[愛情無限loop] 就係咁，我做左女神一年既備胎: ３０８　與能蟹的約會

同左老牛大人話今晚唔返去食，因為，約左能蟹今晚見面，我同佢約好左係一個大排檔度見面，呢個大排檔，係我地一有心事都會約去既果個大排檔。

一去到，就已經見到能蟹叫左成大啤酒，臺面一樣菜都無，行左過去一坐低我就話：「我又唔係唔開心，唔駛叫咁多啤酒掛。」

能蟹聽到我咁講後，嘆一嘆氣話：「呢ｄ啤酒唔只叫比你飲架，就用我。」佢開左一支酒，然後倒左落我同佢個杯度，「我而家睇住我朋友比另一個人傷害緊，但我自己咩野都做唔到，好唔開心。」

我聽到佢咁講，只係笑左一下，「可能件事無你想像中咁複雜呢。」

能蟹聽到後都笑左一下，「希望啦，我只係覺得，而家我係你既身上面，見到當你阿銀既影子啊。」



「阿銀？」我問。

佢將手上果杯啤酒一下飲晒，「係啊，阿銀啊，果陣想我改變既果一個阿銀，不顧一切對我好好既果個阿銀啊。」然後，佢無再倒酒落自己個杯到，而係直接成支咁飲，「你知唔知果陣我對阿銀，只係覺得佢係一個可有可無既人，如果我有事，佢一定會第一個人出黎幫我，不過就算我唔搵佢，都可以有其他人幫到我，佢既位置，就係咁可有可無，你明唔明啊？」

我好疑重咁望住能蟹問：「你同我講呢ｄ野做咩啊？」

「你仲唔明？其實係阿琪心目中，你可能都係咁可有可無架咋。」能蟹話。

「但我覺得，佢唔會。」我答佢，佢聽到呢一個答案後，又嘆左啖氣，「我諗，當年阿銀就好似你咁諗，所以一直堅持落去，但係到頭來佢得到左ｄ咩？未就係我既傷害囉。」



好明顯，就算阿銀失左憶，金姐話無左怪能蟹，但其實能蟹仍然自己怪自己。

「我唔想見到我朋友到最後，因為呢一個女人令到佢以後都害怕左愛情啊，你值得有一個真心對你好既女仔，而唔係一個只係你一味付出而另一個只會照單全既人啊。」能蟹話。

「阿琪唔係呢一種人。」我用肯定既語氣講呢一句話，但唔知點解，一講完呢一句後，我個心有ｄ虛。

「真係？阿琪唔係呢一種人？咁阿琪對你做過ｄ咩野你覺得係好偉大，佢係放棄左為你架？」能蟹問我。

「我……」我諗左一陣，「我聽過藍臣話阿琪為左我同反抗佢爸爸。」



「咁都係你聽人講姐，但你再真心再諗一諗，阿琪為左你做過ｄ咩？」能蟹又再問多次。

而我，又返左去果一個回憶迴路入面，係入面，我同阿琪既回憶又一個一個咁出左黎，但係，我見到好多既回憶後面，都係而我付出做基楚既快樂。

阿琪為我做過ｄ咩？呢一刻，我真係答唔到能蟹。

但係，我腦海中不停有把聲音話左一個答案比我知道，而呢一個答案，我都直接同能蟹講：「阿琪為我做過ｄ咩，唔重要，最重要既，係我而家呢一刻可以為阿琪做ｄ咩。」

可能，好多人聽到都會覺得我好傻，但係，當所有人都同我一樣深愛住某一個人既事後，做所有事，都會不為後果而去做。