[愛情無限loop] 就係咁，我做左女神一年既備胎: ３００　重要的愛

入到屋，尷尬，可能係因為面對住阿銀掛，幾日前仲同佢鬥生鬥死，而且佢仲好憎我地，而家就好似變左令一個人一樣。

完全係兩個唔同既人。

好有禮貌，而且佢仲染返黑ｄ頭髮，落落大方既一個女仔咁，佢微笑同我講：「口唔口渴啊？我去拎ｄ野你飲？」

「……唔駛拿，係呢，金姐出左去好耐？」我問，因為想知金姐仲有幾耐先返到黎。

「我媽媽佢真係剛剛出去咋，唔過幾分鐘你就黎左。」佢答我，咁姐係我要單獨咁對住阿銀？



對住佢，我真係唔知講咩好……而家佢眼定定咁望住我，為免尷尬我只好四週圍望，盡量唔好同佢四目交投。

「係呢？」「係！！！」佢無啦啦問我野，我真係嚇一大跳，呢一嚇，我真係成個人彈左起身，本來坐緊係度變成跌左落地下。

阿銀見到我咁，都笑左出黎：「你無事嘛？」

「……無……無野。」發生咁既事，我仲尷尬。

我住返係度後，見到阿銀不停咁忍笑，而我就話：「妳想笑未笑囉……」「哈哈哈！！！！！！」估唔到佢又真係笑出聲。



而我，都比佢咁既笑聲感染，笑埋出黎。

好彩又發生呢件事，我地之間先無咁尷尬。

「係呢？你女朋友呢？」佢問我。

而我就好奇地問佢：「咩野我女朋友？」

「果日同你一齊黎探我果個女仔囉。」阿銀講得一副理所當然。



「……佢……佢今日有少少忙。」呢一次，係我第一次無即刻澄清阿琪唔係我女朋友。

阿銀咁樣問完後，一副羨慕眼神望住我：「我都好想快ｄ搵到我既真命天子啊。」

真命天子？我會係阿琪既真命天子？

然而，阿銀又話：「其實，係我失憶之前，我地係未識架？」

「下！？」聽到阿銀咁講我嚇左一跳，佢知道自己失憶，我用一個驚訝既樣望住佢，而佢就笑一笑話：「過左幾日，我發現我好似有好多野都同社會脫節咁，iPhone 竟然出到１０，但係竟然炒唔起，港幣同人民幣既兌率竟然對調左，最唔同既係，樓價仲貴左好多添啊。」阿銀一連用左驚嘆既語氣話我知，然後，佢又一副既落莫話：「本來我想用手機打去呢幾年識既朋友問下我失憶既時候，我係點過，不過媽媽就好堅持話叫我唔好知仲好。」

我好明白金姐既用意，不過……

「我叫你做阿牛得唔得啊？」阿銀問，而我點一點頭，「阿牛，其實我失憶既時候，係未做左好多錯既事啊？」

望住面前呢一個求知若渴既阿銀，「……係。」我點一點頭好老實咁答佢，因為我覺得，就算所有人點樣阻止阿銀，佢始終有知道自己記憶既權行。



佢聽到我咁講後，若有所思咁點一點頭話：「我都係咁諗，而且我覺得果件仲係一件好錯既事，錯到，連家人都唔應該原諒我。」

係，阿銀做既事真係好錯，因為佢係傷害左自己，而且傷害到金姐。

「不過，我覺得好幸運。」阿銀露出左一個好滿足既微笑，我疑惑地望住佢。

而佢，就心懷感恩咁話：「如果，犯下天大既錯，家人都會無條件地原諒，呢一份愛，比起世間上所有既愛都來得重要，就算係我當初做左一個錯既選擇，呢一個家永遠都會為我而開門，係我既避難所，係我既歇腳點。」

如果，如果我選擇同阿琪上大陸最終係錯既決定，唔知我既家人，會唔會原諒我呢？

我諗……

一定會。