《我還是救護員的日子》: 1.5 非緊急與緊急
救護員做既call，當然係有分急同唔急，而事實上，唔急既call居多。
根據我經驗，一日內假如平均有七至八轉call，有五至六轉都係屬於非緊急，講得難聽啲，即係九成都係流料，至於非緊急其實係可以去到咩程度？
例如一個行得走得，但有幾聲咳既阿叔想去睇醫生…
其實佢可以自己去睇普通門診，唔需要叫救護車。之所以叫車，可能係因為佢平時睇開嗰間診所今日休息所以無得睇，於是想去醫院睇，然後就叫救護車。
又例如夜晚訓唔著想搵人傾吓計既阿婆，而唔知點解佢既傾訴對象竟然會係救護員同醫生護士。
仲有俾蚊咬，腳趾甲反甲，俾A4紙劃損手指，普通流鼻血等等…
咁樣算唔算濫用救護服務？
不過，著得起呢套制服，就要有隨時要面對死人塌樓既準備，因為無人可以預計下一刻呢個世界到底會發生咩事。
今日我依舊係負責駕駛救護車，而主管係嗰位好有生活態度既樂文師兄。
「嘩…屌佢老味丫，今朝開工到而家未停過，想舒舒服服屙個屎都無時間。」剛剛做完call，開車返救護站途中，坐我旁邊既樂文師兄抱怨。
你無聽錯啊，係講緊粗口，但我地當然唔可以對住市民講。
關於開大呢樣嘢，有時急起上黎都真係唔敢屙，萬一屙屙吓屎要去車，咁點算？
唯有用括約肌剪斷條屎，或者練習吓點樣屙快啲…
五分鐘內屙完算快！？最好兩分鐘內啦。
「係啦…成朝都係做學生call。」揸緊車既我回應。
今朝成朝都係入學校做嘢，第一轉係十六歲女中學生經痛。作為男人，的確係唔明白經痛到底係有幾痛，但我地會體諒。眼見個學生妹面青口唇白，痛到行步路都行唔到，喺救護車床上面要縮埋一嚿…
月經其實真係一件幾麻煩既事，諗深一層，做男人好似真係方便好多，至少去廁所好少要面對排長龍。
女性經痛，雖然救護員無咩實際嘢可以幫到對方，最多都係俾張床佢訓低休息，或者俾啲高濃度氧氣佢聞吓，稍為舒緩一吓佢既痛楚…
除咗咁，我地真係無嘢可以做到，唯一可以做既就係將佢交俾醫生。
有一點要講吓，就係學生妹多數都係著裙，而做call既時候，街邊總會有八掛途人喺度望，包括啲無所事事既猥瑣叔父。著裙既人於上落救護車床/輪椅既時候比較容易走光，為防春光乍洩，救護員通常會用搵嘢遮一遮女性下身。
作為病人已經感到唔舒服，好多時佢地顧唔到自己春光。既然佢地顧唔到，咪由我地去顧。
作為救護員，有時要喺呢啲細微細眼既事情上諗多一步，做多一步。
看似唔重要，但假如自己係病人或者病人家屬，你又會點諗？
第二轉call，係一個小學生將擦膠塞咗落鼻哥窿度，拎唔返出黎。嗰粒擦膠類似係鉛筆頂部紅色細細粒嗰啲，我諗好多人細個嗰陣都試過咁玩，塞擦膠入鼻窿，只係大家最後都能夠成功挖返出黎，而今日呢位妹妹仔就有啲不幸，我地用電筒照入去，發現粒擦膠雖然唔係好大粒，但真係塞到幾入吓。
妹妹仔當然係好驚，喊哂咁樣。
「小朋友，無事既…」剛到達現場，樂文師兄試圖進行安慰。
但呢位妹妹仔越喊越厲害，唔知情既人會以為係咪發生咗啲咩天災人禍，搞到佢同爸爸媽媽失散咗。
「小朋友，你唔好咁驚先…」樂文師兄半蹲喺妹妹面前：「我地係救護員黎架嘛，係負責救人架嘛，所以一定可以幫到你既，係咪？」樂文師兄展露出柔情一面。
花咗一段時間，妹妹既情緒先得以平伏，然後佢不斷問自己會唔會抖唔到氣，粒擦膠會唔會拎唔返出黎，十萬個為什麼。
「小妹妹唔好郁住先，如果唔係我地好難幫你架。」我在旁安慰，而樂文師兄則萬分專注地用電筒照住個鼻哥窿，同時用鉗喺入面進行搜索。
最後，樂文師兄成功將粒痴滿鼻涕既擦膠夾返出黎。
「搞掂！下次唔好再咁樣玩擦膠喇，知唔知道？」
由於天時暑熱，眼見樂文師兄滿頭大汗，就好似醫生剛剛完成咗一個好複雜既手術咁。
小妹妹「獲救」之後，成個人開心返哂，而由於「病情」經已喺現場解決，病人毋須送院處理，我地會當作「拒絕送院」處理，病人/家長只需要喺某張表格上簽個名就得。
至於我地，收拾好裝備之後準備開車返局。好彩既話，就可以順利抵達救護站稍作休息，唔好彩既，行車途中又會再次接到call，呢種情況被稱為中途擊落。
根據消防處既調派系統，當發生事故時係會調派距離事發地點最近既嗰架救護車去。假如該區同時出現有兩架最近既車，咁就要睇彩數，睇吓邊架被揀中，畢竟負責調派邊架車去做嘢既嗰個都係人，我地會叫呢班人做「Control」。
話口未完，已經再中第三轉call，而今次既地點又係學校。
根據資料顯示，係學生打波發生意外導致眼部受傷。
整傷眼其實可大可小，但究竟係點傷法，有時真係要去到現場先知。就算手頭上有報案人電話，去車途中諗住打去問清楚，報案人好多時只會有類似以下既反應：「佢流好多血啊，唔好問咁多啦，你地快啲黎啦！」
報案人有時可能太緊張，個心好急好驚，形容得唔清唔楚，甚至係無法形容。
今次都唔例外，對方係完全講唔出傷者既傷勢同目前情況，聽落好似好嚴重咁。
假如可以事先將病情或者傷勢簡略講俾救護員知，我地至少心裡面有個底，幾個人商量定陣間去到現場邊個負責做啲乜，如果遇到某種情況就點樣應變之類。
雖然話心裡面有個底，但就算處理同一種傷勢，每次去到現場所面對既環境同情況都可以好唔同。
所以，救護員最值錢既地方除咗係佢地既急救知識同技能，其次就係佢地既「執生」能力。
去車途中，我地三個表現淡定，畢竟我地實在面對得太多呢種情況。根據過往經驗，多數只係普通損傷。
「應該係撞爆咗個眼角架者，打波成日都有架啦…」樂文師兄一邊覆電話訊息一邊講，佢一向冷靜，就算係面對住死人塌樓。
不出大家所料，學生哥既左邊眼角撞爆咗。於正常人角度，的確係流好多血，但對我地黎講，啲血咪算流得少。
最後我地三兩下手勢就搞掂，不外乎止血消毒包紮，不過眼部包紮係要有啲技巧，學過急救既人就會知道，但為求做嘢快捷，亦都可以好無技巧，只要包紮到就得。
嗰位報案既女校工依然驚魂未定，受傷個學生哥仲冷靜過佢，完全唔需要我地安慰。個學生固然要送去醫院做詳細檢查，而校工就跟車。家長方面，佢話已經通知咗，會直接喺醫院等。
題外話，救護車每次最多一個人跟車，假如你見過救護車可以坐兩位家屬，只係個主管好心俾另一位上埋。
每次做完call，將病人送達醫院嗰刻開始計，救護車係有十五分鐘時間處於「無敵狀態」。
咩係無敵狀態？即係唔會中call，就算附近有人報警求助，control都唔會調派呢架處於無敵狀態既救護車去，而會調派另一架最近既救護車。
呢十五分鐘時間主要係俾救護員處理埋啲手尾，例如協肋病人進行登記、處理少少文件工作、整理車上裝備、有需要既話亦會為車廂進行消毒清潔…等等。
既然個規則係咁定，通常都會用盡呢十五分鐘先開車走…吊頸都要抖吓氣，咁搏有獎？
趁住呢十幾分鐘時間，搞掂哂正經嘢之後我地會喺車上面休息吓。
「而家十二點半，仲未食到飯，做死人咩…」剛剛返回到救護車上既樂文師兄嘆氣：「不過好彩啲call好做，全部學生call，無乜嘢搞。」
「希望等陣順利返到局啦。」我望望手錶，距離無敵狀態時間結束仲有幾分鐘。
呢十幾分鐘，我通常會去小個便，去水機斟吓水，然後睇吓電話咁。若然車廂真係太過污穢，我先會落手清潔一下，譬如病人嘔到成地都係，或者搞到架車有血…
無敵時間結束。
開車駛離醫院無幾耐，救護車又再中途擊落。不過今次唔再係學生call，而係人事不省，地點係附近某幢私人屋苑。
我立即著起藍燈響號，示意馬路上既所有車輛讓路。
法例上賦予權力可以衝紅燈既車輛唔多，救護車係其中一架。
由於事發地點好近，我地好快就到達現場。
樂文師兄入屋後立即為訓喺沙發上毫無反應既男病人進行檢查。
檢查完，佢搖搖頭，擰住身同我地講：「CPR。」
然後，我同另一位同事立即分工合作，佢負責幫病人進行CPR，而我則拎出一切有關裝備，主管負責操作AED機。
當遇到危急情況，我地會打醒十二分精神，發揮出應有效率同專注，唔會好似做普通學生call咁遊手好閒。
完成呢轉call之後，三個人都成身大汗，消耗咗唔少體力。
望望手錶，已經點幾鐘，八點鐘開工到而家，剩係食咗個包，個肚呢刻已經餓到打哂鼓。
好彩既話，當無敵時間一過，我立即開車走人，然後順利返局食飯。唔好彩既話，一係再一次中途擊落，一係食食吓飯途中要放低筷子飯碗匆忙去車，最後搞到一餐飯要分兩三次食。
呢種就係救護員既生活，每次出車所面對既情況都可以好唔同，而食飯呢樣嘢，一直都係未能妥善解決既問題。
==============================================================================================================================
救護日常：
DBA (Dead Before Arrival)
無呼吸無脈搏，救護員會稱呢類case為DBA。
關於DBA call，有少少感受想分享吓。
DBA call之中，對象好多時都係老人家。除非係明顯死亡，否則救護員無權話唔救。
將病人送到去醫院，好多時啲醫生都會問一句：「邊度黎？屋企人呢？」
有時係老人院，有時係屋企。
醫生有權去cert一個人，而某啲醫生決定cert唔cert一個人既因素會取決於對方係來自邊度。假如係來自老人院，而年紀又有返咁上下，某啲醫生係會直接cert，唔選擇再作任何搶救。(縱使救護員一路上進行搶救，直至黎到醫院)
佢地可能認為，對方年紀都咁大，又住喺老人院，甚至有啲係連屋企人都無，就算將佢救返醒，最後咪又係送返去老人院孤獨過世，與其係咁，不如一切就喺呢一刻結束。
關於醫生既做法適當與否，我不作評論。
但諗深一層，其實都幾唏噓，一個人被救與否，係生定係死，有時係取決於其身世。