《我還是救護員的日子》: 1.6 發燒

撇除大型意外同埋其他突發事件，平時做到最多既call之中，發燒都算係數一數二，尤其當處於流感高峰期既時候。
 
一般體溫達到攝氏37.5度(即華氏99.5度)已經屬於發燒，不過只係屬於微燒。若然錄得既體溫係攝氏40度(即華氏104度)或以上，呢種情況已屬於嚴重。
 
好多時接到發燒call，去到現場通常都見到啲病人著住好多件衫，包到成隻糉咁，而我地第一時間會吩咐病人立即除哂啲衫，除剩件面衫就夠，然後最好拎條濕毛巾幫病人抹下身抹下頸，以助降溫。
 
呢個時候，通常啲家屬或者病人都會咁講：「病人打哂冷震，仲不斷話好凍，好似發冷咁喎，仲同佢除衫？」
 
無錯啊，發燒感到發冷同埋打冷震係正常現象。
 




其實發燒係一種病徵，係身體免疫系統抵抗疾病既一種自然保護功能。
 
簡單啲講，發燒其實係個身體同病菌打緊仗，感到發冷或打冷震係因為身體想透過肌肉收縮去散熱。若然呢個時候以為凍，走去著多幾件衫，即係同身體機能對抗。身體明明想散熱，但病人就走去幫身體加熱，最後弄巧成拙。
 
上一輩既人好多時都話發燒要著多幾件衫，焗出一身汗就會退燒。
 
到底有無實例證明係行得通，聽過係有，但就算真係行得通都只係好彩。發燒走去焗汗，隨時會搞到抽筋，特別係小朋友，體溫過高隨時會導致佢地燒壞腦。
 
上一輩都算，始終係老人家，有時就當佢地與時代脫節。但有時見到好多年青一代既家長好緊張自己既仔女，但當自己小朋友發燒既時候竟然走去幫佢加件羽絨褸，其實係變相靠害。
 




發燒首要處理既一定係散熱。
 
至於點樣散熱？可以用濕毛巾放喺額前或者頸後。
 
同時要注意室內空氣流通，情況許可既話可以開少少冷氣或者風扇，仲有讓病人飲多啲水。
 
呢樣嘢本應係一個常識，無奈每一次做call都會見到家屬或病人犯同樣既錯誤。
 
＃＃＃＃＃＃
 




老人院算係救護員經常去既地方，畢竟香港人口老化嚴重，而老人家通常都體弱多病。
 
救護既服務對象之中，老人家大概佔咗最少三分之一，甚至佔一半。
 
發燒個案較為常見，接到呢類call，救護員通常會為病人用冰包敷頸/額頭以助降溫，其次就係提供氧氣，不過只係用作舒緩，若然要痊癒，通常要食退燒藥或者打退燒針。
 
「我老爺佢有無燒？」自稱係新抱既師奶大為緊張。
 
住宅單位裡面，益哥剛為伯伯做咗啲基本檢查，體溫錄得攝氏40度。
 
益哥：「緊係有啦，用手摸落個額頭度都摸到，你仲俾咁多衫佢著。」
 
師奶：「但佢話凍喎。」
 
然後，益哥將一般人對發燒感到凍同發冷既錯誤觀念向師奶解釋一次。




 
師奶匆忙地為伯伯除去多餘既衫：「哎呀…原來係咁架，仲等我俾件咁厚既褸佢著添。」
 
伯伯由於發高燒，神情有啲呆呆濟濟，成身軟弱無力。
 
師奶：「唔知今日醫院多唔多人呢…」
 
益哥：「頭先見到急症室入面都坐滿人，而家入去分分鐘要等五至六個鐘。」
 
師奶：「咁點算…老爺佢最怕等架喇，一等得耐佢就會發脾氣…」
 
益哥：「有個建議，想快既話不如去附近診所睇，其實去到醫院啲醫生都係開退燒藥或者幫佢打枝退燒針，呢啲嘢診所醫生一樣做到。不過診所既話就要自己去，因為救護車只會送病人去公立醫院。」
 
「咁啊…」師奶低頭認真考慮。
 




益哥：「你呢度附近有無診所架？」
 
師奶：「其實樓下已經有一間。」
 
益哥：「你自己決定，唔係話唔想車你去醫院。不過而家流感高峰期，醫院坐滿哂人，等得耐都其次，裡面人多病菌多，一個唔小心如果連你都病埋，咁邊個照顧伯伯？」
 
師奶不斷點頭：「咁又係，阿sir你都講得幾有道理…不過咁樣好似麻煩到你地，要你地白行一趟。」
 
益哥：「唔會…最緊要你地方便者。如果決定唔去醫院既話，簽張紙就得架喇。」
 
我從腰包拎出「拒絕送院」既表格。
 
最後，我地無送到伯伯去醫院，師奶決定慳返啲時間，陪伯伯去樓下診所睇症。