[愛情無限loop] 就係咁，我做左女神一年既備胎: ２９８　闖

返到屋企，老牛大人同阿媽一切如常咁食緊飯，「死仔返黎拿，快ｄ過黎食飯。」
雖然老牛大人叫到，但係，我今日真係咩野胃口都無，「……我唔食拿，你地慢慢啦。」
「個死仔一定係出面食左野啦。」老牛大人話，而阿媽就幫我講：「阿仔都咁大啦，由佢啦，咁你入房休息下啦。」
入左房後，腦入面仍然係果一個難睇，阿琪，如果照藍臣既說話，阿琪果邊已經無法改變，咁我呢邊可以做ｄ咩野去解決呢？
其實，我心目中都有一個答案，只不過，我係未真係有咁既勇氣去實行到？
唔知……又或者應該係，無法預計、驚……
過左無幾耐，我房門開左，入黎既係老牛大人，「點啊，頭先一返到你就成個頹款，今次又有咩野難題啊？」
我望住老牛大人，心入面果個答案更加唔知點樣實行。
「有咩野講出黎啦，我地兩仔爺之間邊有秘密架。」老牛大人坐左係我床邊話，而我坐直左個人，同老牛大人講左一個假設性問題：「阿爸，如果果陣你追阿媽，要放棄自己本身既家庭，你會選擇放棄阿媽定家庭？」
老牛大人好認真咁望住我，然後笑左出黎：「你大過拿，開始明白一個人成世流流長，總會預到兩難既局面。」


佢摸一摸我個頭話：「你知唔知當年你阿爸係點樣落黎香港架？」
我搖一搖頭，講真，我咁大個人，真係好少聽阿爸以前既野，「想當年……」係未每個人講以前都會用呢三個字行頭先呢？「我係偷渡落黎香港，就要唔止偷渡一次，偷渡左四次先落到黎，每次失敗左比人捉左返去，都會比人捉去剃光頭掃街架。」
聽到老牛大人咁講後，我望一望佢ｄ頭髮，「你咁多頭髮唔驚啦。」
「緊係唔驚，我地家族代代都係頭髮好生得之人。」老牛大人笑住咁講後，又回復認真話：「記得最後一次偷渡落黎香港，我係攬住兩個籃球，係就快到岸既時候跳左落海游上岸，同行既本來有五個人，但最後，只係得返我一個。」
「當時好黑，又好凍，又驚會比差佬捉到送我返大陸，我拚命咁跑，就算我前面果一片地係一塊蠔田我都照跑，ｄ蠔殼整到我隻腳損晒我都繼續跑，流晒血好痛我都唔敢停，直到跑到蛇頭果度，我就放心ｄ，跟住第二日快快手出九龍塘拎埋身份證，今先完全安心。」好可能，有好多老一輩既人都有如此既經歷，但我地呢一輩人總會問：「點解果陣咁辛苦都要落黎香港？」
我諗個個人既答案都係一樣，「因為想以後既生活好過ｄ。」老牛大人答左一樣既答案，而且佢就加左呢幾句：「我仲想，第時你阿媽生活好ｄ，我地ｄ仔女第時生活好ｄ，可以話，我落黎既動力，係因為愛。」
老牛大人好少有地好慈祥咁望住我話：「不過，都要放棄好多野，就好似我一落到黎，就同上面既家人斷左聯絡，要到好多年之後先聯絡返，但果陣，我阿爸同阿媽已經走左，其他兄弟都無咩兩句。」
原來，老牛大人當年都放棄過家庭。
「但係我無後悔過。」老牛大人笑左一下，呢一笑係好自信既一笑，「阿仔，你要記住，每個人都有佢應該要去面對既人生，唔好因為一個地方而去局限自己既發展，呢個世界好大，你始終有一日要出去闖下，無錯，家庭係你既歇腳地方，但如果有一樣野令到你想出去闖，甚至想先離開呢一個歇腳地方既時候，唔好拖時間，因為家永遠都係度，只係睇你會唔會返去。」
雖然我無同老牛大人講過我既諗法，但係佢所講既野，完全講出我所想既野。


而老牛大人都覺得我明白佢所講既說話，慢慢咁起身離開我間房。
「阿爸，多謝你。」我係老牛大人臨離開間房前講。
而佢，停左一停話：「要出去既話，就唔好後悔做左呢個決定，好好去實行你所想。」
如果改變唔到阿琪果邊，就只好改變我果邊，如果……如果我都同阿琪一齊上大陸既話，要準備ｄ咩野呢？
我會唔會後悔？而家唔係諗呢個問題既時候，而係應該諗要點樣實行。
老牛大人既一席話令到我既決心更大，大到係無野可以阻到我。
……除非，有突發既事情發生啦……