[愛情無限loop] 就係咁，我做左女神一年既備胎: ３０１　序幕

「如果……」我問阿銀，「……如果當妳知道返失憶果陣既野，但係果ｄ回憶係令到妳憎恨自己既話，妳會點？」

阿銀聽到我咁問後，就好得意咁拎左一部好舊款既手機，呢部手機係一部眾人話可以擋子彈既手機，「前幾日我搵到呢一部手機，上面有好多好朋友既電話。」我諗佢所講既好朋友，應該係佢仲未變壞之前時所識既好朋友，「我想逐個逐個去搵，問返佢地會唔會知道我失憶果段時間，我究竟做左ｄ咩。」

「咁……妳仲未答我既問題……」我問，但阿銀用好堅定既眼神望住我話：「唔會，做左出黎就唔怕認，我要對我所做過既野負責，更加要為自己負責，所以我唔會憎果陣既自己，因為果陣既自己都係屬於自己既選擇。」

「就算果ｄ係對而家既妳背道而馳，妳都唔會憎恨自己？」我再問。

「係。」阿銀依然好堅定咁點一點頭。



面前既阿銀，佢果種堅定真係好令我佩服，不過諗深一層，可能當初就係佢呢一種堅定，令到佢選擇離家出走同變壞。

呢種性格如果向好既發展可以得出一個好既效果不失係一件好事，但如果向壞，後果真係好難想像。

所以，我個計劃一定要安排得好好。

「阿牛，你要幫我保密唔好話比我媽媽知，我想搵返失憶果段記憶啊。」阿銀一副央求既樣，面對一個咁樣既女仔，「知道拿。」我其實都幾容易心軟。

我同阿銀傾左陣，大既都係佢既生活點上既野，以及，先前佢所做過既一ｄ事，佢好認真咁聽，有ｄ野聽左佢會大笑，有ｄ野聽左佢會好難以置信，但係睇得出佢接受先前咁樣既自己，就好似佢所講既野一樣。



就咁樣同佢傾計傾到金姐返黎。

「點啊阿牛，你好少會搵我架ｗｏ。」金姐一見到我第一句就咁講，而我只係傻笑咁回應佢。

「你地慢慢傾啦，我返房上網睇下野。」阿銀話，然後返入自己房，臨返入房果陣佢同我做左個守秘密既手勢，而我好識做咁點一點頭。

金姐見到我地兩個既動作，就問：「你地兩隻野係我唔係屋企既時後做左ｄ咩？」

我又係傻笑望住佢。



金姐見我咁樣傻笑，無問落去，「你地兩個後生係度整古做怪。」佢坐左係我面前，開門見山咁問我：「點啊，想問我你同阿琪既野啊？」

「妳又知？」我問。

「我做人做得耐過你，眉頭眼額見咁多，一睇就睇得出你想問咩啦。」金姐話：「點啊，你同阿琪而家咩野關係先？」

「唉……」一切既野，就係呢一下嘆氣下展開左序幕。