[愛情無限loop] 就係咁，我做左女神一年既備胎: ２９２　無問題

就同我先前所講既一樣，呢一個又係一個入醫院既故事，我地坐左係急症室，等緊醫生係入面搶救。
「佢既血型比較特別，我地血庫貯量少，唔知你地有無人同佢血型一樣？」一個護士衝左出黎問。
「我係佢阿媽！唔知一唔一樣？」金姐即刻衝出黎問。
「我都係！我係佢阿爸！」銅ｓｉｒ緊隨其後。
「你地兩個跟我黎驗一驗。」護士講完呢一句後，能蟹都行左出黎：「驗埋我，雖然我唔知一唔一樣，但係如果驗到係一樣既話，都可以幫個忙。」
見到能蟹咁做，我地幾個都走左去驗血幫手。
不過……
「阿琪，妳坐係度等我地，妳剛剛住完醫院，就唔好咁操勞，幫我地係度留意好唔好？」我向本來想企起身既阿琪講，而阿琪聽到我講後就話：「知道。」
搶救，係爭分奪秒，好彩能蟹既血及金姐既血同阿銀同類型，護士知道後即刻安排輸血，而其他人就坐返係急症室到等。
係呢一段時間，我坐左係阿琪身邊陪佢，我緊握住佢隻手同佢講，「放心啦，一定會無事既。」


阿琪聽到後對我點一點頭。
經過左一段時間後，醫生行左出黎同我地講左個好消息後，我地所有人都放下心頭大石。
「醫生，我地可唔可以入去睇一睇佢？」金姐話。
「可以，你地可以去，不過唔好咁大聲，仲有其他病人係度。」醫生講完後就離開左。
而我地企左係阿銀訓緊既床邊，旁邊仲有好多儀器係度，佢仲未醒，不過以我成日睇ｄ醫院電視劇黎講，見到果部心跳機仲郁緊，姐係阿銀無事。
「阿銀……」金姐望住自己個女，喊晒，而ＳＵＮＮＹ就係旁邊扶住佢。
銅ｓｉｒ都一樣好擔心咁望住自己個女。
「病人需要休息架，你地聽日先黎探佢啦。」係旁邊既護士話。
「……但係我想留低。」金姐話，佢一臉央求。
護士見到佢咁，就問：「妳係未佢家屬？」金姐立即點頭，「如果唔多人既話，我可以比妳留低，但係最多只可以留兩個人。」


金姐聽到護士既說話後，望一望ＳＵＮＮＹ，然後望一望銅ｓｉｒ，唔知應該留低邊個好。
而呢一刻，ＳＵＮＮＹ行左出黎話：「不如你……」「你留低好好睇住阿金同我個女。」估唔到銅ｓｉｒ既反能仲快過ＳＵＮＮＹ，「我聽日一早就會黎睇個女。」
ＳＵＮＮＹ同金姐聽到後，都向銅ｓｉｒ微笑左一下，呢個微笑係感激既微笑。
離開醫院後，大家都好累，各自返家，而我就送左阿琪返屋企，當然藍臣都係度，不過有少少唔同，就係我到而家都一直拖住阿琪隻手。
但唔知係未因為太累，我到第二日先知道反應，我竟然可以拖住阿琪隻手咁耐。
當我返到家，推開門，「衰仔，終於返。」老牛大人企左係露臺果邊望住剛剛行入屋既我。
「仲未訓？」我明知故問左一下，而老牛大人無奈咁搖一搖頭，行到我面前問：「搞成點啊？」佢見到我因為驗血後既膠布，又問：「咩黎？」
我笑左笑話：「無野啊。」然後行去房到，係行到房門前比左一個ｏｋ既手勢佢，然後話：「所有野都無問題。」
老牛大人聽到我咁講後，笑左笑話我：「死仔，要我擔心成晚。」
係啊，唔好意思，要老牛大人你擔心左我成晚。