[愛情無限loop] 就係咁，我做左女神一年既備胎: ２４６　多謝你（補返前日ＯＴ更新）

其實，我真係無諗過當阿琪道佢地係背後講佢既果一刻，阿琪會有咩野反應，之前我會諗，阿琪會好嬲？阿琪會一笑而過？阿琪會以後都唔再搵佢地？

唔知，之前唔知，但我而家知，阿琪原來會喊得好勁。

我大大話話係茶餐廳陪阿琪坐左成三個鐘，而佢就喊足咁耐，連人地本來係有得賣下午茶都轉緊餐牌賣晚餐，阿琪都仲喊緊。

一個侍應行左過黎換餐牌，佢見到阿琪仲喊緊仲話：「妳男朋友仲未哄返妳啊？」

比人咁樣問一問，我都唔知咩反應，不過阿琪好似聽唔到佢講咩咁，繼續喊，而個侍應就話：「女人要黎錫架，你仲唔快ｄ錫返你女朋友。」



我無言而對，只係拖住阿琪隻手行左去櫃臺埋單，而我拖住阿琪一邊走，佢仲係一邊喊緊。

離開左茶餐廳之後，我地去左一個公園，平日呢個時間，呢個公園應該仲有ｄ人係度，但今日唔知點解，呢個公園咩人都無。

我帶阿琪行到一邊既長椅到坐住，望一望佢喊到通紅既眼話，摸一摸佢返面話：「再喊就變豬頭架拿。」

阿琪聽到我咁講笑左笑，不過仲喊緊，「佢地平時係未都咁講我架？」佢問。

而我諗左諗答佢：「以前唔係，不過近排係。」



「佢地係未覺得我玩緊妳，要你做我隻兵啊？」阿琪好直接咁問。

「係。」我都好直接咁答佢。

「但我真係無咁諗過架。」阿琪好似一個犯左過錯既小朋友咁同我講。

而我，摸一摸佢個頭話：「我知啊，所以我到而家都仲係妳身邊囉。」

阿琪聽到我咁講後，好似心情好返ｄ，然後好認真咁同我講：「……我而家真係無心情拍拖啊，爸爸日日都迫我，叫我同果個男人一齊，而且我身體既情況……我唔受累到其他人啊。」



無奈，我見到阿琪既無奈，但更無奈既係我，點解？點解阿琪一直都會覺得自己係會累到其他人？點解佢無諗過，其實，一個真係愛佢既人係可以同佢分擔所有野。

「其實，我唔怕妳累我，我只係怕妳唔選擇我幫妳。」我好自然咁講出左呢一句話，講出左呢一句好多人都認為只有係兵、係備胎先會講既說話，「比個機會我好唔好，我好想照顧妳。」

點解我講完呢一刻，覺得我好似七三廿一，好似果陣拾拾去落仔既時候，七三廿一衝過去同拾拾講叫拾拾生個ＢＢ出黎，佢會做ＢＢ既爸爸。

睇黎，我呢一個覺得，會完住承襲七三廿一同拾拾果陣時既結局。

「阿牛……我呢一刻真係未想拍拖住。」阿琪話，佢用一個唔好意思既語氣同我講，「多謝你。」

突然間，我感受到當時七三廿一果一種無奈，我明白點解當時間七三廿一咩都唔想講，因為許下左一個重要既承諾但係得唔到想像中既回報，個心，就係好似比人大大力咁掐左一下，仲要係掐得好實。

頓時間好似空氣入面多左好多壓力，而且仲有果一句「多謝你」。

呢三個字係呢一刻，唔知點解，我覺得仲難受過聽粗口。