[愛情無限loop] 就係咁，我做左女神一年既備胎: ２７７　眼前一黑

如果話一生人可以飲既酒係有一定限額，唔跳係我面前呢一車酒，會唔會就係我呢一生人中所飲既酒既總和呢？

我地六個人分別企係一車酒前面，而旁邊既人就不停叫囂助威咁，講真，係有Ｄ怯，但係學張家輝講，「你行得上臺，唔好怯啊，怯，你就輸左成世」。

我就係因為呢一句，好有雄心壯志，而我果兩位戰友當然一樣啦，因為佢地係成左佢地自己而戰。

「準備！」突賒有一個人大叫左一聲，我望向果個人，咁岩，我見到阿塔既身影，佢不停向我揮手，而佢既表情……睇唔清，可能佢企個位比較暗既關係。

「倒數三聲！」我望返過黎，見到馬高笑笑口咁同一個人打左下眼色，而果個人就同佢點一點頭，唔知，佢地搞咩呢？



「三！」ＪＵＤＹ同ＣＯＷ手拖住手，睇得出佢地都捉得大家好實。

「二！」除左馬高外，另一邊幫手既係一男一女。

「一！」果個人都未講完，果一男一女已經好快手拎左支酒飲，而ＪＵＤＹ見到都好快手拎左支，其他人都緊隨其後。

我先講一講架車入面有咩野酒，佢面果度放滿左好多支啤酒，飲完啤酒既話就會見到黑牌、紅酒同白酒，再落既竟係係中國五糧液同矛台，最後係一大支香檳。

咁樣飲法，我可能飲到紅酒就訓低。



但係，我係唔可以怯架！！！

啤酒對我無難度，好快我就清左一半，其他人當然一樣，而且仲快過我添，最先拎係支黑牌既人，係馬高，佢好得戚咁話：「駛唔駛等埋你地先啊。」

不過ＪＵＤＹ都拼左條命追得好快，馬高講完呢句後既幾秒，ＪＵＤＹ都拎起左支黑牌，「我覺你老所以先讓下你咋。」

好佩服ＪＵＤＹ同馬高飲到咁都可以講到野，而馬高既果兩位隊友都唔弱，好快就拎起左支黑牌，而我同ＣＯＷ就守尾門。

但唔知點解，我愈飲愈頭痛，愈飲愈頭痛，可能，唔係咁快醉掛。



係呢個時候，我感受到幾下震動，應該係我電話係度震，邊個咁唔識趣而家黎搵我啊，而我係呢個時俟分左下心，頭低左一下，吐意即刻衝上黎，加上頭重重……

「你唔店出聲ＷＯ。」飲緊知黑牌既馬高話。

而我聽到佢咁講，將就嘔出黎既果啖野吞返落肚，拎起支黑牌，「飲野就唔好講野啦！」我霸氣地咁開左支黑牌，開始飲。

但係，我聽到背後有一班人不停叫我唔好飲，好似係金姐佢地。

但佢地既聲音漸細，好快，我就聽唔到佢地既叫聲……唔係，應該係話好快我連一聲都聽唔到，我知道，呢個就係我醉酒既預兆。

不過對住馬高呢一場比賽……我就算飲到睇唔到野……我都要飲落去……但點解我只係咁樣諗……眼前真係黑晒……既……