《我還是救護員的日子》: 2.1 夜班
做救護員其中一個辛苦既地方，一定係返夜班。
根據部門統計，夜晚既出勤次數比日頭大概少一半，不過夜晚既值勤人手都會減半，譬如日頭有四更救護車，夜晚只會得返兩架，有時甚至係一架…
所以，夜晚一樣都係咁忙。
正常情況下，夜晚毋須出動既時候，救護員係會訓覺休息，但假如一聽到鐘聲響起，就要彈起身去車。某啲救護站個休息室係設於三四樓，成日要走上走落，有時半夜起身出動，個人仲係處於半夢半醒狀態，眼都未睜得開，仲要行咁多層樓梯，一個不留神真係會仆親整傷。(而家基本上唔會再用銅柱，因為容易受傷。)
「大家今晚想食咩宵夜？前兩日中咗馬，今餐等我請！」
剛才講嘢既人係杰佬，佢係隊中既主管級數之一。佢係綠牌，但仲未係正式既兩柴，聽講過多一年左右就會升職。
「多謝哂先杰佬！不過我最近減肥，要戒宵夜。」另一位同事輝仔咁講。
我：「一次半次怕咩？食宵夜暖吓個胃，好訓啲嘛！」
杰佬：「希望今晚有覺好訓啦。」
輝仔：「我唔貪心，有三至四個鐘俾我訓已經好滿足。」
我：「咁大貪？我覺得有連續兩個鐘訓經已好好。」
可以既話，最好就係天下太平，齊齊一覺訓天光。但基乎係無可能既事，職業生涯裡面，好似只係試過一次…
畢竟市民對救護車既需求實在太高。
正式開工無耐，我地就接到一宗「有人企圖由高處墮下」既案件。
企圖，即係未跳…個心都無咁驚。
警察，消防及救護照舊齊齊到場，消防員經已喺大地面開設吹氣救生墊，慎防個事主真係跳落黎。
去到現場既住宅單位，我見到一名中年女士危坐於窗邊，只要再踏出多一步，佢就會跌落街。
從警察與事主家人既談話當中，我得知呢位中年女士既名字叫阿芳，有睇開精神科。
「嗱…你坐返埋黎先，咁樣好危險架，有咩事咪慢慢講。大家都係女人，我實會明白你既，係咪先？」其中一名女警不斷勸喻阿芳。
「有咩好講啊！？做人咁辛苦，死咗佢好過！」阿芳表現得有啲激動，言語間不停埋怨自己老公剩係識賭錢唔理屋企，而自己則要一星期返足七日工賺錢去養活三名仔女。
三名仔女當時匿咗入房，由阿芳既媽媽，即佢地既婆婆陪住。
然後我又無意中打聽到，原來阿芳係於某連鎖快餐店裡面做職員。
當時我喺度諗，做快餐店侍應月薪最多咪萬六七蚊。單憑一份糧，要同時照顧三個仔女既起居飲食，又要提供學費及零用錢，屋企又有日常開支…
條數點除得盡？
仲有，阿芳既然患有精神病，情緒或者會經常失控，再加上佢既情況同單親家庭係無分別。啲仔女生長於一個咁既環境底下，對於佢地日後既成長會有咩影響？
身為救護員，時常會接觸到唔同家庭背景及苦況既人，然而呢啲先係充斥住整個社會既真實面貌。
警方一直勸喻阿芳，但都唔成功，過程擾攘咗一段頗長既時間。
救護員每一次出勤最多只可以逗留現場三十分鐘，若然有需要逗留超過三十分鐘，就要通知control，申報overstay。
時間過得越耐，阿芳既態度逐漸變得軟化，情緒亦開始平伏。
「應該都係想發洩吓情緒架者。」杰佬喺我地耳邊細聲講：「準備定三角巾，等陣有機會要綁。」
杰佬既意思係阿芳既情緒太唔穩定，我地或者需要將佢既手腳綁住然後送院，以免佢情緒再度失控，於送院途中傷害到自己或者傷到我地。
最後，阿芳聽從女警勸喻，終於從窗口落返黎，並同意到醫院見醫生。
我地上前幫阿芳做咗啲基本檢查，一切指數正常。
期間，杰佬一直同阿芳傾計，問佢喺邊度返工，啲仔女讀幾多年級等等。然後杰佬又講吓自己個仔讀書啲嘢，傾傾吓發現原來佢個仔同阿芳三個仔女竟然係讀埋同一間學校，講講吓仲講到教數學個Miss Chan非常好人，成日請啲學生食糖…
傾談過程當中，我見住阿芳臉上開始出現返笑容，同剛才坐喺窗邊完全係判若兩人。
某程度上，吹水都係救護員所能提供既治療之一，當然唔係為吹而吹，而係要讓病人明白到，其實我地係有心同佢進行交流，有心去聆聽。
透過有技巧既溝通，分散病人注意力，甚至令佢感到放鬆同信任我地。
最後，杰佬判斷阿芳情緒穩定，無需要進行硬綁。
其實假如唔係迫於無奈，我地都唔想將病人五花大綁，畢竟俾人綁手綁腳既感覺一定唔會係好受，除非對方係個歇斯底里既瘋子。
試過有一次遇著個傻佬，全程喺度發癲，不斷郁手郁腳想打人，仲出埋飛劍(吐口水)，最後唯有夾硬黎將佢綁住，再將佢成個人反轉擺上床…
無計，非常時期就要用非常手法。
抵達醫院，將阿芳轉交俾醫院職員之後，我地就上返救護車爭取時間休息。由於剛才並無動用過任何救護裝備，所以唔使花太多時間去執拾同整理裝備。
通宵工作，最難適應既就係生理時鐘。
望望手錶，而家先十一點幾，暫時未有睡意，應該仲可以撐多陣。
呢個時候，杰佬經已處理好佢既善後工作，並返回到救護車上：「叫宵夜喇喂！」
「好啊，今晚想食邊間？」我問。
杰佬：「今晚有啲想食牛腩麵嗰啲，你地有無興趣？」
我：「無所謂啊，照舊榮記？」
「好。」杰佬回身，同坐喺後面既輝仔講：「你真係唔食？食啦！我請喎！」
「唔…」輝仔諗咗一陣，然後話：「上半夜就整單企跳，感覺今晚氣場唔係咁好…好啦，食個雲吞麵轉一轉個氣場先！」
（上半夜:開工 – 00:00；下半夜: 00:00 – 放工）
我趁住呢段無敵時間打電話去榮記叫外賣，當然要表明係救護車…
至於點解要表明係救護車，就要自己諗吓。
其實每一次叫外賣之後，最大既憂慮就係拎唔到外賣，原因好簡單，就係拎外賣途中被中途擊落。假如遇到呢種情況，因為要趕赴現場，外賣固然係唔夠時間拎，唯有等完成哂轉call之後先再揸車去拎。但係整個過程一來一回最少要四十分鐘，到時碗麵都浸到發脹，湯都擺都凍哂。
然後，最唔希望發生既事情始終都要發生…
「仆街…中call…」後方傳來輝仔既聲音。
杰佬：「咩Case？地點喺邊度？」
輝仔：「不省人事…土板街，中年男士。」
無事既，幻覺黎架者，嚇我唔到既…
我心入面希望只係普通暈倒。
趕到現場，隨即見到一大班途人喺度圍觀，我見到一名身形稍為肥胖既男人訓咗喺地。
杰佬拿取AED機，率先跑到男人身邊做檢查，而我同輝仔則隨後趕到。
杰佬：「無呼吸無脈搏，輝仔CPR！」
一旦要CPR，就意味著將會有一連串又艱巨又趕急既工作…
當中既步驟唔詳述太多，但我地打聽到，呢名中年男士大約五十歲，係附近既住客。他同朋友喺附近會所打完羽先球，於返屋企途中忽然失去知覺倒地，我地估計係突發性心臟病。
救護員既工作係幫傷者進行急救，於送院過程中維持或令對方既生命得到復甦。
將病人送到醫院，之後既後續發展我們地係無從得知，心裡當然係希望佢救得返。
人生真係好兒戲…邊個會諗到打完場羽毛球，死神就喺自己耳邊敲起索命鐘？
當晚總共做咗十轉call，完全無訓過。每次一返到局，當準備上休息室訓覺之際，個鐘又隨即響起，縱使真係好眼訓，但都要繼續去車。
「沖完個政府涼，舒服哂！」第二朝收工換衫剛剛沖完涼既杰佬咁講。
「有無興趣食早餐？」輝仔問。
「好啊，杰佬去唔去？」我答。
杰佬露出某種不懷好意既微笑：「唔喇…有正經嘢做。」
輝仔：「返屋企陪老婆仔女呢！？」
杰佬：「係啊，不過沖埋個涼先。」
輝仔：「吓…你啱啱咪沖咗涼囉，又沖？」
杰佬最後只係再笑咗一笑，無再講其他嘢。
輝仔：「咩啊…唔明喎。」
等杰佬離開咗之後，我先開聲講：「佢指既唔係普通嗰啲沖涼啊，係另一啲，明唔明啊？」
輝仔諗咗一陣，先忽然恍然大悟：「吓！？但係….但係…佢有老婆仔女架喎！」
「係啊，但唔好理人咁多喇。呢份工咁大壓力，或者呢個係佢既減壓方法，就好似你放工後會去踢波一樣。」
我明白輝仔點解會有咁大反應，不過每個人都有佢自己既選擇，真係理唔到人咁多。
杰佬做咗呢行十年，每次返完夜都會去沖涼，但咁多年都無俾佢老婆發現，或者係佢收得夠埋，或者其實佢老婆係知道，只係唔表現出黎，無從得知，亦唔想去知。
只想講一句，救護員都係人，都會食煙，都會飲酒，但只限除低套制服之後。