[愛情無限loop] 就係咁，我做左女神一年既備胎: ３１７　ＰＲＯＦＩＬＥ相

直到而家，我既電話都不停係度響緊，我知道，係阿琪既ＭＳＧ，但係，我而家無呢個心情去睇佢既ＭＳＧ。

我陪媽媽坐左係露臺度，而家已經係天光，日出係我右手面射左ｄ陽光過黎，因為我既右邊係東邊斜少少。

媽媽望住日出，再望一望老牛大人成日會企既位置，然後話：「平時，你阿爹會企係度，望住街果ｄ人行路、跑步……」眼淚又開始流出黎，阿媽亦都再講唔到落去。

我抱實坐係我旁邊既阿媽，「……唔……唔好咁啦。」

靜默左一陣後，佢問我：「牛仔，你肚唔肚餓啊，你仲未食早餐啊。」



「我……」我唔知點樣答阿媽，不過佢無等我既回答，就入左廚房整左個面我食，我拎住佢煮比我既面，望左好耐都無食度。

因為，而家咁既情況，仲邊有心情食野。

「做咩唔食啊？」阿媽問我，而我，就將個面拎比我阿媽話：「不如妳食啦，妳都未食早餐。」

「我……我食唔落……」又再哽咽，呢種感覺點解咁似曾相識。

回想上次有呢一種類似既感覺，係失戀既時候，果陣又係呢個露臺，老牛大人搭住喊緊既我個勝頭話：「喊，係因為你覺得今次失去左一個好寶貴既野。」



如果，同老牛大人講既一樣既話，今次既感覺比起上次失戀既更嚴重，係因為上次失去左可以搵得返，但今次失去左就無法返轉頭。

原來，仲有一ｄ痛比起失戀及得不到既愛戀更痛，不過而家最痛既果一個人一定係阿媽，因為，佢唔止無左親情既愛，佢連自己最愛既人都無左。

喊到累，阿媽終於訓左，而我，就食左果碗放凍左既面，食左幾啖後，我打開自己既電話，見到阿琪ｄ　ｍｓｇ，其中一個係咁。

阿琪：我好擔心你啊，你唔好唔應人啦，如果你咁我都唔知點做好，我只係想陪住你啊，你要知道而家有我係你身邊，我唔準你有事架，你有咩事都要話我知，快ｄ覆我啦

如果係以前既話，可能我一早就覆左阿琪，但係我而家連覆佢既動力都無，只係漫無目的咁開左電話ｄ　ａｐｐｓ，又關左佢，開左，又關，開左，又關……



直到，我開左ＦＡＣＥＢＯＯＫ，見到有新增朋友既要求，入去一睇，原來係先前老牛大人開始玩ＦＡＣＥＢＯＯＫ果陣，加左我做朋友，但係，我當時無ＡＣＣＥＰＴ。

唔ＡＣＣＥＰＴ既原因，可能大家都會知道，就係唔想比自己屋企人知自己出面既私人野，但係而家，我有少少後悔。

按下確認，見到老牛大人ｕｐｌｏａｄ　既相，原來，每當我陪佢既時候，佢都會偷偷地影一張相放上去。

陪佢去飲茶……偷拍我極樣袞既食相。

陪佢去睇戲……佢拍低左戲飛尾放左上黎。

陪佢去晨運……我偷偷地訓既時候，比佢影左都唔知道。

我每次問完佢問題後佢都會打一ｄ字上去，係文字間，佢稱呼我做我家少爺，見到果下笑左笑，但係，本來向上彎既咀角慢慢變成向下。

真係……忍唔住。



原來佢係咁珍惜我每一次陪佢既時間，但係……我呢……我有無花時間去陪老牛大人？我答唔出……

我望住老牛大人ＦＡＣＥＢＯＯＫ果陣ＰＲＯＦＩＬＥ　相，佢笑得好開心，呢一刻，我有一個衝動，我下載左老牛大人呢一張相，出左門，走左去沖曬店。

「先生，有咩可以幫到你？」店入面既服務姐姐問我。

我深呼吸一啖，腦入面不停同自己講唔可以喊，然後同個服務姐姐講：「我……我想曬我爸爸……呢張相做……做……」我講唔出車頭相呢三個字，亦都忍唔住喊左出黎。

而服務姐姐見到我喊成咁，都慌張左起黎，「你想曬ｄ咩？」

我哽咽咁同服務姐姐講：「……車頭相。」

然後佢就一副好似明白我點解喊得咁勁，幫我處理老牛大人呢張相。