[愛情無限loop] 就係咁，我做左女神一年既備胎: 最終話 阿琪
係一間五星期酒店既門口，我望住一對新人影既婚紗相，「估唔到ＪＵＤＹ平時收收埋埋，原來都有Ｄ料到。」能蟹突然從後搭住我膀頭話。
離同阿琪分別既日子，已經兩年，本來以為呢兩年會過得好耐同好辛苦，但慢慢習慣落黎，原來，只要兩人心中有大家以及開心見誠，同埋勇氣，問題始終都會有解決既方法。
其實我好慶幸我可以生於呢一個科技發達既年代，ＳＤ一個ＭＳＧ、語音、視頻，其實真係可以將距離拉近。
一句講晒，適合既時間。
「你唔驚比能利聽到咩？」我笑住問能蟹。
「驚就唔係男人，點會驚……哎呀！」能蟹都未講完，就比突然出現既能利扭耳仔，「好心你今日做人兄弟，就收一收把死人口，未咁口花花啦。」
見到佢地兩個咁樣打鬧，睇幾次都覺得咁好笑，每一對人都有唔同既相處方法，有Ｄ人總會活係浪漫，有Ｄ人總會活係打罵，有Ｄ人總會活係平凡，有Ｄ人總會活係轟烈。
一句講晒，適合既人。
無錯，今日係ＪＵＤＹ同ＣＯＷ既大喜日節，佢地係返埋一齊後一年，ＣＯＷ再次求多次婚，不過果次求婚，無玩快閃，無搵我地出主意，所有野都係佢自己一手包辦。
係呢張婚紗相入面睇得出，ＪＵＤＹ佢笑得好幸福。
「喂，你地幾個未係度ＨＥＡ啦，快Ｄ黎幫手啊，好多人啊。」係接待處既阿珍話，而係佢旁邊打緊機既阿塔就幫口，「係啊……快Ｄ過黎啦。」
無言……我地行到過去，望住每一位既賓客帶來既祝福，我地跑ＧＲＯＵＰ有好幾位朋友都有黎，金姐同ＳＵＮＮＹ仲帶埋佢個女阿銀出席添。
當我接過阿銀既人情果陣，我輕聲問佢：「搵你既回憶搵成點啊？」
「ＳＯ ＦＡＲ ＳＯ ＧＯＯＤ啦，多謝你先前有陪我一齊搵回憶啊。」因為先前有段時間得閒，所以都有陪下佢搵回憶，不過呢個已經係另一個故事。
「係呢，今晚阿琪會唔會出現啊？」阿銀問。
而我支吾左一陣答佢：「……唔知呢。」
結婚有好多形形式式既人，有時連一Ｄ自己唔多見既親友都會到場，就好似我面前呢一位跑友咁，「咦，阿牛，原來你做佢地伴郎啊？」我望住我心口果個比較與別不同既花，答我眼前呢一位我認為佢係狗公既ＡＬＡＮ，「係啊。」
佢笑左笑就放低左封人情，然後就話：「真係估唔到果晚，會有咁多人搵阿琪。」
「係。」佢口中講既果一晚，就係我係尖沙咀搵返阿琪既果一晚，「多謝你，如果果晚唔係你影左張相ＳＤ比呂晨同跑ＧＲＯＵＰ，我都無可能會係尖沙咀度撞返阿琪。」
「傻啦。」ＡＬＡＮ笑左笑，而我又問：「但點解果一晚，你要影張相而唔自己上前去安慰阿琪？」
ＡＬＡＮ又係笑一笑後話：「我咩野身份ＷＯ，點可以去安慰阿琪，我只係一名狗公咋。」我聽到佢咁話自己，呆左一呆，而佢見到我個樣，笑左出黎，「自己知自己事啦，鬼叫我地平時口花花咩，但係，我都都只係得把口，要做既話，真係做唔出。」
聽到佢咁講後，我都笑左出黎，「咁又係，你出叻未成日話帶人去睇星。」
「係架，我以前係天文學會會長嘛。」ＡＬＡＮ一陣大笑後問：「係呢，呂晨呢？」
「呂晨今日做伴娘，剛剛行開左。」我回答完佢既問題後，佢好大反應話：「伴娘，咁一定好靚，好耐無見過我既女神呂晨拿，我入去搵佢先。」
果然，狗公都係會露出條尾。
入席，所有賓客都大致上到齊，但係唯獨有一個位空置左，一個我最想有人坐落去既位。
「阿牛，未發夢啊，就快要行禮拿。」七三廿一係我背後好大力咁打左一下，「死仔駛唔駛咁大力啊！」
「係拾拾叫我用盡全力打落你度架。」七三廿一講完後，同拾拾一齊大笑出黎。
各就各位，音樂響起，射燈既光茫慢慢由門篷散出，所有賓客係伺儀既說話下，合作地不停拍手，而我身邊挽住我手果個呂晨，就話：「阿牛，而家你既腦入面係未諗緊，如果我係阿琪就好拿？」
我笑一笑回應佢：「妳又何尚唔係想我係藍臣？」
我地兩個都笑左一笑，「放心啦，藍臣剛剛ＭＳＧ比我，話佢同阿琪已經到左香港，趕緊過黎，阿琪大頭蝦部電話唔記得拎，所以無覆到你ＭＳＧ。」
「個傻豬又係咁。」我回答，甜絲絲咁回答。
知道左呢個消息後，成個婚宴我都心不在焉，ＪＵＤＹ見到我咁，都叫左我埋一邊問我：「係未阿琪啊？」
「妳又知？」我話。
「你都唔識講大話既，所有野都寫晒上塊面度，不過如果佢真係返到黎，我都好開心架。」ＪＵＤＹ話：「不過，有樣野我想問你，我今日靚唔靚？」
「靚，緊係靚啦。」我答。
「咁如果阿琪黎到，我同阿琪邊個靚Ｄ。」「阿琪。」我諗都無諗就黎佢，「不過今日係妳大喜日子，所以比妳靚啦。」
ＪＵＤＹ聽到後笑左出黎，「希望阿琪今次唔駛再走，留低同你好好地一齊啦。」
「我都希望係咁。」我回以一個微笑，而ＪＵＤＹ就繼續去忙，而當佢就要走既時候，我叫停左ＪＵＤＹ，「ＪＵＤＹ，妳今日好靚，我祝福妳同ＣＯＷ可以百頭到老，永結同心。」
「多謝你，阿牛，識到你真係好。」ＪＵＤＹ講完就繼續去忙。
而我，就繼續等待阿琪既來臨。
坐住係度放空既我，諗返起以前既野，三年，我同阿琪咁既關係咁就三年，追佢一年，分開兩年，如果老牛大人仲係度會點呢？佢一定又會講好多金句教我，又或者，佢只會唔講野，從後咁無聲打我既頭。
ＣＯＷ為左ＪＵＤＹ設計左一個驚喜環節，就係叫左個速遞員係一個特定既時間送一件快件，而果個快件係佢為ＪＵＤＹ拍既一段片。
「阿牛，一陣你可唔可以幫我照顧果位速遞員？」ＣＯＷ呢一個要度，我好費解，「佢只係一個速遞員，點解要我特別照顧。」
「佢都算係一個有份幫我既人，你就當幫下我啦。」ＣＯＷ央求我。
「但係聽藍臣話，阿琪一陣會黎，可能我一陣無時間ＷＯ。」
「唔該你啦。」ＣＯＷ又再央求。
「……好啦。」最後我唯有答應。
希望個速遞員唔好同阿琪到達既時間一樣就好……不過有Ｄ野就係個天明玩你，當我見到藍臣黎左既時候，衝左上去問佢：「阿琪呢？」
藍臣都未有時間答我，個戴住帽既速遞員就到左。
「我問你阿琪係邊啊？」我問藍臣，但係藍臣十問九唔應，只係同我講：「你處理左ＣＯＷ叫你幫佢手做既野先啦。」
「……咁……咁阿琪係邊啊？」我又問。
「你去左先啦。」藍臣又話。
見佢無意慾答我問題，我只好死死地氣，但又露出一個微笑咁走向個速遞員度話，「我帶你去臺前啦。」
個速遞員點一點頭。
真係！真係唔明點解你早唔到遲唔到！偏偏要等到藍臣出現先到！阻住我見阿琪！真係罪無石恕！！！
拎左個快遞，開左氣片比大家睇，大家都睇得好感動，最感動果個一家係ＪＵＤＹ，佢喊到收唔到聲，我都無見過佢喊成咁。
而ＣＯＷ就企左係我旁邊，同我講：「幫手送個速遞員出去？」
「下！？阿琪可能已經黎左，我想去搵佢ＷＯ。」我話。
「幫埋我呢一次啦。」ＣＯＷ又再央求……好啦，你大日子，比面你。
「你跟我黎呢邊。」我同個速遞員講左後，佢就跟住我身後面行出宴會廳。
都唔知係未個天有心玩我，點解係都要阻住我見我既女神，ＣＯＷ大日子就話比佢阻住我無所謂，但點解藍臣佢又會……等等！？點解藍臣會知道速遞既事架？應該無人同佢講過架ＷＯ！？
正當我諗呢個問題之際，我身後果個速遞員就問我：「呢位先生，我有個地方唔識去，唔知你可唔可以帶我去呢？」
係一把女聲，一把我好熟既女聲，一把我好耐無聽過，而我又好掛住既女聲。
我轉身望住個速遞員，望住佢慢慢除左佢頂帽，見到佢臉容，佢果對好吸引我既眼睛，佢用既洗頭水既味……
「阿琪！」我攬實左眼前既阿琪。
「我想去你個心度，可以點行啊？」阿琪開玩笑咁話，然後好用力咁攬實我，「好耐無見拿……」
「我好掛住你。」「我好掛住妳。」
我地兩個異口同聲咁講。
「我地唔會再分開。」佢係我耳邊同我講。
「當然。」我用肯定既語氣話：「我地分開既時間已經好足夠，剩落黎既，我地要好好係埋一齊。」
如果，等係一種痛苦，咁呢個世界上等到真愛既人，都係吃慣苦之人。沒有甘哪來甜蜜，沒有驚天動地哪來經得起風浪。
我同阿琪，係宴會廳外相擁，聽住宴會廳內既掌聲，彷彿係為左我地兩個人既等待畫上最完美既句號。
－完－
大家記住睇埋作者的話啊