[愛情無限loop] 就係咁，我做左女神一年既備胎: ２９６　ＬＯＮＧ　Ｄ

「……點解無啦啦……」我未問完，喊緊既阿琪已經搖搖頭。
唔知？唔想答？唔想去？呢個搖頭係咩野意思？
聽到呢個消息，我已經無心情食野，望住喊緊既阿琪將面前既野食完後，佢深呼吸左一啖，然後好努力向我微笑左一下話：「好耐無同你單獨食野。」
我呢個時候都勉強笑左一下，點一點頭，然後問佢：「可唔可以答左我，點解無啦啦佢要帶妳返大陸？」
阿琪依然微笑，但係我睇得出，佢係笑得好勉強，「我先前未話，我身體唔多好，要返大陸醫既。」
「妳話妳腎炎嘛。」我答。
「嗯，今次藍臣落黎香港，其實最主要係我爸爸所托，佢叫藍臣帶我返大陸，仲要好好睇住我，養好身子先可以比我返黎。」阿琪既微笑慢慢消減，增加既係佢既眼淚，「……但係，我唔捨得啊……」
「咁點解妳唔同妳爸爸講？」我問。
「我爸爸係一個好硬頸既人，佢決定左既野無人可以改變，其實藍臣佢都有勸過我爸爸唔好咁做，但係都勸唔到。」阿琪好無助咁望住我。
連藍臣都勸唔到，唔通阿琪要返大陸已經成為鐵一般既事實？


「上次妳話，如果去，就會係一兩年……」我話，阿琪係我仲未問完就已經答：「係啊，我一兩年唔可以係香港，唔可以見香港既朋友，唔可以食香港既野食，唔可以見我媽媽，同埋……同埋……」阿琪欲言又止話：「……見唔到你。」
聽到阿琪講呢一句，其實我應該開心，不過當我明白，阿琪見唔到我，亦姐係我都見唔到阿琪，兩年ｗｏ，呢個時唔長，但都唔短。
而且，我同阿琪未開始就要好似ｄ異地戀咁？唔通上天仲覺得比我地既考驗仲未夠？
呢餐飯，阿琪將佢最大既煩惱話左我知，但可惜，我地搵唔到一個解決既方法。
帶走阿琪？但係阿琪咁聽阿爸話，佢點會。
勸佢阿爸？同頭先講既一樣，點勸到。
唔通真係要我同阿琪未開始，就要先經歷ＬＯＮＧ　Ｄ？