[愛情無限loop] 就係咁，我做左女神一年既備胎: ２８４　女既用手，男既用腳

如果真係打，我唔驚，如果得我一個人既話，但而家咁多個人，阿琪又黎左，我最怕打交果陣多個人要睇住，因為，你唔可以唔睇住，但係睇住既話又會阻住你去衝。

我咁講唔係因為我好勇鬥狠，而且我係一個和平主意者，但我明白一個道理係，人不犯我，我不犯人，人若犯我，我必定十倍還比佢……

對唔住……聽到話打突然好熱血，當堂變左個出黎行既人咁添……我本身好善良架，大家唔好誤會。

我呆左望住個主持，然後望一望遠處望住我既馬高，佢笑得好撚衰咁望住我，我即刻知道，原來佢係突登，因為大家無忘記既話，都記得我以前踢過佢一腳，而且佢話一定會還返比我，咁姐係佢一早就諗好左呢個遊戲啦。

「你地兩邊各出一男一女，果一邊就當然係馬高同阿銀，而呢一邊，就係呢一位男士同埋阿金！」佢口中所講既果一位男士，就係我……內定成咁，唔駛講都知一早夾定晒架啦。



打？如果一男一女既話？唔知係群抽定隻抽呢？

「唔該請四個參賽者出黎先！」主持既呢一句話後，四個人企左係個場中間，大家都好識趣咁讓出左個位置。

我企左係中間，真係好無奈。

而阿琪都好擔心咁望住我。

「今場比賽其實好簡單，你地都識玩包剪揼架啦，而今次呢個遊戲就係你地要不停輪流猜，贏既當然係打啦，輸既被打，最後打到一方頂唔住既就算贏。」主持好簡單咁講左今次既遊戲方法，而我都一直聽，直到……「不過，男同女打既方法唔一樣，女既就係打巴，男既就用腳踢。」



仆你個街……報仇報得咁撚出面都有……

馬高同阿銀壞笑咁望住我地，而我同金姐就互望左一下，佢就問我：「我得罪過我個女姐，你得罪過馬高ｄ咩？」

我無奈咁話：「我以前踢過佢一腳……」

「唔怪得啦……咁你一陣自己執生拿。」金姐話。

「我知，妳都係啊金姐。」我答。



「我怕咩，我同個女都係互打巴姐，你同馬高互踢，小心佢一開始就拆你祠堂。」ＳＨＩＴ！！！如果唔係金姐咁講，我都無咁諗過添。

「遊戲開始！！！男士先玩！！！兩位準備！！！」我真係未試過有一呢一刻好想打死呢個主持既衝動。

「保重。」金姐笑左笑，拍一拍我膀頭就行左去旁邊，而我望住對我笑得好撚衰既馬高，佢同我講：「多多指教。」呢一句就咁睇雖然出自好意，但係由馬高既口講出黎，就變成笑裡藏刀。