來唔想煩，二來慳返啲錢，三來無謂要人破費。與其拎錢出黎做場show，不如用黎做其他實際啲既嘢。
 
最近呢幾年，出席婚宴既次數頻密咗，囍事理應值得高興，但當每一次出席呢種場合，我都會感到有啲概嘆。可能係因為自己見得太多生離死別，覺得唔係人人都擁有咁既福氣，可以睇住自己既仔女結婚，生仔，抱孫…
 
其實呢個社會裡面係有好多鮮為人知既一面，有好多人身處於水深火熱之中，好多人要憂慮三餐溫飽，好多人要面對絕症，好多人連好普通咁想行一步路都有困難…
 
我留意到在場好多人都非常注重物質，需要奢華，追求虛榮…
 
唔係話想扮清高，但身為救護員要經常走在最前線，每日見盡呢個世界形形式式既面貌，有種今日唔知聽日事既感覺，飛來橫禍隨時發生喺自己身上，死神可能每一日都喺自己身邊擦身而過。
 
與其計算咁多，奢求咁多，不如諗吓假如聽朝一覺訓醒發現身邊人無咗呼吸脈搏，所有嘢已經無得再返轉頭嗰陣，會唔會有嘢令自己後悔？