[愛情無限loop] 就係咁，我做左女神一年既備胎: ３１８　左撥……更多……退出群組

如果，可以比返ｄ時間我，我會陪你做更多野架老牛大人。

飲幾多次茶都得架，去好多次晨運，睇好多你想睇既戲，你仲要繼續教我好多野架，但點解……點解你要走得咁突然。

拎住沖曬店既單行左出黎既我，不停擦眼淚，我好討厭呢一種感覺，我討厭點解ｄ眼淚擦極都仲會不停流出黎，點解上次係咁……今次又係咁……

我唔知用左幾耐既時間先行返屋企，一去到屋企既門口，已經見到門口既地主已經被一張紙封住左，旁邊仲有一個化寶用既筒，仲有好幾支大臘燭，其中一支仲要係點住左。

門係開住，我見到媽媽坐左係廳度，手中折緊元寶。



「……牛仔，你去左邊啊？」媽媽問我。

「我……我去左曬爸爸既相。」我開左老牛大人既ＦＡＣＥＢＯＯＫ比佢睇，「我用左呢張相做爸爸既……車頭相。」

媽媽望住ＦＡＣＥＢＯＯＫ上面老牛人張相，「呢張相幾好啊，佢笑得咁開心。」

我坐左係媽媽既旁邊，陪佢一齊折元寶，「ｄ野係妳出去買架？」

媽媽點一點頭，「……頭先我訓唔著，一合埋眼就諗起你阿爹，平時只要張開眼都望到你阿爹，但而家望唔到。」



我折好一個，放入已經裝左半滿元寶既袋入面。

「頭先我問買衣紙既老闆，佢教我買呢ｄ野，仲比左張卡片我，話果個人可以幫我地搞爸爸既身後事。」媽媽比左張卡片我後，就繼續折元寶。

而我，就望一望呢一張上面印住個名叫小段既卡片，「我一陣會打去問問。」

媽媽聽到我咁講後點一點頭。

返入房，拎左電話出黎，唔知點解有一種好悔疚既感覺，可能，係來自睇完老牛大人ＦＡＣＥＢＯＯＫ上面既野。



如果，呢一年我無遇到過阿琪……

如果，呢一年我無入跑ｇｒｏｕｐ……

如果，呢一年我唔成日夜返……

我係未會多左時間陪老牛大人。

平時我睇戲有一個習慣，就係會將睇戲既飛尾貯起，望住枱上面果張同老牛大人一齊睇既戲既飛尾，我真係，好後悔無抽多ｄ時間陪老牛大人。

拎左部電話出黎，如果……如果無左呢ｄ，係唔係會好ｄ……所以我決定……

我開左個ＷＨＡＴＳＡＰＰ　出黎，望住個ＬＩＳＴ。

呢個，係果次我地一大班人一齊去對付馬高而開既ＧＲＯＵＰ，最後，阿琪同藍臣都黎左幫手，係出發前，老牛大人仲叫我小心ｄ……



左撥……更多……退出群組……確認。

呢個，係果次馬高搗亂左ＪＵＤＹ生日會後，我地要設計搵馬高，呂晨都有黎幫手，我記得去捕獲馬高之前，老牛大人有講佢以前都用左好多係愛情上面，錯過左同爺爺過生日既時間……

左撥……更多……退出群組……確認。

呢個，係阿琪搵能蟹假扮佢男朋友，為左要阿富放棄既ＧＲＯＵＰ，老牛大人講過，如果當我覺得累，就諗下我同阿琪之間有咩野好既回憶，諗多ｄ就唔會累，但我同老牛大人之間既回憶……

左撥……更多……退出群組……確認。

呢個，我最記得，因為係唯一一個有老牛大人既ＧＲＯＵＰ，呢個ＧＲＯＵＰ我地係幫ＣＯＷ向ＪＵＤＹ求婚，老牛大人因為打字無我地咁快，所以每個回覆都慢左好多……

左撥……更多……退出群組……確認。



呢個，係只得我、阿琪同ＪＵＤＹ既ＧＲＯＵＰ，係成左方便我地三個人約食飯既ＧＲＯＵＰ，但係，都好耐無用過……

左撥……更多……退出群組……確認。

仲有呢個，本身話要打邊爐，但係最後變成燒野食既ＧＲＯＵＰ，我仲差ｄ比呂晨食左，返到屋企老牛大人仲問我係未比人強姦添……

左撥……更多……退出群組……確認。

最後就係呢個，呢個，係阿琪邀請我入黎既跑ＧＲＯＵＰ，我係呢個ＧＲＯＵＰ度遇到左好多既人，好多既事，所有野，一切一切都係因為呢個ＧＲＯＵＰ……

左撥……更多……退出群組……確認。

我放低左部電話，呼左一啖好長既氣，就好似，將一切苦都呼出黎，「……結束拿。」

電話放落去既地方旁邊咁岩有一張戲飛尾，並唔係同老牛大人去睇既戲，呢張戲飛尾上面既字已經甩甩地色，但我依稀見到上面既戲名同字。



「哪一天我們會飛」呢套戲名印左係飛尾上面，ｄ字既下半部甩色都甩得差唔多，我好記得，呢套戲係阿珍阿塔同我一齊去睇，我最記得既係呢一日，因為呢一日係我同阿琪相遇既日子，湊巧地，個日子除左個年份同今日既日期唔一樣外，月同日都同今日一樣。

咁樣，就一年。