[愛情無限loop] 就係咁，我做左女神一年既備胎: ２９１　殘忍既事實

真係無諗過會係呢個時候見到金姐既一家人，而且……ＳＵＮＮＹ都係度，唔知可唔可以話係新歡舊愛共聚一堂呢？
其實當呢一位銅ｓｉｒ駛開左佢ｄ同事後，我地幾個人都無講過任何野。
咁我呢ｄ唔係主要人物無野講就正常啦，但係最主要果四個人都無野講，現場不知幾尷尬，唔通就係因為我地係度所以佢地唔知有咩講？
「我地不如……」「唔駛，你地唔駛走。」正常我想話走開比佢地慢慢傾清楚果陣，銅ｓｉｒ就咁講：「煩到你地真係唔好意思，不過有ｄ野，可能真係要講出黎，我唔介意你地聽埋。」銅ｓｉｒ講完後，就行到阿銀及金姐面前。
佢蹲低左，捉實左金姐隻手話：「咁多年黎，辛苦妳。」金姐聽到銅ｓｉｒ呢一句，臉不改容，只係點一點頭。
又係既，金姐食左咁多年死貓，銅ｓｉｒ呢一句佢受得起又餘。
然後銅ｓｉｒ就望一望坐係金姐旁邊既ＳＵＮＮＹ，佢地只係點一點頭，然後銅ｓｉｒ就放開左捉住金姐既手，呢一下點頭，可能只有佢地兩個先會知道箇中既意思。
跟住銅ｓｉｒ就移到阿銀既面前話：「阿女，咁多年黎，我……」「我唔想聽啊！」銅ｓｉｒ都未開始講，阿銀就好激動咁抗拒唔聽，佢用手緊緊遮住自己既耳仔，好似唔想知道呢一個事實，不過，銅ｓｉｒ最後都選擇要殘忍落去。
「阿女，其實一直以來，係我對媽媽唔住，係我出面有左另外一個，我先會同佢離婚。」呢一句說話，可能應該一早就要同阿銀講，如果係一早講，阿銀仲會唔會搞到而家咁？
唔知……



但係，原來阿銀佢係知道。

「點解啊！點解你要咁做啊！阿媽已經選擇講呢個大話呃我！點解唔一直呃落去啊！！！係你細個話比我聽呢個世界上係有真愛！就好似你對媽媽咁！但點解你要將呢個事實打破啊！！！」阿銀喊晒向住銅ｓｉｒ大叫，而金姐及銅ｓｉｒ聽到阿銀咁講，都呆左問佢：「……阿女……原來妳一早就知道？」

阿銀好激動咁話：「你地知唔知當我知道你地要離婚既時候，我心情係幾差啊，我諗唔明點解你地要離婚，本身你地都好地地，點解一個本來好和諧既家庭最後會散左，我唔甘心睇住咁既結局，我自己去查，但估唔到愈查愈知道更多既野，點解爸爸會為左一個咁既女人放棄我地，點解啊！？唔通『壞』真係咁吸引人？點解媽媽要講大話呃住我啊？唔通佢覺得我無呢個資格知道咩！？我要證明比你地睇呢個世界係有真愛架！！！但係……但係……」阿銀講講下就望住能蟹，而能蟹見到阿銀望住佢，都唔好意思地低下頭，「原來呢個世界上面，要揾到真愛真係好難架，但係點解其他人搵到，我搵唔到啊！？點解我要係受害者啊！？點解你地要分開！？點解我而家要搞成咁！？真愛真係咁好咩！！！我就係一個比真愛玩到變成咁既人啊！！！！！」

阿銀講完呢句後，就突然衝走左，而我地見到佢咁，當然衝左出去啦。

「阿女！妳唔好咁啦！」銅ｓｉｒ話。



「係啊！阿銀！果陣係我唔好！但係妳都唔可以咁架！」能蟹話。

我地幾個用盡晒所有既力係阿銀既身後面不停追。

直到……「碰！」一聲既碰撞……「ｂｉｂｉｂｉ……」車既防盜聲……然後見到既，係銅ｓｉｒ係馬路中心抱起左被車撞到既阿銀，以及係身後面不知所惜既能蟹向我地大叫：「……ｃａｌｌ……ｃａｌｌ白車啊！！！」