[愛情無限loop] 就係咁，我做左女神一年既備胎: ２６２　Ｂ男既技量（大病後既更新）

（首先要同大家講對ＳＯＲＲＹ先，因為大病左幾日而家先好返，所以先前無ＵＰＤＡＴＥ真係對唔住，我呢幾日會抽時間好好咁追返個進度）

因為實在太嘈，阿塔示意我同能蟹跟佢去一個比較靜既地方，但估唔到佢會帶我地兩個去返頭先我聽到佢同阿琪嘈左幾句既地方。

一行到去，阿塔就問：「點解你會黎呢Ｄ地方？」

能蟹見我無咩反應，所以幫我答：「無啊，成日見佢傻下傻下咁款，驚佢比女玩，所以未帶佢黎見識下囉。」

能蟹講講下就用手撞一撞我，原意我配合佢，而我都好識做點一點頭，「……係啊。」



阿塔望一望我，然後不停點住頭話：「都係既，你都要出黎見識多Ｄ先唔會比果個女人玩度。」

「邊個女人啊？」能蟹問，但我下意識咁阻止左能蟹，「你未咁多事啦，你呢阿塔，我見你玩開班人當中，有個好似好闊佬既果個人，係邊個黎架？」我呢個問題一問完，能蟹向我投露左一個做得好既眼神。

而阿塔就話：「通常只要有佢係度，所有飲飲食食都係佢埋單，應該幾有米，所以好多女埋身，我有時都會去痴酒飲，不過，我知道佢地唔止咁。」

「唔止咁？」能蟹問，但係呢一刻阿塔突然有少少警覺性咁問返轉頭：「你地知咁多做咩？」

比佢咁樣問一問，我就話：「係啊，我第一次黎呢度，驚唔知頭唔知路得罪人嘛，所以一見到你係呢度，而且見你同果個人都有幾句，未過黎問下你囉。」呢一個回答，又得到能蟹既做得好目光。



「咁都係，你地第一次黎，如果痴酒飲都可以既，不過其他野就……唔好痴啊。」阿塔用一個勸告既語氣話。

「姐係……」「……咩啊？」我同能蟹問。

而阿塔就嘆一嘆氣話：「我見過好多女埋佢身本來係為左想飲野，不過飲多幾次後佢就會落藥係Ｄ酒度，佢落得藥，當然就會有埋『糖』分比人啦，所以佢身邊愈黎愈多女，都係因為有免費酒同免費糖。」

聽到佢咁講後，我即刻問：「咩野糖啊？好好食架？」

但估唔到能蟹一野打左落我個頭度，「丸仔啊ＯＮ９。」



下？丸仔！？咁阿銀佢都有痴埋去，唔通阿銀佢都有？

「除左『糖』，佢仲識一種技量架，呢一招佢一出，果Ｄ唔聽話既女人都會好貼服咁痴向佢身上。」阿塔話。

「咁勁？咁就要聽下拿。」能蟹話，而阿塔就嗤笑左一下，「聽下好拿，呢Ｄ係Ｄ仆街野，我就真係唔會做，佢會隨時帶住Ｄ迷香，等恰當時候就會向Ｄ女仔出手架拿。」

「點出手？」我問。

「佢用手拎Ｄ出黎，散向目標囉。」阿塔話。

佢呢一句後，我回想起呂晨同阿琪暈果一晚，我都好似見到Ｂ男有向佢地兩個散左Ｄ野，我諗果Ｄ一定係阿塔所講既迷香。

就係呢個時候，出面突然好嘈，能蟹聽到就話要出去睇下發生咩野事，而本來想跟出去既我，就比阿塔捉住左，然後佢就同能蟹講：「我想同佢單獨講少少野。」

能蟹聽到後點左點頭就出左去，而我就望住阿塔，問佢：「你想知Ｄ咩？」



阿塔深呼吸左一口，然後問：「阿珍佢近排點？」