[愛情無限loop] 就係咁，我做左女神一年既備胎: ２４７　太多突然（補返前日ＯＴ更新）

「點解妳要多謝我？」我問阿琪。

而阿琪就微笑咁話：「你一直對我所做既野，我有眼見架，所以你對我既好我一定知，我知你緊張我，我知你擔心我，我知你可以為左我做好多野，但係，我真係咁值得你為我做到咁咩？」

呢一刻我無回應佢，而阿琪慢慢就無喊，佢望住個天話：「我以前未有講既，有好幾次，我都有好幾班好朋友，但係到最後果ｄ好朋友就會因為我反目成仇，就好似你地而家咁。」

我諗返起以前阿琪同我講過既說話，無錯，佢曾經有同我講個呢樣野。

「一開始果ｄ人會覺得無問題，但慢慢佢地就會話我利用某個人對我既好拎好多好處，然後佢地就會背後話我，甚至有ｄ人會出現爭寵既情況，到最後，我就會變成左一個壞人。」阿琪無奈咁望住我，「估唔到我地幾個都會變成咁。」



「可能，慢慢就會無事呢。」我話，呢一句係我而家呢一刻諗到既說話，不過睇黎無咩用，因為笑左一下話：「唔知呢？」

佢呢一句唔知，雖然帶有少少希望，但佢就好似斷然咁覺得佢地唔會改變對佢既睇法。

而我呢個時候問左佢一個問題，「妳會唔會嬲佢地？」

「唔會。」阿琪好快就答我：「佢地係我好朋友，我知架，而且佢地都係因為緊張你先咁話我姐，佢地係出於好意，我明架。」

我唔知話阿琪大方定點，呢一刻我自己都好矛盾，而且開始覺得我自己其實無我想像中咁認識阿琪，突然其來話係佢未婚夫既男人，突然話我知佢身體唔好，以及突然見到佢既父母。



我突然間覺得，要同阿琪一齊，一定要係一個可以接受佢所有一切突發野既人。

我……可唔可以成為呢一種人，其實我都唔知。

同阿琪傾多左一陣，佢心情都好返左ｄ，送左佢返去後我都返左屋企，而係送到阿琪返樓下果陣，阿琪同我講左句：「如果有一日你唔想等我既話，你唔好自責。」

而我既回應係，「放心啦，我仲可以等，唔等都等左咁耐啦。」

我地兩個微笑左一下後就各自歸家。



一返到去，第一把聲就係，「死仔返黎拿，成個下午去左邊度食女啊。」係啊……老牛大人把聲。

經歷完能蟹同能利，以及阿琪既事後，我真係無咩心情理佢，不過佢下一句就同我講：「生仔都係無用，睇黎佢答應左我既野都係唔記得左。」

又係突然，我諗返起要同老牛大人去睇戲既野，「你想睇邊套戲？」

老牛大人只係嘆左一口氣話：「睇黎呢個仔都係無心裝載我既說話拿。」佢搖一搖頭然後同我講：「我想睇ＢＢ宅急便啊。」

「下！？」我當下既反應係咁。

而老牛大人見到我咁，又講多左次：「我想睇ＢＢ宅急便啊。」

我記得，呢套係一套３Ｄ卡通黎，我望一望老牛大人，好認真咁問佢：「你真係想睇呢套野？」

「好出奇咩？」老牛大人理直氣壯答我。



咁又係，都唔係好出奇既……

「咁我買左飛之後話你知，叫唔叫埋阿媽去？」我問。

「你娘親都唔鍾意睇呢ｄ片既，我地兩仔爺去睇就得啦。」老牛大人答。

好啦，老牛大人講到咁，咁我聽日去買飛啦。