[愛情無限loop] 就係咁，我做左女神一年既備胎: ２９４　最好的結局

失憶！？
唔知你地有無睇過一套戲叫被偷走的那五年，呢套戲，係講一個人因為某幾年過得好唔開心，係一次意外後大腦強制幫佢斷片。
睇呢套戲果陣我一路睇一路屌，點會真係有呢ｄ情節係現實出現架！？
但係，原來真係會有，而且咁樣既情況下發生呢件事，可能係最好既安排。
阿銀係尋日既車禍後，大腦強制令佢斷片，聽ＳＵＮＮＹ話返比我地知，阿銀無左既記憶，係由佢認識能蟹到尋晚發生既果一大段記憶，亦姐係，佢而家記得既野，係金姐同銅ｓｉｒ離婚果一度。
點解佢唔連呢樣野都唔記得？
唔知，可能係因為佢已經知道係銅ｓｉｒ出面有另一個女人，所以覺得金姐同銅ｓｉｒ離婚先係正確既算擇，所以無唔記得掛。
但係，如果阿銀知道佢父母要離婚，點解佢地頭先係病房入面可以咁和諧既？
「媽媽爸爸，我大過架拿，有ｄ事可以直接話我知。」阿銀坐係床上面，對住金姐同銅ｓｉｒ講，「而家爸爸有另一個愛既人，而媽媽妳又有另一個人陪，我都明白有時有ｄ野唔可以強迫，但係有ｄ野，你地係未要同我講啊？」阿銀微笑住，但係卻流緊眼淚。
好可能，佢呢一句話，其實當年已經想講，但係無勇氣，亦都無機會。


批緊蘋果既金姐，放低左把生果刀，喊住望住阿銀話：「阿女，媽媽對妳唔住。」
阿銀聽到後，依然微笑地喊緊，而呢一刻，銅ｓｉｒ亦都行左上前話：「要講對唔住既人，應該係我，係我令到妳無左呢一個家庭。」
阿銀聽到銅ｓｉｒ既呢一句話後，緊抱住佢，然後話：「爸爸，唔緊要，最緊要你肯同我講出呢個事實，你講過，就算一個人幾壞，只要佢肯同你講真話，呢個人始終有得救，係未？」
銅ｓｉｒ都忍唔住，喊左出黎。
「爸爸，你依然係我既英雄，雖然你地而家選擇要分開，但係都要記住一件事，我係你地曾經用真愛所誕下既小孩，就算你地以後唔再相愛，都要好好愛惜我呢一份真愛送比你地既禮物。」阿銀，可能呢一個係上天最想送比妳既禮物。
三個曾經係一家人，經過分開，到而家又聚返一齊，需然唔係美滿，但可能咁樣既結局，仲能令人銘記於心。
係旁邊見到一齊發生既我同阿琪，都睇到喊晒口咁。
如果失憶真係一個老套既情節，但可以令阿銀變返以前咁，我覺得發生左係最好既結局。