[愛情無限loop] 就係咁，我做左女神一年既備胎: ２９７　新方向

阿琪講左呢事我知後，我真係唔知可以點做，送左阿琪返去後，漫無目的坐左係佢樓下既公園度。
我好記得，上次坐係呢度係阿琪比佢前男友打，坐左係度喊，而我就係度安慰佢。
而家，就係我好無助。
面對阿琪要走，我有咩野可以做？
就係呢個時候，藍臣出現企左係我面前，「阿琪係未話左你知，佢要走既事？」
我望住佢，點一點頭。
而佢，就嘆左口氣，坐左係我身邊話：「其實我都唔知咁做岩唔岩，你知唔知阿琪聽到佢阿爸話佢知呢件事既果一晚，佢好大反應，從來未反駁過既阿琪竟然同佢阿爸鬧左場交，我真係未見過咁既阿琪，何想而知，佢係幾想留低。」
聽到藍臣咁講，我都好出奇咁望坐佢，「阿琪同佢阿爸……」
「係啊，果一刻既阿琪，好似好想保護某樣野而戰鬥咁，但係最後，佢都戰勝唔到佢果位硬頸既阿爸，以及令佢心軟既阿媽。」藍臣答我：「佢阿媽其實一直好擔心阿琪既身體健康，所以知道佢又跑返步既時候，已經好反對，今次佢阿爸想佢返上大陸醫病，佢阿媽都好讚成。」
「唉……」我嘆左啖氣，「究竟要點樣先可以幫到阿琪……」


突然，藍臣好大力咁拍左我既背隻一下，係好撚大力，如果唔係識佢既話，我真係會以為佢係尋仇果ｄ人。
我比佢呢一下打到咳左幾聲，然後我呆左望住佢問：「做咩無啦啦打９我？」
佢竟然笑笑口話：「每次我既朋友好似你咁款既時候，我都會好大力咁拍佢背隻，幫佢打氣。」
聽到佢咁講，我真係得啖笑……「咁不如我都幫你打下……」「你對阿琪好重要架，你知唔知？」
本來舉起手想打佢既我，因為佢呢一句話，停晒所有既動作，「……你講咩話？」
藍臣笑左笑，佢呢一笑，好似帶一ｄ酸味，「我覺得，阿琪反駁佢阿爸，最主要既原因係因為你。」
「因為我？」我問。
「對上一次見到阿琪有咁既勇氣，要講返佢初戀男友返黎搵佢見面既事。」藍臣話。
「初戀男友？」我記得阿琪曾經講過，佢拍左幾次拖，到而家覺得最愛既都係佢初戀男友。
而藍臣就繼續講：「果陣我都追緊阿琪，幫左佢好多，但係佢初戀男友一出現，話想見佢，佢成個人就好似變左咁唔理佢阿爸既反對，點都要赴約，不過，佢初戀男友只係因為好耐無見佢想聚舊，而且，係帶住佢既仔去見阿琪。」


「咁阿琪點？」我問。
藍臣笑一笑話：「佢當然無事啦，你都知阿琪不嬲好樂天，而且只要佢見到人地過得好，佢就會替果個人開心。」
「咁又係，阿琪不嬲都係咁。」我答。
「不過呢件事唔係重點，而家重點係你，阿牛，你係令到佢又想反駁佢爸爸既人，所以你對阿琪係好重要，所以，你一定唔可以放棄。」藍臣語重心長同我講。
我聽到佢咁講，突然覺得佢好似以前既自己，以前果個叫阿富唔好放棄阿琪，但其實自己又鐘意阿琪既人。
我終於知道，果陣阿富點解話我好偉大，佢比唔上我，而家呢一刻，我覺得我跟本比唔上藍臣，但係我知道佢點解會咁做，因為佢覺得，我可以比到幸福阿琪。
「不過……」我開聲講：「……我仲未諗到點樣幫阿琪。」
藍臣聽到我咁講後，就話：「有時，唔駛諗住點樣改變阿琪既一邊，可以諗下，點樣改變自己果一邊。」
「改變自己果一邊？」藍臣既說話，令我有一個新方向。