[愛情無限loop] 就係咁，我做左女神一年既備胎: ２５０　金與銀

其實，我都覺得現時既氣氛……有ｄ怪，可能係因為，能蟹係能利面前講過阿琪既負面野，搞到能利對阿琪既印像唔多好，而阿琪係果日坐係我地旁邊已經知道能利對佢既印像麻麻，但係佢又要扮到佢無見過能利，唔知能利唔鐘意佢，睇到阿琪都幾尷尬。

而我，見到佢地咁樣想不停搵話題，但一出聲就比能利話ｏｎ９，所以最後都無咩點講野。

成個跟人行動既氣氛唔多好，而且我地好似無咩合作精神，能利有佢自己搵，而我同阿琪就兩個自己搵。

咁樣搵法，其實真係好靠彩數，不過，上天好似永遠都睇住我咁，又真係比我搵到果日既女人，我同阿琪講：「就係果個。」

阿琪聽到我講都望左過去，我再三確定，真係果個女人。



呢一刻，我突然有一個諗法，如果上天真係咁睇住我既話，可唔可以將我呢ｄ運氣移到我同阿琪身上。

搵到果個女人，當然係第一時間話埋比能利聽啦，能利聽到我搵到果個女人，佢第一時間竟然係有小小嬲咁話：「比你呢個ｏｎ９快一步添。」

算，都搵到就唔同妳嘈，我地幾個跟住呢個女人，轉左好幾次場，講真，呢個女人真係好玩得，每次轉場，佢都玩得好盡興，而且佢好似識得好多人，不過唔知點解佢每次走之前，都會同一個男人去左廁所先，然後過左好耐先返出黎再離開。

「你都ｏｎ９既，兩個人入廁所當然係大戰啦。」能利直接咁同我及阿琪話，而阿琪雖然聽到後有少少尷尬，但係佢都點頭同意。

不過呢個女人轉左幾次場，都係未見過ｂ男既身影，唔知係未因為我地果次破壞左佢食呂晨既事後，佢就從此消失呢？



正當我諗緊呢個問題果陣，「你地快ｄ睇下，好似唔止我地跟住呢個女人啊。」能利講完後，我同阿琪都望向佢所指既果個人度。

就當我同阿琪望到果個人既一刻，我同阿琪都呆左一呆，「你地個樣駛唔駛咁啊？」

無錯，如果係望到平常一個唔識既人的話，係好正常既事，但我同阿琪而家望到既，係一個我地好熟既女人，一望佢既背影已經知道佢係邊個，「點解金姐佢會係度？」阿琪問，而我都想知道呢個答案，能利聽到阿琪既說話就問：「邊個金姐？」

呢一刻，我都唔知點答佢，只知道接落黎，我地三個望住金姐行到係我地跟既果個女人度，「阿銀，妳唔好咁啦。」

果女人叫阿銀……個名有無再老土ｄ啊……



「妳理我做咩啊，係好多年前我同妳已經無任何關係。」阿銀好用力甩開左金姐捉住佢既手，而金姐又話：「有邊個阿媽見到自己個女咁會唔擔心先得架，妳聽我話跟我返屋企好唔好？」

咩話！？呢個女人係金姐既女？