[愛情無限loop] 就係咁，我做左女神一年既備胎: ２５３　陪老牛大人

臨訓前，硬係有Ｄ野唔記得左做咁既？但又諗極都諗唔到，算，一覺訓到大天光先。

不過到左第二朝早，一張開眼就見到老牛大人好近距離望住我，剛剛醒既我當然嚇左一跳啦，「咁做你攪咩啊？」我問。

而老牛大人只係搖一搖頭，然後問我：「買左飛未啊？」

係ＷＯ，原來尋晚一直諗但係諗唔到既野，就係答應左今日要陪老牛大人去睇戲ＷＯ，「買……買左拿。」我起身將放係我銀包既飛比佢睇，而佢好滿意咁點一點頭。

「陪我飲早茶。」老牛大人話，然後無理我想唔想就拉左我起身。



可能我真係唔夠訓啦，陪老牛大人飲早茶果陣我打左不下十幾個呵欠，而老牛大人見到我咁就話：「做咩你呢排晚晚都咁夜返啊？」

諗落呢幾晚又真係好夜先返屋企，我笑笑口隨便話：「無啊，我同朋友去玩姐。」

「阿琪？」老牛大人問。

「都有佢，不過係一大班人。」我答。

然後，我就講左呢幾晚見到既野比老牛大人知道，而老牛大人聽到後就話：「其實你個兄弟都幾蠢下。」



聽到佢突然咁講，我就問：「點解你會咁講佢呢？」

老牛大人語重心長話：「一個人想變好定壞，係另一個人阻止唔到，如果有人愈想阻止，果個人就會愈想去做，雖然聽起上黎好似你兄弟累到個女仔變成咁，但係，如果佢自己唔想做既話，係無人會迫到佢咁做。」

「你意思係，我兄弟用既方法係錯既？」我問。

「係，唔止你兄弟，就算果個金姐都係一樣，要果個女人變返好，唔係一朝一夕既事，而且最重要既，係搵到佢變壞既源頭。」老牛大人話。

老牛大人講既說話都好有道理，但係要搵到個源頭，就而家既情況，應該都有少少難。



「仲有，要小心個Ｂ男，呢個世上總有Ｄ人真係會做出一Ｄ好賤格既事。」老牛大人話。

「知道。」我點一點頭。

「你都係個大人，有咩野應該做，唔應該做自己識我選擇，亦都要記住，有Ｄ人唔到你既能力範圍，就唔駛做得咁過火，知道未啊。」老牛大人呢一句好耐人尋味。

「我知道架拿。」我答佢。

「你係做得到先好。」老牛大人話。

同老牛大人飲完早茶，我就同佢去左睇戲，老實講，套戲既內容係Ｄ咩我唔太清楚，因為我一直諗緊阿銀呢件事可以點樣處理，我又應唔應該處理。