[愛情無限loop] 就係咁，我做左女神一年既備胎: ３２９　互望而笑

講真，當見到阿珍口中所講既人係阿富既時做，我有少少失望，而阿富都見到我失望既表情後話：「阿牛你好似好唔想見到我咁ＷＯ。」

「……唔係。」我笑得好尷尬咁話。

「係呢，你地咁夜係呢個公園做咩啊，係唔係……約左阿琪？」阿富講阿琪既時候，有少少避忌。

「我……都唔知點講。」阿富見到我講到臉有難色，就問：「係未發生左事？」

「唉……」就係我呼出呢一啖氣後，我將阿琪最近發生既事講左比阿富知，我地兩個坐左係公園既展椅上面，望住仲玩緊搖搖板既阿塔同阿珍，就咁講都用左我成半個鐘。



「咁睇黎你地最近發生左好多事ＷＯ。」呢個係阿富聽完我所說既話得出黎既總結。

「係啊……」我好簡單咁答佢。

阿富佢拍一拍我既膀頭，「首先，節衰順變。」我講左老牛大人走左既事佢知道。

「有心。」我回應。

然後，佢嘆左一口氣，「其實，阿牛你真係好好彩。」



「下！？」我驚訝地望住佢，而阿富即刻講：「我唔係話你爸爸走左好彩，而係阿琪咩都同你講件事。」

「係咩……」其實，都算係既……而阿富就講左以下既說話：「因為阿琪選擇左你陪佢過呢Ｄ難關，亦即係話，佢覺得只要發生左事，對佢最可靠既人，係你。」然後，佢又嘆左一口氣，「你知唔知有幾多人都好想做阿琪身邊為佢分擔既人啊，我都好想，但係阿琪無揀我。」

我唔知點回應佢，而佢又問：「你會唔會知道，阿琪點解唔揀得做呢個人啊？」

呢一句我更加唔知點樣回答，我只係好尷尬咁笑住話：「唔知啊。」

「我知。」阿富佢竟然咁話，咁問我做咩鬼啊，「我知道係阿琪眼入面，我係一個好煩同好專橫既人，可能係好多人眼中我係一個好好先生，有好多人都會話做我女朋友一定好幸福，但係，好多野都要睇兩個人之間既相處夾唔夾得黎，我知道我自己係一個佔有慾幾強既人，就係因為有呢樣佔有慾，我先想所有人覺得我係一個好好先生，同我一齊既女仔都唔會再搵到另一個對佢地咁好既男人，但原來，刻意去做到咁係一件好累既事，就算有一個好鐘意自己既女仔同我一齊，到最後唔係我鐘意而我仲要對佢好，到最終只會係一個吃力不討好既局面。」



聽完阿富既說話後，我回答左佢一句話：「其實，阿琪都有錯既。」

「佢有錯？」阿富問。

「佢錯在如果一直對你無感覺，就應該早Ｄ同你講，咁就唔駛搞到果陣時既局面。」我望住阿富話：「我知道你果一刻真係好鐘意阿琪，而且係去到不能自拔既地步，如果唔係，你就唔會凌晨走到阿琪樓下同佢表白啦。」

「……呢件事，你都知？」阿富問。

「你同佢既野，佢一字不漏同我講。」我回答。

「咁姐係……」「……係，我知道。」我指一指自己個咀，示意我明白佢果一晚同錫左阿琪一啖。

「咁……你……」「放心，我無野，都係果一句，阿琪一日係單身，所有男仔都有機會成為佢既男朋友。」我同阿富講。

「如果……如果我有你咁灑脫，可能一早就同左阿琪一齊。」阿富話。



「係，阿琪都有咁講過。」我呢一句後，我地兩個互望而笑。

「你幾時出返黎跑返啊，你都失蹤左咁耐。」我問阿富。

「咁就要睇下你幾時返入跑ＧＲＯＵＰ拿。」阿富笑住答我。

「會架，只要我處理好所有既野，我就會返黎。」我回答。