[愛情無限loop] 就係咁，我做左女神一年既備胎: ３３６　我愛妳

「我……」正當我想講出心入面既答案果陣，阿琪用佢既手指按上我既雙唇上面，「可唔可以比我講完我想講既野後，你先再講個答案我知啊？」

我望住眼泛淚光既阿琪，點左點頭。

「其實一開始，我真係覺得你係一個好友所以想同你發展做好朋友，但係唔知點解，每日同你既對話，慢慢變成左習慣，去到如果有一日唔同你ＭＳＧ就會覺得果一日係白過，當我有呢一種應覺既時候，其實我好驚架。」聽到阿琪咁講，我不解咁望住佢。

「當我每次有呢一種感覺，就好驚對方係會點諗自己，又驚對方只係一時衝動先咁做，又驚雙方都未了解過就開始，因為我以前都試幾次係咁，但到最後都帶比自己傷害，再加上屋企既事同自己既事，所以我好驚有咁樣既感覺。」

「但當我知道，你都對我有意思既時候，我真係好開心架，但我又唔敢再進一步，所以唯有一直保持住適當既距離，但估唔到會引起背後好多閒言閒語，甚至最後連本來既好朋友都唔支持你追我，我就明白到，其實唔止當一個人等另一個人太耐係唔好既事，就連要另一個人等自己太耐都係一件唔好既事，所以我開始怕，我開始驚，我成日不停同自己講，你對我既野唔係理所當然，總有一日可能會無，所以我一定要好好咁多謝你，又要好好咁同你講對唔住。」聽到阿琪咁講，我就問：「所以有其中一次你同我講多謝，其中一次同我講對唔住，就係因為咁？」



「嗯。」阿琪佢點一點頭，「我知道我自己處理感情處理得好差，所以成日搞到好多男仔都會以為我對佢有意思，但係，有Ｄ我只係想做朋友，而有Ｄ，我真係想發展落去，我係知架。」我望住阿琪，靜心咁聽佢講以下呢一番話：「每次同你去街市買野，我超開心架，知道後面跟住我既人係你，我有好大既安全感。你送泳衣比我果陣我超開心架，而且同你一齊游水，你就可以企係池中間，等我可以安心地游過去，因為我知道你一定會捉實我。生日果日你煮野食比我食，我好感動，其實我仲偷偷地係你背後影左張相，不過無比你知姐。妳對我做既每一件事我都會記住，最記住既，係你話會陪我實現每一個願望。」

阿琪開左佢既ＷＥＣＨＡＴ，拎返果張相出黎，「妳個傻豬仲ＫＥＥＰ住，咁睇黎我點都走唔甩。」

「緊係啦。」阿琪笑得好開心咁話：「所以，你要比我既野已經有好多，但係我自己諗返起，我可以比到你既野，其實少之又少……」「唔係，妳比左好多美好既回憶比我。」我答佢，而佢會心微笑咁話：「但我想為你做更多。」佢呢一句係好認真咁望住我講。

見佢突然既認真，我都收起左笑容聽佢講：「阿牛，而家你想做既野……唔係，應該係你要做既野，係留低陪你媽媽，因為佢已經失去左一個佢至親又至愛既人，如果連你都唔留低陪佢，佢就係得返自己一個人架拿。」

唔通呢一句，就好似媽媽先前同我講老牛大人以前既野果陣，提及到既，「我果陣希望佢選擇既，係家人……就係因為太愛，所以希望佢選擇家人」。



「其實……」阿琪講完之後，我緊接話：「當我諗緊呢個問題果陣，我都又諗如果係妳，妳會想我點，而家妳既講法，同我果陣時既諗法係一樣。」

阿琪聽到我咁講，笑得好燦爛咁話：「我就係知道你明白我既為人，所以先開始喜歡你。」

而我就微笑同佢講：「咁妳要好好加油，因為我唔止喜歡妳，我愛妳。」

一吻，吻係阿琪既雙唇上面，觸電而帶有體溫既感覺充斥全身，我地兩個緊輕閉雙目享受住呢一刻大家對雙方既愛，直到咀唇分離。

「阿琪。」我始終要親口講個答案比阿琪聽：「我想留係度陪媽媽，不過，妳要等我。」



而阿琪得意地微笑左一下話：「我唔可以保正以後發生既事係點，不過，就比一次機會你啦。」

我地繼續相擁，直到地鐵到站。