[愛情無限loop] 就係咁，我做左女神一年既備胎: 作者的話

大家好，我係很獅子的金牛。

好多謝大家睇呢篇網上小說，我都知小弟成日打錯字，但係你地都仍然睇落去我真係好多謝你地。

所以接落黎我會好好改善呢個問題，我會加油架。

其實《就係咁，我做左女神一年嘅備貽》係我第二篇係紙言上連載既小說，當初想寫呢一篇小說，目的係想為此紀念兩個人。

第一位係我已故既爸爸。



我將佢化成老牛大人呢個角式寫係呢篇小說入面，但係同小說入面有Ｄ唔同，就係阿牛同老牛大人既父子關係比起我同爸爸既父子關係來得要好好多。

我同爸爸係果種只要傾計，一句唔埋第二句道會鬧交既父子，但係我地之間有個共識，為左家庭和諧，我地通常好少講野，甚至係無咩點理大家。

點解要寫成咁大既反差？無它既，因為我最想同佢既關係，就好似小說入面阿牛同老牛大人既關係咁，我好想佢親自講佢以前既野比我聽，但係次次都係由媽媽把口聽返黎，媽媽成日講我同爸爸都係牛脾氣，可能，就係因為咁我地成日一句唔埋兩句就開波。

但當人愈大，出黎做野接觸社會愈多後，就會發覺其實要養好一頭家真係好難，自問雖然唔係小康之家長大，但係我覺得我既家庭係好幸福，就算Ｄ人話我係公屋仔無咩錢都好，我都會好自豪同佢講，「我有既財富比起錢更加重要，我每晚返到屋企三餸一湯，晚晚唔同，屋企大家和和睦睦無咩大問題」。

其實咁樣已經好好。



不過，當我想報答返佢地既時候，一晚既突然，就帶走左我爸爸，係小說入面老牛大人走左既劇情，其實同我真實面對既時候係一樣，人真係好化學，所以唔好以為仲有好多時間可以將來陪到屋企人，可能你有，但係，你地父母仲有無咁多？

樹欲靜而風不息，子欲養兒親不在。

所以大家追求愛情既同時，都要諗下自己身邊最親既人。



第二位係我一個鍾意既人，阿琪。



同小說入面一樣，我認識佢果陣係因為跑步，亦同小說入面一樣，佢真係好多人追……小說入面既內容，有一半都係我同佢既經歷以及身邊既事，每次打返出黎，我都會心微笑。

有時寫到我同佢既經歷既時候，我都會ＳＤ比佢睇，佢睇到都會笑出黎。

無錯，我仲有同佢聯絡，仲好好朋友添，而且佢都不時捉我錯字，話我打咁多錯字，點樣放上網比人睇啊。

我亦好多謝佢呢一兩年係我既身邊，陪我經歷左好多大大少少既事，我都有陪佢經歷人生既起落，有開心有唔開心，我仲識到好多唔同既人，新既朋友，所以呢一段時光對我人生黎講好重要。

我同佢既關係，其實可以用「這麼近，那麼遠」形容，同小說入面一樣，中期果陣阿牛曾經問過阿琪有無諗同佢一齊，而答案係阿琪有諗過但未ＲＥＡＤＹ，但呢一句未ＲＥＡＤＹ會維持幾耐？我唔知，只係知道，情呢一樣野，人永遠會害怕失去，所以有好多曖昧既人都情願選擇做一世既朋友，好過做一時既戀人。

可能，我同佢都係咁既諗法，不過老實講，我當然最想可以行多一步。



其實就係呢一個原因，一開始諗住呢篇小說係一個ＢＡＤ　ＥＮＤＩＮＧ，但無諗到有人一直睇落去，係想我撮合阿牛同阿琪，一直寫一直寫，我都覺得接落黎應該要好好撮合佢地，所以由一開始既ＢＡＤ　ＥＮＤＩＮＧ轉成想有兩個結局，再由兩個結局，不如寫成一個ＧＯＯＤ　ＥＮＤＩＮＧ。



所以希望大家鍾意我寫出黎既ＥＮＤＩＮＧ，因為呢個ＥＮＤＩＮＧ，我都希望可以發生係我身上。（比我自己ＦＦ下先啦　ＸＤ）

我就快講完架拿，大家再比Ｄ心機睇埋佢。

其實《就係咁》系列入面，我會將《就係咁，我做左女神一年嘅備胎》列成「情之三部曲」首部曲，當中既情唔只係代表愛情，而係世上既每一種情，而接落黎既另一部曲《就係咁，我呢排出席左好多喪禮》會繼續描寫每一種情。

如果大家發覺，其實新果篇小說其中一個角色已經出現左……係拿！就係果位幫阿牛處理老牛大人喪禮既小段，如果你地想知更多，就密切留意新一篇《就係咁，我呢排出席左好多喪禮》，呢一篇網上小說會係４月５日清明節上載。
https://www.shikoto.com/i/DOS

最後再次多謝大家睇呢一篇《就係咁，我做左女神一年嘅備胎》網上小說。

大家好，我係很獅子的金牛。