[愛情無限loop] 就係咁，我做左女神一年既備胎: ２９５　那件事

係病房外既公眾等候區，我地都好靜咁坐左係度，而先講野既係能蟹，「估唔到最後會係咁樣收尾。」然後，佢笑起上黎。
「益左你啦，佢唔記得你以前ｈｕｒｔ過佢。」能利既反駁，令到我地全部人都笑左，而能蟹就尷尬咁話：「比返少少面我好ｗｏ。」
「你仲有面架咩？咁撚渣比人捉左，成件事其實係你搞出黎架。」能利好唔比面咁扭能蟹既耳仔，佢就痛到喊，我地就睇到笑。
「唔好意思，呢度係醫院黎，你地可唔可以靜ｄ。」我地吵到要護士出黎話先識收。
過左幾日後，阿銀出院，金姐同銅ｓｉｒ都有去接佢，當然仲有ＳＵＮＮＹ啦，本來佢地都煩緊應該接阿銀去金姐度住定去銅ｓｉｒ度住，但係阿銀就好直接話：「我想自己一個搬出黎住。」
其實，一直佢都係自己一個人住，金姐聽到阿銀咁講，其實有少少擔心，不過接落黎阿銀下一句說話就，「不過係我未搵到屋前，可唔可以輪流去你地到住先啊？」
有時，可能當我地面對緊一個問題時，其實問題可能自己已經為自己搵左答案。
所有野，終於告一段落，阿銀奇蹟地回到過去，馬高經歷過我送比佢既二十七腳後消聲匿跡，金姐母女之間既問題解決，能蟹既後悔亦都幸運地完結。
上天突然間送左好多奇蹟比我地，但係，點解無我最想要果樣。
回返帶先，大家仲記唔記得阿琪同藍臣突然出然幫我地出一百萬買起ｄ酒果晚，阿琪講左一句：「你繼續幫我朋友先，今日既事，就解決左果個人後先再講。」


佢呢一句說話係同藍臣講既，但係點解關我事？
探完阿銀果日，大家各自返屋企果陣，我同阿琪一齊行果條回家既路，但係，阿琪悶悶不樂，睇佢好似有野想講，但係唔知係邊度講起好。
直到，去到佢樓下，「妳到拿，早ｄ返上去休息啦。」
「我地，不如一齊去食ｄ野，我有ｄ野想講。」阿琪，終於下決心要講。
都係呢一個餐廳，又係叫左成日叫既野食，「咦？好耐無帶你女朋友黎食野ｗｏ。」個阿姐仍然覺得我地兩個係情侶，不過，唔係……
阿琪今日同平時唔同，平時野食一到，佢一定會即刻開餐，但係今日，佢望住ｄ野食，粒聲都唔出咁。
「妳有咩野想講？」我問阿琪。
而阿琪開始拎起ｄ野食，佢慣性唔食件多士，比左我後話：「……藍臣話，要帶我返大陸。」
多士落入我既碟度，阿琪就拎起叉食緊佢既雪菜肉絲面，而我就望住面前一路喊，一路食緊野既阿琪，無晒反應。