[愛情無限loop] 就係咁，我做左女神一年既備胎: ２６１　對唔住（補返更新）

（大病左兩日，而家先有時間更新返，對唔住啊各位，我會盡力補返先前既話數）

講句野啦……快ｄ搵ｄ野講啦……但係講咩野好啊……

我見到阿琪後真係唔知講咩野好，而阿琪都係一樣，佢好尷尬咁低下頭，不停回避緊我既目光，點解？點解佢要回避我。

果個所謂未婚夫見到阿琪咁，都問佢發生咩野事，然後當佢發現左我既身影後，好似知道左大既，向我微笑左一下點一點頭。

唔知點解，我內心好抗拒呢一下點一點頭，我唔知係出於妒忌既心理定其他野，只係覺得，佢呢一個舉動令到我既心抽左一下。



我既電話不停震，但我無理過，因為呢一刻既我將所有專注力都放係阿琪度，我見到果個男人同阿琪講左ｄ野後，佢地兩個就起左身走左，當我想跟上去既時候，我身後突然有個人捉住我，「搞咩唔應機。」係能蟹，我諗佢呢一句係大叫出黎，因為呢度既音樂聲都好大，佢要用好大聲我先聽到佢講咩。

係呢一刻，我只係稍為回一回神。

「你個朋友呢？」能蟹問，而我望一望頭先阿琪坐過既位，已經唔同晒人，而且阿塔都唔知去左邊，「仲未搵到。」我搖住頭答佢，但其實我已經無咩心情同佢地一齊行動落去。

「同你一齊搵。」能蟹一直係後面推我，而我就好似一個隨波遂流既人一樣，係茫茫既人海入面，搵緊阿琪既身影。

點解？點解佢要回避我？



點解？點解佢會係呢度？

點解？點解佢會同果個男人一齊？

「ｓｄ左咁多ｍｓｇ比你都唔應機，下次記得即刻應啊。」能蟹係推緊我既時候講左呢一句，而我就拎左自己既電話出黎睇，見到好幾個都係能蟹同ｓｕｎｎｇ　既ｇｒｏｕｐ　ｍｓｇ，而除左一個，果一個好似打左我一拳既ｍｓｇ。

我見到阿琪ｓｄ左一個ｍｓｇ比我，我即刻打開左黎睇，一睇，係三個字……

阿琪：對唔住



先前係同我講「多謝你」，今次就同我講「對唔住」，世間上其實仲有另外一個三個字，點解佢唔同我講果三個字……

好簡單，因為我唔係佢想講既對象，對於佢，我配得上既三個字只係有「多謝你」，「對唔住」。

我無力咁垂低手，繼續比能蟹係後面推，唔知過左幾耐，我見到眼前果位認識既阿塔，佢一直望住我慢慢行近，直到我行到佢既面前，佢同我講：「好耐無見。」

「……嗯。」我諗呢個字係我而家唯一有心情講既字。