[愛情無限loop] 就係咁，我做左女神一年既備胎: ３１５　老牛大人，走了

望住個鐘，時間一分一秒咁過，我企左係度，而我旁邊就係坐住左既媽媽，佢好緊張咁捉緊左我隻手，口中不停碎碎念……「無事既……無事既……」佢既眼淚不停留緊落黎，但係，佢無喊出聲。

而我，腦海一片空白，望住一個又一個既醫生護士不停走黎走去，無錯，我而家，係急症室。

我仍然望住個鐘，回想起，一個鐘前既事，同阿琪ＳＤ完ＭＳＧ後，好開心咁返到屋企，一開門，好靜，靜到出左事都唔知。

老牛大人今晚好早就去左訓，咁我媽媽當然都係啦，而我，心情好好咁沖左涼，換左衫後就訓左上床，睇緊我同阿琪一直而黎既對話回顧，仲諗緊，我上到去後有咩野應該要做。

我好耐都無試過對一件事咁上心，即刻行到電腦枱前面，諗住上網搵ｄ資料，當我開電腦果陣，見到枱面有封好厚既信，我好奇咁拎起，正想打開既時候，聽到……



「衰佬，仲咩事打我啊，訓緊覺啊。」我屋企其實隔音設備好差，所以有時都會聽到佢地傾計既野。

可能，老牛大人發緊夢打緊拳。

不過……

「做咩向我吹氣啊，未再搞拿……」然後，係好幾下好大聲既呼吸聲……「衰佬，咩事啊你……喂！醒下啊！仲咩事啊！你唔好嚇我啊！」

點解？點解ｄ說話好似有ｄ唔對路！？



我放低左果封好厚既信，行去佢地間房度，見到媽媽拍打左老牛大人塊面幾下都無反應，我媽媽已經好緊張咁望住我，「牛仔，阿爸佢……」

突然我意識到，有件大事可能要發生，我走上前摸一摸老牛大人既身，好凍……再摸一摸佢心口，好微弱既跳動……

「……報……報警。」我講完出黎後就即刻去左打電話，而我媽媽就不停咁叫老牛大人醒，但係，都好似無用。

直到，醫護到場……

直到，醫護搬左老牛大人出廳做ＣＰＲ同電擊……



直到，我行上架救護車上面，見到佢地好落力咁搶救老牛大人……

我都係，接受唔到呢件事既發生，我可以做既只有緊握自己既雙手祈禱，老牛大人唔好有事啊。

急症室入面，今晚好靜，唔似我平時係電視見到咁，有係度等緊既病人，唔多，但佢地都不停咁投訴點解要等。

「牛仔……」媽媽叫我，哽咽咁叫我：「無事架，你阿爹一定會無事架，佢好返回醒返架，電視劇好多都係咁架，佢一訓醒我地就可以接走佢架拿。」

呢番說話，只會有一種人先會講出黎，就係果ｄ想有奇蹟出現既人先會講。

突然，我電話響左一下，係阿琪。

阿琪：訓唔著

我望住佢呢個ＭＳＧ，眼淚慢慢咁流落黎，打左幾隻字後ＳＤ左比佢



我：我爸爸入左急症搶救緊
阿琪：下！？
阿琪：點解咁突然？
阿琪：你有無事啊

我無覆佢，呢個時候我只係想好好咁陪我媽媽。

直到，一個卷頭髮既醫生行出黎，「邊個係老牛既屋企人？」

「我……我係！」媽媽成個人彈左起身行去醫生面前，而我，就係旁邊扶住佢。

「你地可以跟我黎。」醫生同我地好輕描淡寫咁講，而我地跟係佢身後行左幾步之後，佢再轉身，用頭先果種輕描淡寫咁話：「伯伯佢走左架拿。」

可能，醫生每日都面對好多生死先可以咁輕描淡寫，不過，我同媽媽就唔可以，媽媽聽到醫生既說話後，佢成個人無力咁跌一下，如果唔係我扶住佢，佢一定會跌左落地下度。



「下！？」媽媽呢一個下字叫得好有中氣，但後來換上既，係嚎啕大哭，而我ｄ眼淚好似快過我既反應一樣，不停咁湧出。

突然間，急症室入面既人全部都望住我地，就連本身投訴緊既病人都收左聲，望住我同我媽媽，好似覺得，而家呢一刻，就只有我地值得發出聲音一樣。

入到去，見到既，係老牛大人訓左係一張床上面，旁邊既儀器，搶求用既喉管，以及醫生係旁邊同護士講：「去世時間，１點３３分。」

媽媽見到老牛大人即刻行左過去，企唔隱既佢扶住床邊既把手，「點啊啊……點解你要抌低我啊……你仲未睇住牛仔結婚架……你仲有好多野未做架……」

點解？點解當一個人走左之後，先會覺得仲有好多野都未同佢做過？

媽媽望住老牛大人，見到佢仲張大個口，「老公……你係未仲有好多野想講啊……唔駛講架拿……我地知架拿……」媽媽佢用手幫老牛大人合返埋口，而醫生呢一刻行左過黎同我地講：「你地可能要出一出去先，因為仲有ｄ野要處理，處理完會再叫你地。」

又係果種輕描淡寫。



我扶住依依不捨既媽媽行出去，而媽媽口中仲係不停咁講：「我地要係度等爸爸，佢一定會醒返架，佢一陣就會返生架拿，好多電視劇都係咁架。」

我望住媽媽，不忍既眼淚流下。

平時既佢只會叫老牛大人衰佬，到最後，叫左老公。

平時既佢同我講老牛大人會叫你阿爹，而家呢一刻，變返做爸爸。

而我電話又響起。

阿琪：好擔心
阿琪：你點啊

我見到阿琪呢兩個ＭＳＧ，只係打左一句比佢



我：我爸爸，走左