[愛情無限loop] 就係咁，我做左女神一年既備胎: ２８３　打！！！

係藍臣既一百萬之下，我地拎左一勝，全場既人都係歡樂聲中，飲緊我地及馬高玩呢一個昂貴遊戲下既酒。

有人請飲酒又有邊個會唔開心，不過，請飲酒既人，就無呢個心情，馬高好似因為藍臣出現亂左一亂陣腳，佢返到自己果班人果度後，好多人已經同佢交投接耳，好似不停話比佢知一ｄ情況，直到我係遠處睇到馬高笑左一笑後，我知道，佢已經從亂腳中搵返步伐。

而我地，就只可以靜靜咁係度等，等馬高宣告第三場遊戲。

就係呢個時候，阿銀向我地呢邊行過黎，「估唔到你地可以撐到第三場。」睇得出佢神情好似有少少恍忽，唔知係飲得太多定係食左丸仔。

金姐見到佢咁，就即刻扶住佢話：「阿女啊，不如就咁算啦好唔好，放左我地既朋友，我地唔會追究架。」



「妳都痴撚線既，妳朋友既事關我咩事啊，而且捉妳朋友又唔係我既主意，係馬高哥既主意，你地要求情既未搵佢囉，與我無關，不過今日我要佢叫埋妳黎既目的，就只有一個。」佢輕拍自己既面，然後話：「我記得果晚妳條仔打我一巴，我一定會還，而且妳果一晚打我既果一巴，我都一定會係今晚還返比妳，妳呢個做左唔要得既事既女人，係無資格做我阿媽。」

「妳講野都幾唔尊重下ｗｏ！」能利聽到阿銀咁講，火得黎埋咁話，但係阿銀就好少理，佢只係白左一下眼就走左。

「金姐，妳果一晚有打佢咩？」我問。

金姐眼有淚光咁話：「佢講既果一晚，係佢話要離家出走既果一晚，亦都係我同佢鬧交鬧得最勁既一晚。」

估唔到，今次除左要救返能蟹呢件事，仲要處理埋金姐同阿銀既事。



「一陣要發生既事都唔知會點，不如叫阿塔實行ＰＬＡＮ　Ｂ。」ＳＵＮＮＹ話。

「ＰＬＡＮ　Ｂ？」我問佢地。

「頭先你飲醉左果陣，我地傾左一ｄ野，如果見勢色唔對路，就會叫阿塔去……」「第三場遊戲開始！！！！！」頂！又會咁唔岩時候，個主持人一講完ｄ音樂開到勁打，而我只見到ＳＵＮＮＹ口ｕｐ　ｕｐ，都聽唔到佢講咩，就係我想叫佢講大聲ｄ果陣，就比個主持人拉左出去。

「第三場遊戲！！！一個字！打！！！！！」我聽到個主持人所講既野後，呆左望住佢，下？打？唔係啊？如果要打點解唔一早打，搞到第三場先打啊！？