[愛情無限loop] 就係咁，我做左女神一年既備胎: ３３０　ＴＳＴ

阿富幫我叫左跑ＧＲＯＵＰ既人幫下留意有無見到阿琪既蹤影，我諗左一陣，「好，多謝你地。」搵人既話，點都係人多好辦事。

我地同把握時間，去下一個地點，但係每個地點，都只係失望，其他人都無發現，我既心亦開始動搖。

ＬＩＳＴ上面一個又一個地點刪去，好快去到最後一個地點。

「去埋呢個如果都係搵唔到阿琪既話，點算啊？」阿珍話。

「妳而家可唔以唔好講呢Ｄ泄氣既說話啊，一定要搵到，係唔係啊，阿牛？」阿塔話。



「……」我沉思咁。

「阿牛，我問你野啊。」阿塔又話。

「……」我繼續我既沉思。

「阿牛！」「係！」比阿塔嚇一嚇，回返神。

「一定可以搵到架！」阿塔捉住我隻肩話。



「一……一定可以。」真係？真係可以？

「就算最後一個地方搵唔到，大不了我地由頭搵過，我地實陪你既。」阿珍話。

好感動，阿琪，我地真係好想搵返妳。

突然間，電話快速咁響左兩下，一個係呂晨既ＭＳＧ，而另一個係阿富既ＭＳＧ，兩個ＭＳＧ雖然係唔同人ＳＤ出來，但共通點係都一張圖既相。

我先後開左兩張相睇，「係……係……」上天真係幫緊我，「係阿琪啊！！！」兩張相既背景其實好暗，但係中間個人，無論高度、衣著、側臉都好似阿琪。



阿塔同阿珍聽到我咁講，都衝左過黎睇果兩張相，「……阿牛，其實張相咁暗，都好難睇得出係阿琪……」「一定係佢黎架！一定係啊！」

「阿牛，你冷靜少少先，再睇真Ｄ……」「我睇得好真架拿！高度同阿琪一樣！衣著同阿琪平時著既衫一樣！側臉都好似阿琪！一定係佢啊！」係！無錯！一定會係阿琪！

我再望一望張相，見到既係文化中心特有既設計，「佢……佢係尖沙咀啊！」

上天真係一個最好既編劇，我地而家正正去緊既，就係尖沙咀，張ＬＩＳＴ上面寫住既地方係：

與阿琪第一次見面既地方，尖沙咀地鐵站