[愛情無限loop] 就係咁，我做左女神一年既備胎: ３１６　撕心裂肺

接受唔到既事實，最後都要接受，臨要走既果一刻，媽媽叫我一陣入去果陣，記住望老牛大人拎望ｄ手鏈、頸鏈同戒指，我對住佢點一點頭。

而佢，成個人放空左咁，任由眼淚滑落。

直到，護士又問邊個係老牛既家人，我跟住佢既身後面，行去臨時停屍間，望住呢個名，我忍唔住，喊左出聲，原來當你有親人入左呢間房入面，個心係咁痛。

入到去，一個警察同護士係度等緊我，護士同我講：「要幫你爸爸身上面金屬既野拎走。」

聽到佢咁講後，我就話：「我……我想拎返ｄ手鏈、頸鏈同戒指。」



護士向我點一點頭，而我警察都幫我手解開爸爸既衫，係拎之前，個護士同我講：「有ｄ文件要黎幫我簽。」佢拎左一張紙比我，其實，都而家呢一刻我都記唔住果陣紙係ｄ咩，只係記當晚，我拎住支筆將自己個名寫左係親屬欄果一條線上面後，就同個警察將老牛大人身上既手鏈、頸鏈同戒指除左落黎。

除既時候，我見到搶救老牛大人果陣留下既瘀痕，深呼吸左一下，眼淚流落黎。

整個過程十分鐘都唔夠，我拎住老牛大人既遺物，係行出去既走廊度，一路喊一路行，腦入面只係得返一個想法。

我爸爸，死左拿。

行到出去，媽媽見到我喊得咁緊要，佢都喊得好大聲望住我話：「爸爸點啊？」佢呢一問，我諗佢仲等緊果個奇蹟，但係……我講唔到野，只係對佢搖一搖頭，然後，佢好用力咁攬住我繼續喊。



因為，奇蹟無降臨到。

因為我有報警，所以又屋企去到醫院呢一程都有一架警車跟住我地，而回程既時候，我地都係坐返警車返。

今日既天好黑，而當我如媽媽離開既果一刻，微雨落下。

係警車上面望住呢一個雨夜，媽媽既回頭目光望住醫院既門口，「我地就咁抌低左你爸爸……」千個不捨，萬個不捨，我地都只可以將老牛大人先留低。

而係車上面，警察同我講兩日後我地處理既事，仲留低左個聯絡比我，因為當日個警察都會到，呢ｄ係佢地既例行公事。



去醫院既果一程，車嗚笛聲四響，返呢一程，靜寂，去到屋企樓下，樓下既看更見到我地兩個，就問：「你先生佢……」

問題都未問晒，我媽媽就搖一搖頭，看更都識出咁講左一句：「節哀順變。」

警察都跟左我地上去，因為佢地要拍幾張相返去留個紀錄，而我同媽媽，就係屋外面等ｄ警察做完佢地要做既野。

十五分鐘後，屋企入面就得返我同媽媽兩個。

「……早ｄ訓啦，都累拿。」媽媽只係講左呢一句後，就返入房。

而我，就望住頭先搶救老牛大人既地下，忍唔住喊左出黎，但係，我唔敢喊出聲，因為我唔想媽媽知道我喊緊。

但係，原來入左房既媽媽都已經喊左出黎，佢都怕我知道佢喊，所以忍住自己唔喊出聲，但係咁樣喊，只會更加辛苦。

我行左入媽媽既房，佢望到我後，喊住話：「估唔到，尋日仲好地地，今日就唔見左。」



呢一句，無論講定聽，都好撕心裂肺。