[愛情無限loop] 就係咁，我做左女神一年既備胎: ３３７　再見，我的女神

係紅磡火車站，呢一個電視台成日拎黎扮機場既車站，我同我媽媽係一則既旋轉門行左入黎，而家係早上既七點幾，「媽媽，要唔要買Ｄ野比妳食？」

「唔駛，今朝早食左少少野而家仲飽緊。」佢黎，係為左見一見我鐘意既人……而家要加多樣，同樣都鐘意我既人。

行到相約既地方，遠處見到四個人，阿琪爸爸同媽媽、藍臣，當然最重要既係阿琪。

「衰仔又幾識揀ＷＯ，幾靚女啊，唔錯ＷＯ。」媽媽遠處見到阿琪已經講到咁，近得既話都唔知會點，「我諗你阿爹在天之靈見到咁都會好安慰。」

「係架。」我諗你一定會咁諗既，老牛大人。



行到去佢地既面前，「世伯、伯母，早晨，呢一位係我媽媽。」寒喧地介紹過，講節哀順變同有心過後，阿琪爸爸拉埋左我去一邊。

「你爸爸既事，搞成點？」佢問。

「都七七八八，仲有三個星期就會設靈。」我答佢。

「咁快手，睇唔出你傻頭傻腦，做起野上黎咁快ＷＯ。」聽到佢咁講，心中有少少暗喜，「咁呢Ｄ係重要既事，而且係我爸爸既事，我一定唔可以馬虎。」

阿琪爸爸聽到我咁講，都投而一個安慰既眼神，當然我無講佢知其實搞得咁快，係因為叫左小段佢幫手，佢成套一條龍服務，我只要話比佢聽我地既選擇就可以。



不過呢Ｄ阿琪爸爸唔駛知，而且我係絕對唔會話佢知。

「我同你講啊。」阿琪爸爸再三咁叮囑我：「我係會不停安排相睇對像比阿琪架，所以你唔好抱咁大期望啊。」

「我知道架拿，不過我都會好努力咁追阿琪，所以世伯你都要有心理準備，到最後係我同阿琪係埋一齊。」我答佢，而佢都笑左一笑話：「都唔知而家Ｄ後生諗咩。」

返到去，見到媽媽、阿琪媽媽以及阿琪都傾得好開心，而藍臣就係旁邊不停ＳＤ　ＭＳＧ，我經過佢身邊果陣偷睇，見到同佢ＳＤ　ＭＳＧ果個人好似係呂晨，希望佢地有發展空間啦。

時間一分一秒咁過，好快就到左要入閘既時候。



「阿琪，唔好意思啊，今次要我霸住牛仔先拿，等用完佢先比返妳啦。」媽媽妳當我係Ｄ咩野啊……咁講都有既。

「伯母，隨便使用唔駛怕，盡情咁用唔駛比面我架，如果佢唔聽教唔聽話，妳ＷＥＣＨＡＴ話我知，等我教訓佢。」「ＷＥＣＨＡＴ！？」聽到阿琪既說話，我問佢：「妳幾時有我媽媽ＷＥＣＨＡＴ架？」

「頭先傾計果陣拎左拿，所以你最好聽話Ｄ，自己一個人唔好唔聽話，唔係你就知死。」阿琪呢句說話帶有警告既語氣。

「知道……知道……」

「臨入閘前，比你地兩個單觸傾下計啦，我同妳爸爸先入去，藍臣你都唔好阻住佢地拿。」阿琪媽媽話，佢仲好風趣咁同我打左一下眼色添，而我媽媽見到阿琪媽媽咁識做，都話要去廁所一陣先搵返我。

又無啦啦，我返我地兩個。

「你媽媽好好人，而且，佢好堅強。」阿琪話。

「係架，所以我好幸福。」我答佢，然後又問：「有無帶夠衫上去架，上面天氣凍好多架。」



「有架，不過我都係怕帶唔夠。」阿琪話，然後我就拎出一早準備好既野比佢，「就係知道妳怕凍，所以買左呢Ｄ野送比妳。」

阿琪好開心咁接過個袋，一睇，「嘩……駛唔駛咁多鬆馳熊。」佢笑到收唔到聲。

「無計啦，邊個叫傻豬鐘意鬆馳熊，我一見到未買囉，買下買下就買左咁多。」我話，然後就同阿琪一齊睇個袋入面既野。

「有邊個會送毛毛拖架。」「我會囉。」

如果，真係有時間靜止器既話，我希望真係可以靜止呢一個時間。

「個暖蛋就正常，但毛毛拖真係有Ｄ搞笑。」「邊會啊，不知幾可愛。」

因為，今次一別，都唔知幾時可以見到阿琪既笑容。



「仲有手套，咁好。」「緊係啦，成套架呢度。」

仲有，佢身邊可以聞到佢洗頭水既香味，與佢既身體接觸，以及……

我地兩個人雙目而視，慢慢湊緊既雙唇，臨別既一吻，係份外動人，份外不捨。