《我還是救護員的日子》: 2.3 用膳時間

救護員每日都有半小時食飯時間，不過呢半小時既時間，可能會係十一點開始，亦可能會係下午兩點先開始，非常唔穩定，完全係聽天由命。
 
就算有呢半小時食飯時間，都唔保證餐飯可以食得完，因為食食吓可能會響鐘去車，呢個時候只有兩個選擇，一係拿拿聲食多幾啖，塞飽個胃就算，二係等做完call之後返黎再食過。如果餐飯經已食到一半，我會揀前者。但如果係啱啱開飯，連嘢都未開始食，咁當然係等做完哂嘢先再返黎食。
 
每日去到中午時間，我地會傳送一個叫「BKM」(BreaK  for  Meal)既訊號俾control，示意要食飯，維時半小時。正常情況下，當區內發生事故，control係唔會調派處於BKM狀態既車去，而係會調派另一架位於最就近既車去，但好多時候，BKM都一樣會中招。
 
救護站會提供膳食，返工當日可以選擇報飯。預早報定，知道食飯人數後，廚師會煮適當份量既飯餸。
 
唔選擇喺局食飯既話，就要自己搵機會喺出面買外賣。
 




救護員買外賣，會俾熱心市民影低然後投訴，標題寫住：「救護員揸救護車去買外賣，公器私用。」
 
首先，救護員唔揸救護車去買外賣，唔通搭叮叮去買！？
 
買得外賣，我地一定係跟足正常程序，如果買外賣過程裡面中call，我地會等做完哂嘢，然後再去拎外賣，但到時又會俾人影相，投訴救護員工作途中去拎外賣。
 
背後到底發生過咩事，有幾辛酸，有幾趕頭趕命，相信只有救護員自己先知。
 
啱啱嗰轉call先救返醒個阿伯，而家只係趁住有少少空檔時間去拎個飯盒醫吓肚，班市民竟然話係公器私用…
 




喺辦公室工作，一日裡面去兩次廁所，如果個老闆質問你點解會成日去廁所，作為呢位打工仔既市民又會有咩感覺？
 
可能會諗：作為人，廁所都唔使去？一日兩三次都叫密？
 
同樣道理，作為人，救護員唔使食飯？一日拎一次外賣都唔得？
 
救護員係咪要不吃人間煙火，市民至會滿意？
 
雖然係有啲仆街市民，但都有啲市民都好既。
 




有時打電話去叫外賣，當店鋪知道打黎既係救護車，佢地知道我地唔等得耐，於是會先優先處理咗我地既外賣，見到面仲會阿sir前阿sir後，再加多句辛苦哂。有時又會發現，飯盒好似加咗料，比平時多咗隻煎蛋，原來係老闆娘知道救護員做嘢辛苦，所以幫我地加餸。
 
唔係話細路仔心態，想有人讚，想有人慰勞，只係當做嘢做得咁辛苦既時候，呢啲少少既人情味，對前線工作人員而言係非常大既精神食糧。
 
題外話，有時著住制服落車買外賣，係會有種飄飄然既感覺，覺得自己頭上好似有個光環咁，因為市民會用啲奇怪目光望住自己，仲竊竊私語好似談論緊自己咁，以為自己成為咗焦點，虛榮心作怪。
 
其實或者係自己諗多咗，人地望住自己，可能只係因為對方根本就唔知自己乜水，著住套白色制服怪怪雞雞咁企喺條街度阻住哂。
 
買完外賣中call，唯有等做完call先食，飯盒會暫時放喺救護車上。當完成哂轉call，我地通常會趁住無敵時間，匿埋喺救護車入面，落哂窗簾咁喺車上面食。
 
點解要落窗簾！？
 
咪又係驚啲熱心市民經過影我地相，話我地坐喺救護車上面食飯，公器私用。
 
喺救護車入面食飯，可想而知係一個點樣樣既衛生程度。車廂入面又多菌，又可能無幾耐之前先做完DBA，但係無辦法。




 
話就話食飯，其實同倒落個胃度差唔多。作為司機，十五分鐘內假如食唔完，就要將架車揸返基地先有得再食，其餘兩個都還好，行車途中咪繼續匿喺車入面食。
 
有時就算有得食又唔敢食太飽，因為當食得太飽，假如下一轉係攀山拯救呢類型既call就大件事…
 
又熱，又要拎哂啲裝備行上山，又剛剛食完嘢，分分鐘盲腸炎。
 
做救護員有咩條件？我諗最好係割咗盲腸，同埋食飯速度夠快。
 
當一架救護車BKM，代表仲喺出面打緊仗既救護車可能要遲啲先有飯食，因為佢地隨時要做埋人地嗰份。
 
只係普普通通食個飯，但呢樣已經係救護員一日之中既最大憂慮，時時刻刻都要為食唔食到飯作出計算。
 
驚陣間會接到啲好危急既call？無嘢好擔心，就算接到都係好似平時咁做，不如諗吓做完call之後，拎唔拎到外賣好過。
 




驚遇到MCI？使乜驚，著得起呢度制服，就遇咗自己係做大事既人，但同時亦因為著住呢套制服，連食唔食到飯咁小既事，我地都要成日諗住。